වසංගත ව්‍යාප්තිය හමුවේ රට අගුලු දැමීමෙන් ආර්ථික පීඩාවට පත්ව සිටින දුප්පත් ජනතාවට මුදල් බෙදු උතුරේත්, දකුණේත් කෝටිපතියන් දෙදෙනකු වෙනුවෙන් නීතිය දෙයාකාරයකට ක්‍රියාත්මක වී තිබේ.
ආර්ථික පීඩාවට පත්ව සිටින කැලණිය ප්‍රදේශයේ ජනතාව වෙනුවෙන් නිදහසේ මුදල් බෙදීමට ව්‍යාපාරිකයකුට ඉඩදුන් පොලීසිය යාපනයේ ජනතාවට මුදල් බෙදු දානපතියකු අත්අඩංගුවට ගෙන තිබේ.
රුපියල් කෝටි දෙක හමාරක මුදලක් එක් අයෙකුට රුපියල් දහස බැගින් අගෝස්තු 25 වැනිදා සිට කැලණිය, නාහේන ප්‍රදේශයේදී ව්‍යාපාරිකයෙක් වන මංජුල පෙරේරා විසින් බෙදා දී තිබුනි.
එම මුදල් ලබාගැනීම සඳහා විශාල පිරිසක් රැස්ව සිටි අයුරු ද ජනමාධ්‍ය විසින් ද වාර්තා කරන ලදී.
උතුරේ වාර්තාකරුවන් පවසන්නේ යාපනයේදී රුපියල් කෝටි දෙකක් මුදලක් දුගී ජනතාවට බෙදමින් සිටි දානපතියෙක් ඇතුලු තිදෙනකු පොලිස් අත්අඩංගුවට ගත් බවයි.
යාපනය නෙල්ලිඅඩි පොලිස් වසමේ උඩුප්පිඩි ප්‍රදේශයේ ජනතාව අතර එක් අයකුට රුපියල් 2000 බැගින් පරිත්‍යාග කරමින් සිටි දානපතියෙක් ඇතුළු තුන් දෙනෙක් නෙල්ලිඅඩි පොලීසිය විසින් සැප්තැම්බර් 6 වැනිදා අත්අඩංගුවට ගෙන ඇත්තේ නිරෝධායන නීති කඩ කළ බවට චෝදනා කරමිනි.
උඩුප්පිඩි වදිරියන් මාර්ගයේ පිහිටි දානපතියාගේ නිවසේ මුදල් පරිත්‍යාග කරන බවට තොරතුරු ලැබීමත් සමග එම ස්ථානයට විශාල පිරිසක් එක්රැස් වී තිබේ.
එය වාර්තාවීමෙන් පසු එම ස්ථානයට ගිය නෙල්ලිඅඩි පොලීසිය සහ සෞඛ්‍ය නිලධාරීන් රැස්ව සිටි පිරිස් නිරෝධායන නීති කඩකරන බවට චෝදනා කරමින් විසුරුවා හැර තිබේ.
පොලිස් භාරයට ගත් දානපතියාගෙන් ප්‍රශ්න කිරීමේදී අනාවරනය වී ඇත්තේ ස්විස්ටර්ලන්තයේ ජීවත් වන සිය පුතා විසින් එම මුදල් එවූ බවත් එම මුදල් දුප්පත් ජනතාවට බෙදාදෙන ලෙසට ඔහු සිදුකළ ඉල්ලීමකට අනුව එම මුදල් බෙදා දුන් බවයි.
පළාත් බද මාධ්‍යවේදීන් පවසන්නේ අත්අඩංගුවට ගත් පිරිසගේ ප්‍රකාශ සටහන් කරගැනීමෙන් පසු ඔවුන් නිදහස් කිරීමට පොලිසිය කටයුතු කර ඇති බවයි.
Facebook Comments
