හොර වැලි ජාවාරමක් වාර්තා කරන්නට ගිය මාධ්‍යවේදියකුට මරණ තර්ජන

යුද පීඩිත මුලතිව් දිස්ත්‍රික්කයේ සිදු වන වැලි ජාවාරමක් වාර්තාකරණයේ යෙදී සිටි ප්‍රදේශයේ ජ්‍යෙෂ්ට දෙමළ මාධ්‍යවේදියකුට පහර දී මරණ තර්ජන කළ දෙදෙනකු අත් අඩංගුවට ගෙන තිබේ.

මුලතිව් මාධ්‍ය සමාජයේ හිටපු සභාපති ද වන ශන්මුගම් තවසීලන් 2025 පෙබරවාරි 15 වැනිදා තමන්ට එල්ල වු මරණ තර්ජනය හා පහරදීම සම්බන්ධයෙන් මාන්කුලම පොලීසියට පැමිණිලි කර ඇත්තේ තමන්ට මරණ තර්ජනය කළ දෙදෙනාගේ ඡායාරූප හා ඔවුන් පැමිණි NP BFR 8429 අංකය දරන යතුරුපැදියේ විස්තරද පොලීසියට ලබා දෙමිනි.

මාධ්‍යවේදීයා පවසන්නේ මුලතිව් දිස්ත්‍රික්කයේ මාන්කුලම් පොලිස් බල ප්‍රදේශයේ පනික්කන්කුලම්, කිලවන්කුලම්, පදිනෙට්ටාම්පෝර් ඇතුළු ප්‍රදේශයන්හි A 9 මාර්ගයේ දෙපස කැලැව තුළ නීති විරෝධි වැලි කැනිම් සිදු වන බවට තමන්ට දැනගන්නට ලැබුණු බවයි.

එම වැලි හෑරීම සඳහා කිසිදු නෛතික අවසරයක් නැති බව ප්‍රදේශයේ ඉඩම් බලධාරීන් තහවුරු කර ඇත.

ඒ සම්බන්ධයෙන් වාර්තා කිරීම සදහා 2025 පෙබරවාරි 15 වැනිදා පදිනෙට්ටාම්පෝර් ප්‍රදේශයේ නිති විරෝධි ආකාරයෙන් වැලි කැනීම් කරන ස්ථානයට ගිය මාධ්‍යවේදියා විඩියෝ දර්ශන ලබා ගනිමින් සිටි ජංගම දුරකතනයට පහර දී ඇති ජාවාරම් කරුවන් දෙදෙනා මාධ්‍යවේදියාගේ හැඳුනුම්පතද ඉල්ලා තිබේ.

ඔවුන් දෙදෙනා හැදුනුම්පත පරීක්ෂා කරමින් සිටියදී මාන්කුලම පොලීස් ස්ථානාධිපතිට ඇමතුමක් ලබා ගත් මාධ්‍යවේදී ශන්මුගම් තවසීලන් තමන් මුහුණ දී සිටින තත්වය සම්බන්ධයෙන් දැනුම් දී ඇති අතර ඔහුගේ මාධ්‍ය හැදුනුම්පත ආ පිට ලබා දී ඇති ප්‍රහාරකයන් දෙදෙනා යතුරු පැදියෙන් එම ස්ථානයෙන් පිටව ගොස් ඇත්තේ මාධ්‍යවේදියා මරා දමන බවට තර්ජනය කරමිනි.

ඒ මොහොත වන විට වැලි පටවමින් තිබු ට්‍රැක්ටර් රථයක ද එම ස්ථානයෙන් රැගෙන යාමට ඔවුන් කටයුතු කර ඇති අතර ඔවුන් පිටව යාමෙන් පසු පොලිස් නිලධාරීන් එම ස්ථානය සමිපයේ පිහිටි A 9 මාර්ගය වෙත පැමිණ තිබේ.

එදිනම හවස මාන්කුලම් පොලිස් ස්ථානය වෙත ගිය මාධ්‍යවේදියා තමන්ට සිදු කළ පහරදීම හා මරණ තර්ජනය සම්බන්ධයෙන් පොලීසියට පැමිණිලි කර ඇත.

2020 දැව ජාවාරම් කරුවන් පහරදීම

මුලතිවු දිස්ත්‍රික්කයේ නීතිවිරෝධී තේක්ක දැව ජාවාරමක් ගවේෂණය කරමින් සිටි කනපතිපිල්ලෙයි කුමනන් සහ ශන්මුගම් තවසීලන් යන දෙමළ මාධ්‍යවේදීන් දෙදෙනාට 2020 වසරේ ඔක්තෝබර් 12 වැනි දා දැව ජාවාරම් කරුවන් විසින්ද අමානුෂික ලෙස පහර දී තිබුනි.

දූෂිතයන් හෙළිදරව් කිරීමට කටයුතු කළ මාධ්‍යවේදීන් දෙදනා අපරාධකරුවන්ගේ ඉලක්ක බවට පත් වූ ආකාරය වන්නි දිස්ත්‍රික් ඉලංකෙයි තමිල් අරසු කච්චි මන්ත්‍රී (ITAK) තුරෙයිරාසා රවිහරන් 2025 පෙබරවාරි මාසයේදීත් පාර්ලිමේන්තුවේ සිහිපත් කර තිබුනි.

“මුලතිව් දිස්ත්‍රික්කයේ අනවසරයෙන් ගස් කැපීම් හෙළිදරව් වුනාම, ඒ ගැන ප්‍රවෘත්ති එකතු කරන්න ගිය මාධ්‍යවේදීන් වන කනපතිපිල්ලෛ කුමනන් සහ ෂන්මුගම් තවසීලන් යන අයට හොර ලී ජාවාරම්කරුවන් පහර දුන්නා.”

ආරක්‍ෂක අංශ වලින් සිදු කරනු ලබන බිය ගැන්වීම්, මරණ තර්ජන සහ පහරදීම් ද නොතකා, දිවයිනේ වඩාත්ම මිලිටරිකරණය වූ ප්‍රදේශයේ, රාජ්‍ය අනුග්‍රහය සහිතව සිදු කරනු ලබන අපරාධ ඇතුළු දෙමළ ජනයා මුහුණ දී සිටින ගැටළු සම්බන්ධය‍ෙන් මාධ්‍යවේදී ෂන්මුගම් තවසීලන් වාර්තාකරණයේ නියැල‍ී සිටි.