පොලිසිය වෙඩි තබා මරා දැමූ දෙදෙනා ගැන නීතිඥ විරෝධය

දෙදිනක් තුල නඩු නැතිව වෙඩිතබා ඝාතනය කරන ලද තරුණයන් දෙදෙනකුගේ ආරක්ෂාව සැලසීමේ වගකීම පොලිසියට අයත් රාජකාරියක් බව ශ්‍රී ලංකාවේ නීතිඥවරුන්ගේ ප්‍රධානතම වෘත්තික සභාව පොලිස්පතිවරයාට සිහිපත් කර දී තිබේ.

“තම භාරයේ සිටින පුද්ගලයන් ආරක්ෂා කිරීම පොලීසියේ සහ රජයට පැවරුණු යුතුකමක් බව නීතිඥ සංගමයේ සභාපතිවරයා විසින් පොලිස්පතිවරයාට අවධාරණය කරන ලදී.”

ශ්‍රී ලංකා නීතිඥ සංගමයේ සභාපති ජනාධිපති නීතිඥ සාලිය පිරිස්ගේ සහ ලේකම් නීතිඥ රජීව් අමරසුරිගේ අත්සනින් යුතුව මැයි 13 බ්‍රහස්පතින්දා නිකුත් කර තිබෙන නිවේදනයක් මගින් අවධාරණය කර ඇත්තේ පොලිස් අත්අඩංගුවේ සිටි සැකකරුවන් දෙදෙනෙකු වන මෙලන් මාබුල සහ තාරක පෙරේරා ආසන්න දින තෙකක් තුලදී ඝාතනය කිරීම සිය සංගමයේ විධායක කමිටුව දැඩි ලෙස හෙළා දකින බවයි.

මෙම මරණ වලට අධිකරණමය නොවන ඝාතනවල සියලු ලක්ෂණ ඇති අතර සිය භාරයේ සිටින පුද්ගලයන්ගේ ආරක්ෂාව තහවුරු කරන ලෙසත් ශ්‍රී ලංකා නීතිඥ සංගමය රජයෙන් ඉල්ලා තිබේ.

තාරක පෙරේරා විජේසේකර හෙවත් කොස්ගොඩ තාරක 2021 මැයි 12 වන දින අපරාධ පරීක්ෂණ දෙපාර්තමේන්තුව භාරයේ සිට හදිසියේම පෑලියගොඩ විශේෂ පොලිස් ඒකකයට මාරු කිරීමත් සමග ඔහු මරා දමනු ඇතැයි ඔහු වෙනුවෙන් පෙනී සිටින නීතිඥයා බලධාරීන්ට දැනුම් දී තිබුනි.

නීතිඥ අනෝජ් හෙටිආරච්චි විසින් පොලිස්පතිවරයාට, අපරාධ පරීක්ෂණ දෙපාර්තමේන්තුවේ අධ්‍යක්ෂවරයාට, ශ්‍රී ලංකා මානව හිමිකම් කොමිෂන් සභාවට මෙන්ම ශ්‍රී ලංකා නීතිඥ සංගමයටත් සිය සේවා දායකයාගේ ජීවිත ආරක්ෂාව සම්බන්ධයෙන් ඇති බිය ලිඛිතවම දන්වා යවා තිබුනි.

ශ්‍රී ලංකා නිතීඥ සංගමය පවසන්නේ නීතිඥවරයාගේ පැමිනිල්ලට අනුව කටයුතු කරමින් ශ්‍රී ලංකා නීතිඥ සංගමයේ සභාපතිවරයා එදිනම රාත්‍රියේ පොලිස්පතිවරයාට ඒ සම්බන්ධයෙන් දැනුම් දුන් බවයි.

” තවද ශ්‍රේෂ්ඨාධිකරණය විසින් බොහෝ තීන්දු වලදී තම භාරයේ සිටින පුද්ගලයන්ගේ ආරක්ෂාව සහතික කිරීම සදහා රජය වෙත වගකීමක් පැවැරී ඇති බව නැවත නැවතත් අවධාරණය කර ඇති බවද පොලිස්පතිවරයාගේ අවධානයට යොමු කරන ලදි.”

ඊට පැය කීපයකට පසු තාරක විජේසේකර මරා දමා තිබුණි.

පෑලියගොඩ විශේෂ අපරාධ අංශයේ රදවාගෙන සිටි සැකකරු සමග ආයුධ සොයා ගැනීමට යන අවස්ථාවේදී සැකකරු පොලීසියට පහරදීමට උත්සාහ ගත් අවස්ථාවේදී ඝාතනය කර ඇති බව පොලිසිය උපුටා දක්වන ජනමාධ්‍ය වාර්තා පවසයි.

මෙම ඝාතනය සිදු වුයේ සැකකරුගේ ආරක්ෂාව සම්බන්ධයෙන් පොලිස්පතිවරයා ඇතුලු පොලීසියට දැනුම් දී තිබු අවස්ථාවකදී බව ශ්‍රී ලංකා නීතිඥ සංගමය අවධාරණය කරයි.

පෙර දිනයේ මෙයට සමාන ආකාරයකින් තවත් සැකකරුවකු ඝාතනය කිරීම සම්බන්ධයෙන්ද ශ්‍රී ලංකා නිතීඥ සංගමය සිය නිවේදනය මගින් අවධාරණය කර තිබේ.

“2021 මැයි 11 වන දින මෙලාන් මාබුල නොහොත් ඌරු ජුවා නම් තවත් සැකකරුවෙකුගේ මරණයද මෙයට සමාන ආකාරයකින් සිදුවී ඇත. ඔහුගේ මරණයට පෙර ඔහු වෙනුවෙන් පොලීසිය වෙත නීතිඥ නියෝජනයක් කරන ලද බවටද අප වෙත දන්වා ඇත.”

එවැනි මරණ නීතියේ ආධිපත්‍යට පටහැනි වන බව පවසන ශ්‍රී ලංකා නීතිඥ සංගමය එය හඳුන්වන්නේ “ශ්‍රී ලංකාවේ කීර්ති නාමයට කැළලක්” ලෙසයි.

වසර අටක් රැඳවුම් භාරයේ සිටි මාබුලගේ දිනිත් මෙලන් මාබුල මැයි 11 වනදා රාත්‍රි කාලයේදී වෙඩි තබා ඝාතනය කර තිබුනේද ඔහුගේ ජීවිත ආරක්ෂාව සම්බන්ධයෙන් දෙමාපියන් විසින් හදිසි දුරකථන ඇමතුම් අංක වලට සහ මානව හිමිකම් කොමිෂන් සභාවට දැනුම් දී තිබියදීය.

ඔහු වෙනුවෙන් පෙනී සිටීම සදහා නීතිඥ හරිෂ්ක සමරනායක එදින රාත්‍රියේදී නවගමුව පොලිස්ථානය වෙත ගොස් තිබුනත් උප පොලිස් පරීක්ෂකවරයකු ඔවුන්ට දන්වා තිබුනේ මෙලන් මාබුල සම්බන්ධයෙන් විමර්ශනයක් කිරීමට ස්ථානාධිපතිවරයා ඔහු පිටතට රැගෙන ගොස් ඇති බවයි.

සිරකරු අයිතිවාසිකම් සුරැකීමේ කමිටුවේ සභාපති නීතිඥ සේනක පෙරේරා මෙලන් මාබුලට හානියක් සිදුවිය හැකි බවට සමාජ මාධ්‍ය ඔස්සේ අනතුරු අඟවා තිබුනේ පොලිස් අත් අඩංගුවේ ඝාතන සම්බන්ධයෙන් තමන් සතු අත්දැකීම් ඇසුරෙනි.

“බුස්ස බන්ධනාගාරයෙන් ඊයේ ඇප මත නිදහස් වු දිනෙත් මෙලාන් (ඌරැ ජුවා) යන සැකකරු නැවත අත්අඩංගුවට ගෙන මෙවන විට නවගමුව පොලීසියේ රදවා තබාගෙන සිටී. ඔහුගේ නීතිඥයා පොලිසිය විමසීමේදී විමර්ශන සදහා ගෙනයාමට තිබෙන බවත් සොයා ගැනීමට තිබෙන බව දැනුම් දී තිබේ. ආයුධ සොයන්න රැගෙන ගිය බොහෝ සැකකරුවන් අවසන් ගමන් ගිය හැටි අපට අමතක නැත,” යි නීතිඥ සේනක පෙරේරා මැයි 11 දා රෑ 10.30ට මුහුණු පොතේ තැබූ සටහනකින් පවසා තිබුණි.