දෙමළ ජනයාගේ දේශපාලන ප්‍රශ්න විසඳීමට අගමැති රනිල් වික්‍රමසිංහ විසින් ගනු ලැබු ඇතැම් පියවරයන් ජනපති මෛත්‍රීපාල සිරිසේන කප්පාදු කල බවට දෙමළ ජනයාගේ ස්වයං නීර්ණ අයිතිය වෙනුවෙන් පෙනී සිටින වාමාංෂික නායකයෙකු චෝදනා කරයි.
“උතුරේ ප්‍රශ්නය සම්බන්ධයෙන් යම් යම් දේවල් රනිල් මහත්තයාගෙන් පැත්තෙන් එක්සත් ජාතික පක්ෂය පැත්තෙන් ගත්තත් ඒවා හරියාකාරව ක්‍රියාත්මක කරන්න මෛත්‍රී ඉඩ දුන්නෙ නැහැ. විශාල වශයෙන් යම් යම් දේවල් කප්පාදු කළා, බාල්දු කළා වැඩ අප්සෙට් කළා.” යි ආචාර්ය වික්‍රමබාහු කාරුණාරත්න කියා සිටියේය.
එම බාධා මැද වුවද ජාතික ප්‍රශ්නය විසඳීම වෙනුවෙන් යම් සාධනීය පියවරයන් ගෙන ඇති බවයි නව සම සමාජ පක්ෂ නායකයා පෙන්වා දෙන්නේ.
දෙමළ ජාතික සන්ධානයේ නායක සම්බන්ධන් සහ සුමන්තිරන්ගේ නායකත්වයෙන් යුතු දෙමළ බුද්ධිමත් පිරිස ලිබරල්වාදින් ලෙස හැඳින්වු ආචාර්ය බාහු ආණ්ඩු බෙදීමක දී එම පිරිස් රනිල් වික්‍රමසිංහ ප්‍රමුඛ එක්සත් ජාතික පක්ෂයේ සමඟ සිටිනු ඇති බව මෙන්ම එසේ නොවන හොත් යළි භායනක ප්‍රතිඵල ඇති වන බවට ඔවුන් දන්නා බවයි පවසන්නේ.
“පැසිස්ට්වාදී කුම්බාන්ඩයන්”
ආණ්ඩු පිහිටුවීමට ජනපති මෛත්‍රී සමඟ සාකච්ඡා පවත්වන ඇතැම් පිරිස් “පැසිස්ට්වාදී කුම්බාන්ඩයන්” ලෙසයි නව සම මාජ පක්ෂ නායක ආචාර්ය වික්‍රමබාහු හඳුන්වනු ලැබුවේ.
“කලබල කරලා කෑකෝ ගහගෙන දඟලන කට්ටිය සුදු රෙදි ඇඳගෙන යනවා උදේට හවසට යනවා ජනාධිපති මන්දිරයට. මේ කට්ටිය ඉතාම භයානක පැසිස්ට්වාදී කුම්බාන්ඩයො කට්ටියක් බව දෙමළ ජනතාව කවුරුත් දන්නවා” යැයි කොළඹ පැවති මාධ්‍ය හමුවක දී ඔහු කියා සිටියේය.
එම නිසාවෙන් දෙමළ ජනයාගේ සහාය රනිල් වික්‍රමසිංහ වෙත ලැබෙනු ඇති බවට විශ්වාසය පල කරන ආචාර්ය වික්‍රමබාහු කරුණාරත්න එනමුත් දෙමළ ජනයාගේ ප්‍රශ්න වලට ද පිළිතුරු දිය හැකි ලෙස ප්‍රතිසංවිධානයකට ලක් විය යුතු බවයි වැඩි දුරටත් අවධාරණය කරන්නේ.
Facebook Comments
