ව්‍යවස්ථා අර්බුදයක් නිර්මාණය කිරීම හරහා ශ්‍රී ලංකාව තුළ ප්‍රජාතන්ත්‍රවාදය දැඩි අවධානමකට ලක්ව ඇතැයි ජාත්‍යන්තර ප්‍රජාතාන්ත්‍රිකයන්ගේ සංගමය පවසනවා.
ආසියාවේ ඉපැරණිතම ප්‍රජාතන්ත්‍රවාදී ක්‍රමය සහිත රටක් ලෙස නීතියේ ආධිපත්‍යය සහ දූෂණයට එරෙහි ක්‍රියාදාමයන්ට එය බාධාවක් බවයි එම සංගමයේ සභාපති ස්ටීවන් හාර්පර් නිවේදනයක් නිකුත් කරමින් කියා සිටි.
රනිල් වික්‍රමසිංහ ප්‍රමුඛ නීත්‍යානුකූලව බලයට පත්වූ රජය වහා බලයේ පිහිටුවිය යුතු බවද ජාත්‍යන්තර ප්‍රජාතාන්ත්‍රිකයන්ගේ සිය නිවේදනයෙන් අවධාරණය කර තිබේ.
එමෙන්ම පාර්ලිමේන්තු වහා කැඳවා මහජන නියෝජිතයන්ට සිය කාර්යයන් නිසිලෙස කරගෙන යාමට අවස්ථාව සැලසිය යුතු බවයි එම සංගමය ඉල්ලා සිටින්නේ.
වත්මන් ව්‍යස්ථා අර්බුදය විසඳිය හැක්කේ පාර්ලිමේන්තු ක්‍රමය යටතේ පමණක් බවයි ජාත්‍යන්තර ප්‍රජාතාන්ත්‍රිකයන්ගේ සංගමය පෙන්වා දී ඇත්තේ.
ප්‍රචණ්ඩත්වයෙන් මිදී නියමිත ව්‍යවස්ථාමය ප්‍රතිපාදන යටතේ මෙම ගැටලුව විසඳාගන්නා ලෙසට ජාත්‍යන්තර ප්‍රජාතාන්ත්‍රිකයන්ගේ සංගමය වැඩි දුරටත් ශ්‍රී ලංකාවෙන් බලධාරින්ගෙන් ඉල්ලා සිටී.
මේ අතර පාර්ලිමේන්තුව කල් තැබීම හරහා ශ්‍රී ලංකාව තුළ අනවශ්‍ය අර්බුදයක් නිර්මාණය වී ඇති බවට ජාත්‍යන්තර නීතිවේදීන්ගේ කොමිසම නිවේදනයක් නිකුත් කරමින් පෙන්වා දී ඇත.
උද්ගතව ඇති දේශපාලන අර්බුදය විසඳා ගැනීමට වහා පාර්ලිමේන්තුව කැඳවන්නැයි එම කොමිසම ජනාධිපතිවරයාගෙන් ඉල්ලා තිබේ.
19 වන ව්‍යවස්ථා සංශෝධනය හරහා අග්‍රාමාත්‍යවරයාට අයත් බලතල පැහැදිලිව දක්වා ඇති බැවින් ඊට අනුව කටයුතු කරන ලෙසට ද ජාත්‍යන්තර නීතිවේදීන්ගේ කොමිසම ජනපතිට දන්වා ඇත.
Facebook Comments
