මඩකලපුවේ තණබිම් ප්‍රශ්නය විසඳන්න ජනපති උසාවි යාමට සැරසෙයි

මාසයකට වැඩි කාලයක් තිස්සේ අඛණ්ඩ විරෝධතාවයක නිරතව සිටින නැගෙනහිර පලාතේ කිරි ගොවීන්ගේ ගැටළු විසදීම සදහා ජනාධිපතිවරයාට අවසානයේ අධිකරණයේ පිහිට පැතීමට සිදුව තිබේ.

ජනාධිපති ලේකම් කාර්යාලයේදී ඔක්තෝබර් 15 වැනි ඉරිදා කිරි ගොවි ගැටළුවට විසදුම් සෙවීම සම්බන්ධයෙන් ජනාධිපතිවරයා සමග පැවැත්වු සාකච්ඡාවට එක්ව සිටි තමිල් ඊළාම් විමුක්ති සංවිධානයේ ලේකම්, පාර්ලිමේන්තු මන්ත්‍රී ගෝවින්දන් කරුණාකරන් මාධ්‍යවේදීන් හමුවේ කියා සිටියේ කිරි ගොවීන්ගේ ඉඩම් අත්පත්කරගනිමින් කෘෂිකර්මාන්තයේ යෙදී සිටින ගොවීන් ඉවත් කිරීමට අධිකරණ ක්‍රියාමාර්ග ගන්නා ලෙස රනිල් වික්‍රමසිංහ ජනාධිපතිවරයා පොලිසියට සහ මහවැලි සංවර්ධන දෙපාර්තමේන්තු නිලධාරීන්ට උපදෙස් ලබා දුන් බවයි.

“ජනාධිපතිවරයා පොලිසියට සහ මහවැලියට නියෝග කරා අධිකරණයෙන් නියෝගයක් ලබාගෙන සතියක් ඇතුළත එයාලාව එතැනින් ඉවත් කරන්න කියලා කිව්වා.”

මයිලත්තමඩු, මාදවනෙයි කිරි ගොවීන්ගේ ගැටළුවට විසදුම් සෙවීම සදහා ජනාධිපතිවරයා සමග පැවැත්වු සාකච්ඡාවට නැගෙනහිර පළාත් ආණ්ඩුකාර සෙන්දිල් තොණ්ඩමාන්, රාජ්‍ය ඇමති එස්.ව්‍යාලේන්ද්‍රන්, රාජ්‍ය අමාත්‍ය සිවනේසතුරෙයි චන්ද්‍රකාන්තන්, පාර්ලිමේන්තු මන්ත්‍රී ශානක්‍යයන් රාසමානික්කම්, මඩකලපුව දිස්ත්‍රික් ලේකම් හා අතිරේක ලේකම්, මහවැලි සංවර්ධන අධිකාරියේ නිලධාරීන් වන ජීවී හා වන සංරක්ෂණ දෙපාර්තමේන්තු නිලධාරීන්, මඩකලපුව නියෝජ්‍ය පොලිස්පති හා හමුදා නිලධාරීන් එක්ව තිබේ.

එදිනම මඩකලපුවේ මංගලාරාමාධිපති අම්පිටියේ සුමනරතන හිමියන්ගේ සහ හිටපු මහ ඇමතිනි අනුරාධා යහම්පත් ගේ නායකත්වයෙන් තණබිමේ බුදු පිළිමයක් වඩා හිඳුවා තිබේ.

මඩකලපුව සිත්තාන්ඩි පාසල ඉදිරිපිටදී සැප්තැම්බර් 15 වැනි සිකුරාදා දෙමළ කිරි ගොවීන් විරෝධතාව ආරම්භ කර තිබුනේ සැප්තැම්බර් 13 වැනිදා මඩකලපුව දිස්ත්‍රික් ලේකම් කාර්යාලයේ පැවැති ගොවි කමිටු රැස්වීමේදී කිරි ගොවීන් මුහුණ දී සිටින ගැටළුවට විසදුම් ලබා දීමට තමන්ට නොහැකි බව දිස්ත්‍රික් ලේකම් කමලාවතී පද්මරාජා පැවසීමෙන් පසුවයි.

විරෝධතාවයේ නිරත කිරි ගොවියන් පෙන්වා දෙන්නේ සිය ගවයන් තණකොළ කෑම සදහා භාවිත කළ ඉඩම් අක්කර දෙදාස් පන්සීයක් පමණ භුමි භාගයක් සිංහල ගොවීන් විසින් හේන් කටයුතු වෙනුවෙන් මේ වන අත්පත්කරගෙන තිබීම නිසා කිරී ගොවීන් දැඩි අර්බුදයකට මුහුණ දී සිටින බවයි.

මඩකලපුව, මයිලත්තමඩු, මාදවනෙයි ප්‍රදේශයේ පිහිටි තෘණ භුමිය හිටපු ජනාධිපති ගෝඨාභය රාජපක්ෂ විසින් නැගෙනහිර ආණ්ඩුකාරධුරය සඳහා පත් කරන ලද වියත් මග ක්‍රියාකාරිණි අනුරාධා යහම්පත් විසින් මෑතකාලීනව පදිංචි කළ සිංහල පවුල් 150 ට පමණ බඩ ඉරිඟු ඇතුළු බෝග වගා කිරීම සඳහා පවරා දීමත් සමග පාරම්පරිකව කිරි ගවයන් පාලනය කරන්නන් සහ වගාකරුවන් අතර පසුගිය කාලයේ අවස්ථා කිහිපයකදීම ගැටුම් ඇති වී තිබුනි.

කිරි ගොවීන් පෙන්වා දෙන්නේ ගවයන්ට කැවීම සඳහා භාවිත කළ තණ බිම් අක්කර 6000 ක භුමියෙන් සිංහල ගොවියන් බලහත්කාරයෙන් අල්ලා ගෙන සිටින්නේ සරුසාරෙට තෘණ වැවෙන අක්කර 2500 ක ප්‍රදේශයක් බවයි.

ජනාධිපතිවරයා පසුගියදා නැගෙනහිර පලාතේ සංචාරයක නිරත වු අවස්ථාවේ සිය ගැටළු වලට විසදුම් ඉල්ලා විරෝධතා දියත් කළ කිරි ගොවීන්ට පොලීසිය විසින් පහර දී තිබුනි.

පාර්ලිමේන්තු මන්ත්‍රී ගෝවින්දන් කරුණාකරන් පවසන ආකාරයට ජනාධිපතිවරයා සමග ඔක්තෝබර් 15 වැනිදා පැවැත්වු සාකච්ඡාවට සහභාගී වී සිටි හමුදා නිලධාරීන් උත්සාහ ගෙන ඇත්තේ සිංහල ගොවීන්ගේ කෘෂිකාර්මික කටයුතු කිරි ගොවීන්ට බරලතල ප්‍රශ්නයක් නොවන බව ඒත්තු ගැන්වීමටයි.

“කිරි ගොවීන්ට තම ගවයන් රැගෙන යා හැකි බව ජනාධිපති පැවසුවා. ගොවිතැන් කරන බහුතර ජනතාව ගියාට පස්සේ තමයි හරක් එතනට ගෙනියන්න පුළුවන් තත්වයක් තියෙන්නේ. ඒ සඳහා පූර්ණ සහයෝගය ලබාදීමට සූදානම් බවද පොලිසිය කිව්වා. ඒ උනත් හමුදාව විරුද්ධ මතයක සිටින්නේ. තෘණ භුමි අක්කර 10,000ක් තියනවා කියලත් ප්‍රශ්නයකට හේතු වෙලා තියෙන්නේ වර්ගකිලෝමීටරයක් විතරයි, එතන තමයි ප්‍රශ්නේ තියෙන්නේ කියලා කියන හමුදා නිලධාරීන්ගේ ප්‍රකාශය පිළිගන්න බෑ.”

මයිලත්තමඩු, මාදවනෙයි කිරි ගොවීන් අඛණ්ඩ විරෝධතාවය දියත් කරන භුමියට ඔක්තෝබර් 15 වැනි දා ගිය පාර්ලිමේන්තු මන්ත්‍රී එම්. ඒ සුමන්තිරන් ද පවසා තිබුනේ කිරි ගොවි ගැටළුවට විසදුම් ලබා ගැනීම සදහා යළිත් වරක් අධිකරණ ක්‍රියාමාර්ග ගැනීමට සුදානම් බවයි.

“2020 දී අපි මේ සම්බන්ධයෙන් අභියාචනාධිකරණයේ නඩුවක් ගොනු කරලා අවුරුද්දකට පස්සේ 2021 දී මහවැලි සංවර්ධන අධිකාරිය එයාලව (සිංහල ගොවින්) එතනින් ඉවත් කරන බවට සහතිකයක් ලබා දුන්නට පස්සේ නඩුව ඉවර උනා. නමුත් ඒ පොරොන්දු දැන් පුස්සක් වෙලා. ඒ නිසා අපි ආයෙත් උසාවියට ගිහින් ඒ අයගේ පොරොන්දුව ක්‍රියාත්මක කරන්න කියලා පෙත්සමක් ගොනු කරනවා.”