ඉතිහාස කෘතියක් හැදෑරීමට පෙර එහි රචකයා හදාරන්නැයි E.H කාර් ප්‍රකාශ කර තිබේ. ඒ මන්ද යත් ඉතිහාස රචකයන් මේ පංති සටන් ඉතිහාසය සම්බන්ධව විග්‍රහ කරන්නේ වර්තමානයේ තමන්ගේ පංති සබඳතා තුළ පිහිටා බැවිනි. එනම් තමාගේ යුගයේත් එහි වුවමනා වලත් සිතුම්පැතුම් වලත් සංකල්ප වලත් ඇලී ගැලී සිටිමින් නිසාය.
13 වන ශතවර්ෂයේ දී එංගලන්තයේ කෘර ආධිපත්‍යයෙන් මිදීම සදහා ස්කොට්ලන්ත ජනතාව ගෙන ගිය අරගලයේ තීරණාත්මක නායකත්වයක් ඉසිලූ විලියම් වොලස් සම්බන්ධයෙන් ඉතිහාසඥයන් දුටු අයුරු වැදගත් උදාහරණයක් වෙයි. එකල ස්කොට්ලන්ත රදල ප්‍රභූහු එංගලන්තයේ එඞ්වඞ් රජු සමග විවිධ සම්මුති ගසමින් ජනතා අපේක්ෂා බාල්දුකරමින් සිටි යුගයකි. සාමාන්‍ය ගොවි පවුලක සාමාජිකයකු වූ විලියම් වොලස් මේ ජනතාවගේ නිදහසේ අපේක්ෂා මූර්තිමත් කළ නායකයා ලෙස හැඩ වැඩ ගැසී ඉදිරියට විත් ජනතාව සන්නද්ධ දරමින් එංගලන්තයේ එඞ්වඞ් රජුගේ පාලනයට එරෙහිව තම සටන මෙහෙයවීය.
මේ නායකයා සම්බන්ධයෙන් එංගලන්ත ඉතිහාසය පිළිබද තම කෘතියේ දී (1926) කේම්බි්‍රජ් විශ්ව විද්‍යාලයේ ඉතිහාසය පිළිබඳ මහාචාර්ය ඨගඵග ටේ‍රවිලියන් වොලස්ව හුදු කොල්ලකරුවකුගේ සිමාවේ තබා අත සෝදා ගනී. එදා ස්කොට්ලන්ත රදල ප්‍රභූන්ගේ ආත්මය ඒ මගින් බේරාදීමය ඔහු කරන්නේ. නමුත් මහාචාර්ය රැම්සේ මුවර් එංගලන්ත ඉතිහාසය පිළිබද තම කෘතියේ දී (1920) වොලස් ගැන කියන්නේ මෙසේය.
“..ඒ අනුව එඞ්වඞ් රජු තවදුරටත් ජාතික ස්වාධීනත්වය උදෙසා සටන කරගෙන යාමට උනන්දුවක් දැක්වූ විලියම් වොලස්ට හැර සෙසු සියල්ලන්ටම ක්ෂමාව දුන්නේ ය. සර් ජෝන් මොන්ටීන් (ස්කොට්ලන්ත රදළ ප්‍රධානියෙක්) විසින් අල්ලා ත්‍යාගයක් ලෙස සතුරන් අතට පාවා දෙනු ලැබූ වොලස් තෙමේ ලන්ඩන් නුවර මං සන්දියක් ගානේ ඇදගෙන යනු ලැබ අන්තිමේ දී එල්ලා මරන ලදී. වොලස්ගේ වීරක්‍රියා අසාර්ථක වූ බව පෙනෙන්නට තිබුනේ ය. එහෙත් ඔහුගේ ක්‍රියා වලින් ජාතියක් පිඹිදුනේය. එපමණක් නොව ඔහුගේ අනුගාමිකයෝ ආක්‍රමනිකයන්ට යටත් වීමට කැමැත්තක් නොදැක්වූහ. වොලස්ගේ ඇටකටු ගිජු ලිහිනියන්ට ගොදුරුවීමටත් පෙර ස්කොට්වරු නැවතත් නිදහස උදෙසා නැගී සිටියහ..”
මෙම ස්කොට් ජාතික විමුක්ති සටනේ එක් යුගයක් වූ වොලස්ගේ නායකත්වයෙන් දියත් වූ සන්නද්ධ ජනතා අරගලය පිළිබද සිනමා පටයක් මෙල් ගිබ්සන් සිනමාකරුවා විසින් ,ඊඍ්ඪෑ ්‍යෑ්ඍඔ, නමින් නිමැයුවේය. කලාකරුවකු තම කලා කෘතියකට ඉතිහාසයෙන් වස්තුබීජයක් ලබා ගත් පලියට ඔහු ඉතිහාසඥ කාර්යභාරයක් ඉටු කළ යුතු යයි කිව නොහැකිය. නමුත් තමන් ජීවත්වන කාලයේ සීමාවන්ට හා තම සංකල්පයන්ට ගැලපෙන පරිදි එකි වස්තු බීජය උකහා ගත් ඓයිතිහාසික පරිච්ඡේදය සමස්ථයක් ලෙස නොගෙන ඉන් එක් පාර්ශවයක් තම කෘතියෙන් ඉදිරිපත් කිරීම මගින් ඓයිතිහාසික යුගයකට සාධාරණය ඉෂ්ඨ නොවනවාක් මෙන්ම නව තරුණ පරපුර වැරදි වැටහීම් කරා තල්ලූවී යෑමේ අනතුර පවතින බවද වටහා ගත යුතු වෙයි. තම කෘතිය මගින් විලියම් වොලස්ගේ සටන්කාමී චරිතය එය බිහිකිරිමට මග පෑදු සමාජ අරගලයේ මධ්‍යයේ තබා නිර්මාණය කිරීම මෙල් ගිබ්සන්ගේ සිනමාවේ විශිෂ්ඨත්වයයි. ඒ මගින් තමන්ද වොලස්ගේ විමුක්ති අරගලයේ බලය වූ ජනතා මිලීෂියාවේ කොටස්කරුවන් බවට හැගෙන තැනට ප්‍රෙක්ෂකයන් පත්කෙරෙයි. තමන් මරා දැමීමට පෙර පෝරකය මතදී වොලස් .ත්‍ඍෑෑෘධඵ. යි නගන කාහල නාදය ප්‍රේක්ෂකයාගේ හදවත් තුලින්ද නැගෙන්නා සේය. එසේ ඉතිහාසයේ කොටස්කරුවකු බවට පත් කෙරෙමින් ඔහුගේ සමාජ විඥානය ඉහලට ගෙනෙයි. එසේ ප්‍රේක්ෂකයා ඒ ඓතිහාසික යුගයේ කොටස්කරුවකු බවට පත්කරමින් ඔහුගේ සමාජ විඥානය ඉහලට ගෙනෙයි.
දැන් ලාංකීය තත්කාලීන සමාජ අරගලයේ ප්‍රධාන පෙලේ නායකයකු වන රෝහණ විජේවීරගේ චරිතය මුල්කර නිමවා ඇති සිනමාව කරා පැමිනෙමු. සිනමා කරුවා එය ‘ගින්නෙන් උපන් සීතල’ යි නම් කර තිබේ. එහි සිනමා කරුවාගේ සිතේ පැවැති අරුත කුමක්ද? සමාජ අරගලය ගින්න නම් ඉන් උපන් සීතල විජේවීරගේ චරිතයද? කෙසේ වෙතත් මේ සිනමාව මෑතකාලීන මුත් සමාජ අරගල ඉතිහාසයේ එක් යුගයක් හා බැඳී තිබීම මගහැර යාමට කිසිවකුට නොහැකිය. සැබැවින්ම රෝහණ විජේවීර යනු සමාජ අරගලයේ මෑත ඉතිහාසයේ යුගයක් විසින් නිර්මිත නායකයෙකි. කොපමණ බැරෑරුම් දේශපාලන වෙනස්කම් අප අතර පැවැතුනත් එම සත්‍යය අහෝසි නොවන්නේය.
එසේ රෝහණ විජේවීර සමාජ අරගලයේ ප්‍රකාශනයක් විනා හුදු පුද්ගලයෙක් නොවේ. එම අරගලයේ ප්‍රකාශකයා ලෙස ඔහු කළ වැඩ කොටස ඔහුගේ චරිතයේ පදනමයි. නමුත් මේ සිනමාව ඔහුගේ චරිතය එකී වෛශයික පදනමෙන් එලියට ගෙන තිබේ. ඔහු නියෝජනය කළ මේ ධනපති සමාජ ක්‍රමය විසින් පිටස්තරයන් බවට පත් කළ සිංහල තරුණ තරුණියන්ගේ වෛරය මෙහි කිසිම අයුරකින් මූර්තිමත් නොවේ. කිසියම් පිරිසක් රැජිනගේ ආණ්ඩුවට එරෙහිව කැරලි ගසා එම ආණ්ඩුව පෙරලීමට වැර දැරූ නිසා අපරාධ යුක්ති විනිශ්චය කොමිෂන් සභාව එහි නායකයන් සිරගත කරයි. ජේග ආර් බලයට පැමිණ 1977 නොවැම්බර් 02 දා මේ පිරිස නිදහස් කරයි. දැන් මේ තීරණයට බලපෑ සමාජ සම්බන්ධතා මොනවාදැයි නොපෙනේ.
සිනමාකරුවා මග හරින්නේ කම්කරු පංතියේ 1976-1977 වර්ජන රැල්ල නිසා පැවැති පාලනය ඇර්බූදයට යමින් හදිසි නීතිය ඉවත්වී යෑමත්, ඒනිසා ජවිපෙට පනවා තිබූ තහනම අහෝසිවී එය යලිත් විවෘත දේශපාලනයට එළැඹීය යන ඓතිහාසික කරුණයි. අනතුරුව ජේ.ආර්.ගේ මහා පරිමාණ මැතිවරණ ජයග්‍රහණය නොතකා ඔහුගේ සමාජ ආර්ථික ප්‍රතිපත්තීන්ට එරෙහිව කම්කරු පංතිය ගෙන ගිය දැවැන්ත අරගලය කොතැනකවත් දක්නට නැත. දඬුවම් දෙනු ලදුව සිරගෙදර සිටි ජවිපෙ නායකයන් නිදහස් කිරීමේ සැබෑ අරුත එනිසා එලි නොවේ. නැගෙන කම්කරු අරගලයට විරුද්ධව මේ ගැමි තරුණ බලවේගය යෙදවීම ඔහුගේ ප්‍රධාන අරමුණ විය. 1980 මහා වැඩ වර්ජනයේ දී ඔහුගේ මේ උපාය යස රගට වේදිකා ගතවීය. විජේවීරගේ එම වැඩ කොටස සිනමා පටය තුළ මගහැර තිබේ. විජේවීර නායකත්වය මේ මහා වැඩවර්ජනය තම පක්ෂයට එරෙහි කුමන්ත්‍රණයක් ලෙස හඳුන්වා පාවා දීම නිසා ඔහුගේ භාර්යාවගේ ලොකු අයියා වූ යූත එන්. ප්‍රනාන්දු පක්ෂය හැර යමින් තමන් සභාපති පදවිය දැරූ ලංකා ගුරු සංගමය වැඩවර්ජනයට එක් කිරීමට තීන්දු ගත්තේය. මෙම පාවාදීම ජේ.ආර්.ට වැඩවර්ජනය තලා දැමීමට පහසුකම් සැපයීය.
විජේවීර ඇමතූ ප්‍රථම රැලියට පැමිණි විශාල ජනකාය නිරූපනය කළේ කුමක් ද? 1971 ගැමි තරුණ කැරැල්ල එහි දේශපාලනයේ හා සටන් උපායයන්හි පැවැති අති මහත් දෝෂයන් එසේ තිබියදී මුත් සභාගවාදයෙන් හෙම්බත්ව සිටි නව තරුණ පරම්පරාවක් දේශපාලන භූමියට ඇද ගැනීමට සමත් වූ අතර සමාජවාදය-විප්ලවය ආදිය හුදු මතිභ්‍රමයක්ම නොව යථාර්තයක් විය හැක්කක්ය යන හැගීම ඉන් යලි ශක්තිමත් වීමය. සභාග ආණ්ඩුව තුළ පරස්පරයන් මේරවීමටද මේ කැරැල්ල සාධකයක් විය. විජේවීරගේ පළමු රැලියට ගලා ආවේ මේ බලාපොරොත්තුවයි. නමුත් ඒ ගැන කිසිම හැගවීමක් සිනමාව තුළ ඇත්තේ නැත.
දැන් මේ නව අපෙක්ෂාවන් ඉදිරියට ගෙන යෑමට විජේවීර කළ කී දේ කුමක් ද? තමන් තුන්වන බලවේගය විය යුතුබව ඔහු කියයි. ඒ මැතිවරණ මට්ටමේ දී බව පෙනෙන්නේ ගාල්ල අතුරු මැතිවරණයේ දී හා ජනාධිපතිවරණයේ දී ඔහුගේ ක්‍රියාකලාපය මගිනි. ඒ අනුව කැරලිකාර චරිතයක් මැතිවරණවාදී පුද්ගලවාදී චරිතයක් විනිද? 1971 කැරැල්ලෙන් පසු සිරගෙදර ගත කළ කාලයේ දී ලංකාවේ ජාතික ප්‍රශ්නය අරබයා ඇති කරගත් ජාතීන්ගේ ස්වයංතීරණ අයිතිය පිලිගනිමින් ගත් මාක්ස්වාදි ස්ථාවරයන් ලයනල් බෝපගේ හා පොඩි රත්නේ වැනි අයගේ විරුද්ධත්වය මැද අත්හැර දැමීම සිංහල ඡන්ද ලබා ගැනීිම සදහා ගත් පියවරක්ද? නව යොවුන් යුවතියක් ඇගේ අකමැත්ත නොතකා පක්ෂ සාමාජිකයන් වූ ඇගේ වැඩිමල් සහෝදරයන් යොදා ගෙන විවාහ කරගැනීම කාන්තාවාදය වෙනුවට පුද්ගලවාදය හිසට නැගීමේ අංගයක් ද?
අනතුරුව උතුරේ ජනතාවගේ විමුක්ති අරගලයේ තීව්ර වීම. 1983 ජූලියේ සිංහල ජාතිවාදින් දෙමළ ජනතාවට එල්ල කළ දරුණු ප්‍රහාරය, පක්ෂ තහනම, වනාන්තරවල සැගවී ගැන්ම, උතුරේ “බෙදුම්වාදී ත්‍රස්තවාදයට” එරෙහි අරගලය ලෙසින් සිනමාව කට්ටියෙන් කට්ටියට පනිමින් යයි. සිංහල තරුණ කැරළිකාරීත්වය හා දෙමළ තරුණ කැරළිකාරීත්වය එකම සමාජ අරගලයක කොටස් ලෙස මේ චරිතය නොතකන්නේ ඇයි? මේ සිදුවීම් තුළදී කම්කරු පංති ව්‍යාපාරයේ ශක්තිය කොතැනකවත් නොපෙනේ. මේ චරිතය එම අරගලයන් ගැන කිසිවක්
කියන්නේ නැත. විශේෂයෙන් 1986 දී එකල පැවැති වෘත්තීය සමිති ඒකාබද්ධ කමිටුව විසින් කැදවූ මහා ජාතික කම්කරු සමුලුවත්, ඒ මගින් උතුරේ හමුදා පාලනය නිමාකර උතුරෙන් සන්නද්ධ හමුදාවන් ආපසු කැඳවීමට බලකරමින් සම්මත කළ යෝජනාවත්, එයට එරෙහිව ජවිපෙ වෘත්තීය සමිති මෙම සමුලුව වර්ජනය කිරීමත්, සිනමා කරුවාට මෙම චරිතය තුලින් මුන නොගැසීම විශ්මයජනකය. කම්කරු පංතියේ මේ ක්‍රියාකාර්ත්වය තුළ විජය කුමාරතුංග නායකත්වයෙන් මහජන පක්ෂය ගොඩනැගී ඒ මැදිකරගත් වමේ පක්ෂ වල එකතුවක් බිහිවීම
හා ඒ මගින් දෙමළ ජනතාවට දේශපාලන විසඳුමක් දීම මුල් කර ගෙන ගිය දැවැන්ත උද්ඝෝෂණයන් හා පලාත් සභා ක්‍රමය යම් මට්ටමක හෝ සහනයක් දෙමළ ජනතාවට ලබා දෙනු ඇතැයි සලකා එය ආරක්ෂා කිරිමට පියවර ගැනීමත් සිනමා කරුවාගේ ඉතිහාසයේ නැත.
විජේවීරගේ චරිතයේ ප්‍රමුඛතම අංගයක් වන විජය ප්‍රමුඛ වම ගත් ප්‍රජාතන්ත්‍රවාදී පියවරයන් පරාජය කිරීම සඳහා වාමාංශිකයන්ට එරෙහිව ගෙන ගිය “දේශප්‍රේමී” ඝාතන ව්‍යාපාරය සිනමාකරුවා මගහරින්නේ ඇයි? සමාජ අරගලයේ විවිධ සමාජ පංතීන් හා පංති තීරු වෙනස් සටන් පාඨ මුල්කර ගනිමින් වෙන වෙනම සටන් කරන්නා සේ පෙනිය හැකි මුත් ඒවායේ අන්තර සම්බන්ධතාවය තුලින් ඉතිහාසය දැකීමට සිනමා කරුවා දක්වන අසමත් කම මෙහි දී කැපී පෙනේ. එම අසමත් කම විජෙවීර චරිතය එක්තරා ගන්ධබ්බ තත්ත්වයකට ගෙන ඒම දෙවන කැරැල්ල දියත් වන මොහොතේ සිටම කැපී පෙනෙයි.
පළමු කොටසේ නිමාව
රණත් කුමාරසිංහ – opiumaleft.com
Facebook Comments
