යාපනයේ පිහිටි පලාලි ගුවන් තොටුපලේ සංවර්ධන කටයුතු සදහා දෙමළ ජනයාගේ පෞද්ගලික ඉඩම් අත්පත්කරගැනීමේ උත්සාහයක් දියත් වන බවට ප්‍රදේශවාසී ජනයා චෝදනා කරයි.
වලිකාමම් උතුර ප්‍රාදේශිය සභාවේ හිටපු සභාපති එස්. සුගීර්දන් පවසන්නේ ආරක්ෂක අංශ විසින් බලහත්කාරයෙන් අත්පත්කරගත් ඉඩම් අක්කර දහස් ගණනක් නිදහස් කිරීමට තවදුරටත් ඉතිරිව තිබියදී, මීට පෙර නිදහස් කළ ඉඩම් වලින් අක්කර 500 ක් යළි පවරා ගැනීමේ උත්සාහයක් දියත් වන බවයි.
“වලිකාමම් උතුරේ තවත් ඉඩම් අක්කර 3000ක් නිදහස් කරන්න තියනවා. එම ඉඩම් නිදහස් කරන්න කියලා විරෝධතා කීපයක්ම පැවැත්වුනා. ජනාධිපති මේක නිදහස් කරන්න කටයුතු කරන බව කියලා තියෙද්දී විශේෂයෙන්ම කුරුම්බසිට්, කට්ටුවාන්, කට්ටුවාන් බටහිර, කුප්පිලාන් උතුර, නිදහස් කළ ප්‍රදේශවල තවත් ඉඩම් අක්කර 500 ක් ගන්න මිනින්දෝරු දෙපාර්තමේන්තුව උත්සාහ කරනවා. ඒ ඉඩම් මිනිස්සු ජීවත් වෙන ප්‍රදේශ නිසා ග්‍රාම සේවක මහත්වරුත් කීප දෙනෙක් මේකට විරුද්ධ වෙලා තියනවා. වහාම මේක නතර කළ යුතුයි.“
මෙම ඉඩම් අත්පත් කරගැනීමේ උත්සාහය සම්බන්ධයෙන් කන්කසන්තුරේ වලිකාමම් උතුර ප්‍රාදේශීය ලේකම් කාර්යාලයේ ජනවාරි 30 වැනිදා පැවැති සම්බන්ධීකරණ කමිටු රැස්වීමේදී ප්‍රදේශයේ සිවිල් සමාජ ක්‍රියාධරයන් ඇතුළු පිරිස ප්‍රාදේශීය ලේකම්වරයාගෙන් ප්‍රශ්න කර ඇති අතර ඔහු පවසා ඇත්තේ තමන් ඒ සම්බන්ධයෙන් දැනුවත් නොමැති බවයි.
මිනින්දෝරු දෙපාර්තමේන්තුවේ නිලධාරීන් පැමිණ තම ප්‍රදේශයේද ඉඩම් මැනීමේ කටයුතු සිදු කළ බව කුරුම්බසිට් ප්‍රදේශයේ ජනතාව එහිදී පවසා ඇත.
ප්‍රදේශයේ ග්‍රාම නිලධාරීන් හා ප්‍රාදේශීය ලේකම්වරයාගේ අනු දැනුමකින් තොරව මිනින්දෝරු දෙපාර්තමේන්තු නිලධාරීන් ඉඩම් මැනීමට නොපැමිණෙන බව පෙන්වා දෙන එස්. සුගීර්දන් චෝදනා කරන්නේ ප්‍රාදේශීය ලේකම්වරයා ජනතාවට අසත්‍ය පවසන බවයි.
පලාලි ගුවන් තොටුපළට යාබද ජනතාවගේ ඉඩම්වල ගුවන් තොටුපලේ නාමයෙන් හමුදාව ගොවිතැන් කටයුතු සිදු කරන අතර එයද නැවැත්විය යුතු බව වලිකාමම් උතුර ප්‍රාදේශිය සභාවේ හිටපු සභාපති එස්. සුගීර්දන් වැඩි දුරටත් අවධාරණය කරයි.
Facebook Comments
