ආණ්ඩුවේ ඇමැතිවරුන්ගේ ඔලිම්පික් සවාරියේ වියදම් ගැන දෙබිඩි කතා (VIDEO)

0

ක්‍රීඩා ඇමති ඇතුළු ඇමතිවරුන්ගේ ජපන් සංචාරය ගැන ආණ්ඩුවේම ඇමතිවරු අතර එකිනෙකට පරස්පර විරෝධී ප්‍රකාශ නිකුත් වී තිබේ.

මාධ්‍යවේදියෙකුගේ ප්‍රශ්න කිරීම හමුවේ කැබිනට ප්‍රකාශක අමාත්‍යය කෙහෙළිය රඹුක්වැල්ල කියා සිටියේ ජපානයේ ටෝකියෝ නුවර පැවැත්වෙන ඔලිම්පික් උලෙළ නැරඹීමට ආණ්ඩුවේ ඇමතිවරු ගියේ පෞද්ගලික ව්‍යාපාරික අනුග්‍රහයෙන් බවය.

රට ආර්ථික අර්බුදයකට මුහුණ දී සිටින මෙවන් මොහොතක රජයේ සියලුම අමාත්‍යංශ වල වියදම් සිමා කරන්නැයි මුදල් අමාත්‍ය බැසිල් රාජපක්ෂ විසින් ඉල්ලා ඇති විටක ඔලිම්පික් තරඟ නැරඹීම සඳහා ආණ්ඩුවේ අමාත්‍යවරු සිව් දෙනෙක් සහභාගිවන්නේ මන්දැයි එම මාධ්‍යවේදියා ප්‍රශ්න කළේය.

නිල කැබිනට් ප්‍රකාශක ගේ ප්‍රකාශය ප්‍රතික්ෂේප කරන පළාත් සභා හා පළාත් පාලන රාජ්‍ය අමාත්‍යය රොෂාන් රණසිංහ ජපානයේ සිට පවසන්නේ ගුවන් ටිකට් පත් හා ජපානයේ රැඳී සිටින කාලය තුළ වන වියදම් තමා විසින් පෞද්ගලිකව දරා ගන්නා බවය.

එසේ නොමැතිව අමාත්‍ය රඹුක්වැල්ල පවසන පරිදි රජයේ හෝ පෞද්ගලික අනුග්‍රාහක මුදල් භාවිත නොකළ බව රාජ්‍ය ඇමති කියා සිටි බව පළාත් සභා සහ පළාත් පාලන රාජ්‍ය අමාත්‍යංශය නිකුත් කළ නිවේදනයේ සඳහන් වේ.

මේ අතර ක්‍රීඩා අමාත්‍ය නාමල් රාජපක්ෂ සිය ට්විටර් ගිණුමේ සටහනක් තබමින් ප්‍රකාශ කර තිබුනේ සිය පෞද්ගලික මුදලින් ඔලිම්පික් නැරඹීමට ජපන් සංචාරයට එක් වූ බවයි.

ජපානයේ ටෝකියෝ නුවර පැවැත්වෙන ඔලිම්පික් තරඟාවලිය නැරඹීම සදහා ක්‍රීඩා අමාත්‍ය නාමල් රාජපක්ෂ සමඟ රාජ්‍ය අමාත්‍යවරුන් වන තේනුක විදානගමගේ, ඩී.වී චානක, සහ රොෂාන් රණසිංහ එක්ව සිටී.

මෙවර ඔලිම්පික් උළෙල සඳහා ලංකාව නියෝජනය කරමින් ක්‍රීඩක ක්‍රීඩිකාවන් අට දෙනෙක් සහභාගී වෙයි.

රජයේ මැති ඇමතිවරුන් වංචා දුෂණ වැලැක්වීමට විවිධ රටවල ව්‍යාපෘති ක්‍රියාත්මක කරන ජාත්‍යන්තර රාජ්‍ය නොවන සංවිධානයක් පවසන පරිදි ඇත්ත හෙළි කර ගත හැකි වන්නේ පාර්ලිමේන්තුවේ අධීක්ෂණයක් පවත්වාගෙන යාමෙනි.

‘’පුද්ගලික අංශයේ අනුග්‍රාහකයන්” හරහා තවත් ඇමතිවරුන් තිදෙනකු ඔලිම්පික් උළෙලට යන පුවත විසින් අපට සිහිපත් කරනුයේ පාර්ලිමේන්තුවේ පවත්වාගෙන යනු ලබන බැඳියාවන්ගේ ලේඛනයක (register of interests) අවශ්‍යතාවයයි. එවිට එවැනි ත්‍යාගශීලී උපකාර ලබා දෙන්නේ කවුරුන්දැයි යන්න දැනගත හැකි අතර, ඒවා කවදා හෝ ආපසු ගෙවා තිබේද යන්නත් සොයා ගත හැකිය. අවංකවම එය පෞද්ගලික අංශයේ ආයතන සහ මන්ත්‍රීවරු ආරක්ෂා කිරීමට ද ඉවහල් වනු ඇත. එවැනි බැන්දියාවන්ගේ ලේඛණයක් මගින් තොරතුරු හෙළි කරන්නේ නම් ඊට කිසියම් නිත්‍යානුකුල බවක් හිමිවේ. ඒවා කූඨ ගනුදෙනු ලෙස හුවා දක්වන වැරදි වාර්තාකරණය ද මේ මගින් අවම කරනු ඇත,’’ යනුවෙන් ට්‍රාන්ස්පේරන්සි ආයතනයේ කොළඹ කාර්යාලයේ විධායක අධ්‍යක්‍ෂක අශෝක ඔබේසේකර ට්විටර් සටහනක් තබා තිබේ.

Facebook Comments

wedding people