උසස් පෙළ විභාග රාජකාරි සඳහා විශේෂ පහසුකම් ඉල්ලයි

කොරෝනා වසංගත අවදානමට මුහුණ දෙමින් උසස් පෙළ විභාග රාජකාරිවල නිරත නිලධාරීන් සඳහා විශේෂ පහසුකම් සලසන ලෙස දිවයිනේ ප්‍රමුඛතම ගුරු සංගමයක් ඉල්ලා සිටියි.

මේ වන විට උසස් පෙළ විභාග මධ්‍යස්ථාන ගණනාවකින් කොවිඩ් 19 ආසාධිත දරුවන් පිළිබඳව වාර්තා වී ඇති බව පෙන්වා දෙන ලංකා ගුරු සංගමය අවධාරණය කරන්නේ ගම්පහ ප‍්‍රදේශයේ මෙන්ම කොළඹ ප‍්‍රදේශයේ පාසල්වල ද උසස් පෙළ විභාගයට පෙනී සිටින දරුවන් කොවිඩ් 19 අසාදනය වීම තුළ විභාග රාජකාරිවල නිරත ගුරු සහ විදුහල්පතිවරු මෙන්ම අනෙකුත් දරුවන් ද දැඩි අවදානමකට ලක්ව සිටින බවයි.

බස්නාහිර පළාතේ ඇඳිරි නීතිය පනවා තිබියදී විභාග කොමසාරිස්වරයා සඳහන් කළ පරිදි පොදු ප‍්‍රවාහන සේවා ක්‍රියාත්මක නොවූ හෙයින් විභාග රාජකාරිවල නිරත නිලධාරීන්ට තම වියදමින් ප‍්‍රවාහන පහසුකම් සපයා ගැනීමට සිදු වු බව පෙන්වා දෙන ලංකා ගුරු සංගමයේ ප්‍රධාන ලේකම් ජෝසප් ස්ටාලින් අවධාරණය කරන්නේ එසේම විභාගයට පෙනී සිටින දරුවන් විභාග මධ්‍යස්ථාන වෙත රැගෙන ඒමේදී පෞද්ගලික ප‍්‍රවාහන කටයුතු සඳහා දෙමාපියන්ට ද විශාල මුදලක් දැරීමට සිදු වූ අතර, ඔවුන් දැඩි පීඩාවකට පත් වු බවයි.

“විශේෂයෙන්ම ඔක්තෝබර් 31 දින විශාල දරුවන් සංඛ්‍යාවක් විභාගයට සහභාගි වූ ගිණුම්කරණය විෂය පැවති අතර, බස්නාහිර පළාත තුළ ඇදිරි නීති තත්වය ප‍්‍රකාශයට පත් කිරීම තුළ දරුවන් මෙන්ම විභාග රාජකාරිවල නිරත නිලධාරීන් ද දැඩි දුෂ්කරතාවන්ට පත්විය. රටේ පවතින අවදානම් සහගත තත්වය යටතේ විභාග රාජකාරිවල නිරත නිලධාරීන්ට ප‍්‍රවාහන දීමනාවක් ලබාදෙන ලෙස ලංකා ගුරු සංගමය දිගින් දිගටම ඉල්ලා සිටි අතර, ඇදිරි නීති ප‍්‍රදේශවල විභාග රාජකාරිවල නිරත නිලධාරීන්ට ප‍්‍රවාහන දීමනාවක් ලබාදීම සම්බන්ධයෙන් විභාග කොමසාරිස්වරයා ලිපියක් නිකුත් කර නැවත එය කෙටි පණිවිඩ ඔස්සේ සංශෝධනය කර ඇත.”

ඒ සම්බන්ධයෙන් මේ වන විට අපැහැදිලිතාවයක් පවතින අතර, මේ තත්වය තුළ ප‍්‍රවාහන දීමනා සම්බන්ධයෙන් විභාග කොමසාරිස්වරයා විධිමත් චක‍්‍රලේඛයක් නිකුත් කළ යුතු බව ලංකා ගුරු සංගමය ඔක්තෝබර් පළමුවැනිදා නිකුත් කළ මාධ්‍ය නිවේදනයේ වැඩි දුරටත් සදහන්ය.

එසේම නිරෝධායනය වන දරුවන් සහ කොවිඩ් 19 ආසාදිත බව තහවුරු වූ දරුවන් සමග විභාග රාජකාරි වල නිරත නිලධාරීන්ට මේ වන විට කොවිඩ් 19 ආසාදනය වීමේ අවදානමක් ද උද්ගතව ඇති බවටත් ජ්‍යෙෂ්ඨ වෘත්තිය සමිති නායකයා අනතුරු අඟවා තිබේ.

පෞද්ගලික PCR

කෝවිඩ් ආසාදිත වූවන් ලෙස හඳුනාගත් දරුවන් සම්බන්ධයෙන් හා නිරෝධායනය වන දරුවන් සම්බන්ධයෙන් කටයුතු කළ විභාග රාජකාරිවල නිරත ගුරු-විදුහල්පතිවරුන්ට PCR පරීක්ෂණ කළ යුතු වුවත් ඒ සඳහා කිසිදු වැඩපිළිවෙලක් නොමැති බවටත් ගුරු සංගම් නායකයා තව දුරටත් චෝදනා කරයි.

“මේ තත්වය තුළ ඔවුන්ට පෞද්ගලික රෝහල්වලින් PCR පරීක්ෂණ සිදු කර ගැනීමට සිදුව ඇති අතර, ඒ සඳහා රු.9500/- ක් වැනි විශාල මුදලක් වැය කිරීමට සිදුව ඇත.”

උසස් පෙළ විභාගය නොවැම්බර් 06 දින දක්වා පැවැත්වෙන අතර, මේ තත්වය තුළ නිරෝධායනය වන දරුවන් සහ කෝවිඩ් අසාදිතයයි තහවුරු වූ දරුවන් සමග කටයුතු කළ විභාග රාජකාරිවල නිරත නිලධාරීන්ගේ PCR පරීක්ෂණ වෙනුවෙන් ගෙවූ මුදල් ආපසු ගෙවීමට සහ යම් නිලධාරියකුට PCR පරීක්ෂණ සිදු කිරීමට අවශ්‍ය නම් එවැනි නිලධාරීන් වෙනුවෙන් කඩිනමින් PCR පරීක්ෂණ සිදු කිරීම සම්බන්ධයෙන් විභාග කොමසාරිස්වරයා විසින් පැහැදිලි ක‍්‍රමවේදයක් ප‍්‍රකාශ කළ යුතු බව ලංකා ගුරු සංගමය සිය නිවේදනය මගින් වැඩි දුරටත් අවධාරණය කර සිටී.