දිගන මුස්ලිම් විරෝධි ප්‍රහාරයෙන් පීඩාවට පත් වුවන්ට වන්දි

0

පසුගිය වසරේ දිගන දී දියත් කෙරුණ මුස්ලිම් විරෝධි ප්‍රහාරයෙන් පීඩාවට පත් වුවන්ට කඩිනමින් වන්දි ලබා දෙන ලෙස අගමැතිවරයා අදාළ බලධාරින්ට උපදෙස් ලබා දී තිබේ.

ඒ අනුව හානියට පත් දේපල සඳහා ඉතා කෙටි කලකින් වන්දි ගෙවීම් කටයුතු සිදුකරන බවයි තැපැල් සේවා හා මුස්ලිම් ආගමික කටයුතු ඇමැති එම්.එච්.ඒ අබ්දුල් හලීම් පෙන්වා දෙන්නේ.

දිගන සිදුවීමට පුරා වසරක කාලයක් ගතව තිබෙන නමුත් හානියට සහ විනාශයට පත් සිය ගණන් දේපල සඳහා මෙතෙක් වන්දි නොගෙවීම් සම්බන්ධයෙන් මාධ්‍ය මගින් කළ විමසීමකදී ඇමැතිවරයා මේ බව කියා සිටියේය.

2018 දිගන හා නුවර අවට සිදුවූ සිදුවීම් මාලාවේ දී විනාශයට පත් දේපල සඳහා වන්දි ගෙවීම් කටයුතු සිදුකිරීම සඳහා වන කැබිනට් පත්‍රිකාව ඇමැති මණ්ඩලයට ඉදිරිපත් කර ඇති බවත් එම ගෙවීම් කටයුතු පිළිබඳ නිරීක්ෂණය කිරීම සඳහා අවශ්‍ය දත්ත සහ තොරතුරු මුදල් අමාත්‍යංශය ප්‍රමුඛ අදාළ සෙසු අමාත්‍යංශවලට ද යොමු කර ඇතැයි ද අමාත්‍යවරයා සඳහන් කළේය.

අදාළ අමාත්‍යංශ මගින් ප්‍රතිචාර ලද විගස ඇමැති මණ්ඩල අනුමැතිය ද සහිතව ගෙවීම් කටයුතු සිදුකිරීමට අපේක්ෂා කරන බවයි තැපැල් සේවා හා මුස්ලිම් ආගමික කටයුතු ඇමැති එම්.එච්.ඒ අබ්දුල් හලීම් වැඩි දුරටත් කියා සිටියේ.

Facebook Comments

wedding people