පරිස්සමින් පරිහරණය කරන බවට ආණ්ඩුව විසින් සහතික කරන ලද ත්‍රස්තවාදය වැළක්වීමේ පනත (PTA) යොදාගෙන පොලිසිය විසින් යුද පීඩිත කිලිනොච්චියේ පාසල් ගුරුතුමකු කොළඹ පිහිටි ත්‍රස්ත මර්දන සහ විමර්ශන කොට්ඨාසයට යළිත් වරක් කැදවා තිබේ.
කිලිනොච්චිය, කෝනාවිල් දෙමළ මහා විද්‍යාලයේ ඉන්නාසිමුත්තු සත්‍යසීලන් ගුරු පියාට 2025 පෙබරවාරි 17 වැනිදා උදෑසන 9.30 ට කොළඹ 01 පිහිටි ත්‍රස්ත මර්දන සහ විමර්ශන කොට්ඨාසයට පැමිණෙන ලෙස දැනුම් දී ඇත්තේ ඔහුගෙන් 2024 දෙසම්බර් මස 11 වැනිදා ලබා ගත් කට උත්තරයක් සම්බන්ධයෙන් වැඩි දුරටත් විමසීම සදහාය.
2024 මාර්තු 14 වැනිදා කෝනාවිල් දෙමළ මහා විද්‍යාලයේ පැවැති නිවාසාන්තර මලල ක්‍රීඩා උත්සවයක් වෙනුවෙන් සකස් කළ නිවාසයක ද්වාරය ලෙස ශ්‍රී ලංකා සිතියමක, දෙමළ ජනයා ජීවත් වන ප්‍රදේශ සංකේතවත් කරමින් කළ නිර්මාණයක් භාවිතයට ගෙන තිබුනි.
ත්‍රස්ත පොලීසිය ඉන්නාසිමුත්තු සත්‍යසීලන් ගුරු පියාට දැනුම් දී ඇත්තේ 2025 පෙබරවාරි 17 වැනිදා ත්‍රස්ත මර්දන සහ විමර්ශන කොට්ඨාසයේ මුලස්ථානයට පැමිණෙන විට නිවාසාන්තර මලල ක්‍රීඩා උත්සවයේදී නිවාසයක ඊලාම් සිතියමක ආකෘතිය සහ සහ කනගපුරම් සුසාන භුමියේ ද්වාරයේ ආකෘතිය සකස් කිරීමට උදව් කළ සිසුන්ගේ නාම ලේඛනයද රැගෙන පැමිණෙන ලෙසයි.
කිලිනොච්චිය, කෝනාවිල් දෙමළ මහා විද්‍යාලයේ ඉන්නාසිමුත්තු සත්‍යසීලන් ගුරු පියා චෝදනා කරන්නේ ත්‍රස්ත මර්දන හා විමර්ශන කොට්ඨාශ (CTID) යේ පරන්තන් ඒකකයේ නිලධාරීන් දෙදෙනෙකු 2025 ජනවාරි 20 වැනිදාත් සිය පන්ති කාමරය අසලට කඩා තමන්ට තර්ජනයද කළ බවයි.
“ඔබ නැවත කොළඹට ගෙන්නන්න වෙනවා. අප ඉල්ලා සිටින තොරතුරු ඔබ අපට ලබා දිය යුතුයි. සහයෝගයෙන් කටයුතු කළ යුතුයි. නැතිනම් අත්අඩංගුවට ගන්න වෙනවා කියලා එයාලා කිව්වා. මම කිව්වා මම කිසිම අපරාධයක් කළේ නැහැ. ඔබ යම් ක්‍රියාමාර්ගයක් ගත්තොත් මගේ මූලික අයිතිවාසිකම් කඩවන බවට පැමිණිලි කරන්න වෙනවා කියලා. මම ඔහුට කිව්වා මගේ ආරක්ෂාව සඳහා මට නීතිමය පියවර ගන්න වෙනවා කියලා.”
2024 මාර්තු 14 වැනිදා කෝනාවිල් දෙමළ මහා විද්‍යාලයේ පැවැති නිවාසාන්තර මලල ක්‍රීඩා උත්සවයක් වෙනුවෙන් සකස් කළ නිවාසයක ආකෘති සම්බන්ධයෙන් ප්‍රශ්න කිරීම සදහා ත්‍රස්ත පොලිසිය විසින් විදුහල්පතිවරයා, ගුරුවරුන් මෙන්ම සිසුන් ද පසුගිය සමයේ අවස්ථා කිහිපයකදී පොලීසියට කැඳවා දිගින් දිගටම ප්‍රශ්න කර තිබු බවයි පළාත් බද වාර්තා කරුවන් පවසන්නේ.
ඉන්නාසිමුත්තු සත්‍යසීලන් ගුරු පියා අවධාරණය කරන්නේ 2024 දෙසැම්බර් 11 වැනිදා කොළඹ පිහිටි ත්‍රස්ත මර්දන හා විමර්ශන කොට්ඨාශ (CTID)යේ මුලස්ථානය වෙත තමන් කැදවු නිලධාරීන් එදින පැය 10 ට ආසන්න කාලයක් තමාගෙන් ප්‍රශ්න කළ බවයි.
ත්‍රස්ත මර්දන හා විමර්ශන කොට්ඨාශ එදින දිගින් දිගටම ගුරුතුමාගෙන් ප්‍රශ්න කර ඇත්තේ ඔහු එල්.ටී.ටී.ඊ සංවිධානය යළි ගොඩ නැගීම වෙනුවෙන් කටයුතු කරනවාද යන්න සහ නිවාසාන්තර මලල ක්‍රීඩා උත්සවයේ ශ්‍රී ලංකා සිතියමක, දෙමළ ජනයා ජීවත් වන ප්‍රදේශ සංකේතවත් කරමින් කළ නිර්මාණය අයත් නිවාසයේ දරුවන්ගේ සහ ඔවුන්ගේ නම් සහ විස්තර ලබා දෙන ලෙසයි.
එම නිවාසයට අයත් පාසල් සිසුන්ගේ සහ ඔවුන්ගේ දෙමාපියන්ගේ නම් ත්‍රස්ත මර්දන හා විමර්ශන කොට්ඨාශ (CTID)ය වෙත ලබා දීම ඔහු එදින දැඩි ලෙස ප්‍රතික්ෂේප කර තිබේ.
පාර්ලිමේන්තුවේ සභානායක, අමාත්‍ය බිමල් රත්නායක 2025 ජනවාරි 21 දා පවසා තිබුනේ ත්‍රස්තවාදය වැලැක්විමේ පනත ඉතාම පරිස්සමෙන් පාවිච්චි කරන්නට සිදු වන බවයි.
“ඒ වගේම ත්‍රස්ත විරෝධි පනත ගැන කියන්න තියන එකම දේ තමයි ඒක අපේ අභිලාෂයවත්, ප්‍රතිපත්තියවත් නෙමෙයි, නමුත් අළුත් පනත සකස් කරගන්නකං රටේ තියන නීති අපිට ඉතාම පරිස්සමෙන් පාවිච්චි කරන්න වෙනවා. මොකද අපි ආණ්ඩුවක් කරන්න ඕන පනත් සම්මත වෙනකං.” ඔහු පවසා තිබුනි.
පළාත් බද වාර්තාකරුවන් පවසන්නේ නව රජය බලයට පත් වීමෙන් පසුත් උතුරු නැගෙනහිර දෙමළ ක්‍රියාධරයන් ත්‍රස්ත මර්දන සහ විමර්ශන කොට්ඨාසයට කැදවීම් රැසක්ම වාර්තා වු බවයි.
Facebook Comments
