“යුද්ධයට වගේම ළමයි හොයාගන්නත් උදව් කරන්න” අතුරුදහන් වුවන්ගේ ඥාතීන් ජාත්‍යන්තරයෙන් ඉල්ලයි (video)

0

ශ්‍රී ලංකා රජය විසින් උතුරේ දියත් කල යුද්ධයට සහාය දැක්වුවා සේම යුද්ධය හේතුවෙන් අතුරුදහන් වු තම සමීපතමයන් සොයා ගැනීමට ද උදව්ව වන ලෙසට අතුරුදහන් කර ඇති සමීපතමයන්ගේ ඉරණම හෙළිකර ගැනීම වෙනුවෙන් වසරක් පුරා වීදියේ සටන් වැද සිටින උතුරේ ජනතාව ජාත්‍යන්තර ප්‍රජාවගෙන් ඉල්ලා සිටි.

ජනාධිපතිවරයා ප්‍රමුඛ යහපාලන රජයෙන් තමන්ට යුක්තිය ඉටු නොවු බවට චෝදනා කරන ඥාතීන් ජාත්‍යන්තර මැදිහත් වීමකින් අතුරුදහන් වුවන්ගේ ඉරණම පිළිබඳව හෙලි කරන ලසෙ ඉල්ල‍ා සිටියේ පසුගිය අවුරුද්දේ ආරම්භ කළ අඛණ්ඩ විරෝධතාවයට වසරක් සපිරෙන පෙබරවාරි 20 අඟහරුවාදා කිලිනොච්චි කන්දසාමි කෝවිල ඉදිරිපිට විරෝධතාවයේ යෙදීමිනි.

තමන් ආයුධ සන්නද්ද අරගලයක යෙදී නොසිටින බව රජයට සිහිපත් කරන විරෝධතාවයේ නිරත උතුරේ ජනයා ඉල්ලා සිටින්නේ අවසන් යුද සමයේදී යුද හමුදාවට බාර දුන් ඥාතීන් ආපසු තමන් වෙත බාර දෙන ලෙසයි.

“අපි ඉල්ලන්නේ ඊලම නොමෙයි, අපි ඉල්ලන්නෙ රට බෙදන්න නෙමෙයි, අපිට ඕනේ අපේ අතුරුදහන් කරපු දරුවෝ හමුදාවට බාර දීපු දරුවෝ ”

සංහිඳියාව කෝ?

අතුරුදහන් වුවන් සොයා ගැනීමට නීතිය ශක්තිමත් කල යුතු බව පෙන්වා දෙන අතුරුදහන් වු මාධ්‍යවේදී ප්‍රගීත් එක්නැලිගොඩගේ බිරිඳ සන්ධ්‍යා එක්නැලිගොඩ එම නිති රාමුව ගෙන ඒමට රජය අසමත් වී ඇත්තේ වත්මන් ආණ්ඩුව ද “ජාතිවාදය පෝෂණය” කරමින් සිටින නිසා බවට චෝදනා කළේය.

රටේ ජාතීන් අතර සංහිදියාව ඇති කරමින් යුක්තිය ඉටු කරන බවට රජය ජාත්‍යන්තරයට පොරොන්දු ලබා දී තිබුනත් යුක්තිය ඉටු වී ඇත්තේ කොහේදැයි ප්‍රශ්න කරන සන්ධ්‍යා එක්නැළිගොඩ රටේ සංහිදියාවක් පවති නම් තම දරුවන් ඉල්ලමින් මව්වරුන්ට පාරේ ජීවත් වීමට අවශ්‍ය නොවන බව කිලිනොච්චියේ පැවති විරෝධතාවය එක්වෙමින් කියා සිටියාය.

“විශේෂයෙන්ම ජනාධිපතිට වගකීමක් තියෙනවා එයා පත් කරපු මේ අයට යුක්තිය ඉෂ්ඨ කරන්න. එයා පොරොන්දු වෙච්ච ජිනිවා වලට ඒ නිතියේ ක්‍රියාදාමය සංක්‍රන්තික යුක්ති ක්‍රියාදාමය ඉෂ්ඨ කරන්න. ඒක ක්‍රියාත්මක කරන්නෙ නැතුව මේ රටේ කිසි ආකාරයකින් සංහිඳියාවක් ඇති වෙන්නෙ නැහැ” යි ඇය අවධාරණය කළේය.

ආණ්ඩුව ජනතාවට ලබා දුන් පොරොන්දු ඉටු නොකර හමුදාව රකිනවා නම් මේ ආණ්ඩුවෙන් වැඩක් නැති බව කී මාධ්‍යවේදී ප්‍රගීත් එක්නැලිගොඩගේ බිරිඳ යුක්තියේ ක්‍රියාදාමය ඉෂ්ට කිරීමේදි ආණ්ඩුවේ අසමත් බාවය එක්සත් ජාතීන්ගේ සංවිධානයේ අවධානයට යොමු කර සිටි.

අතුරුදහන්වුවන් වෙනුවෙන් යුක්තිය ඉෂ්ඨ කරන ලෙස වව්නියාව,කිලිනොච්චිය සහ මුලතිව් ජනයා වසරකට වැඩි කාලයක් තිස්සේ විරෝධතාවයේ නිරත අතර ඒ අතරින් මව්වරුන් හත් දෙනෙකුම යුක්තිය නොලබාම මිය ගිය අතර ඉන් හතර දෙනෙකුම කිලිනොච්චියේ විරෝධතාවයේ නිරත වු අම්මවරු වෙති.

Facebook Comments

wedding people