ජාතිවාදය වපුරමින් ජාතීන් අතර ගැටුම් ඇති කිරීමට උත්සාහ දරන මාධ්‍ය ආයතන වෙත වෙළඳ දැන්වීම් ලබා නොදීමට මුදල් අමාත්‍යවරයා තීරණය කර තිබේ.
හිරු සහ දෙරණ රූපවාහින නාළිකා එලෙස ජාතීන් අතර වෛරය ඇති කරන අන්දමේ පුවත් පළ කරන බවට කී මංගල සමරවීර ඇමැතිවරයා එම ආයතන වලට මුදල් අමාත්‍යංශය හරහා ලබා දී ඇති දැන්වීම් නවතා දමන ලෙසට සිය අමාත්‍යංශය සතු ආයතන වල ප්‍රධානීන්ට නියෝග කළේය.
“මහා විනාශයක් ඇති කරන්න ඔය හිරු සහ දෙරණ කියන නාළිකා පැහැදිලි න්‍යාය පත්‍රයක් අනුවයි වැඩ කරන්නෙ.” යැයි පැවසු අමාත්‍යවරයා “මේ ආයතන දෙක කරගෙන යන ක්‍රියා මාර්ගයන් සහ විශේෂයෙන්ම ජාතිවාදය වපුරන්න වගේම සිංහල ජාතිය ප්‍රකෝප කරන්න බොහෝ වෙලාට ප්‍රවෘත්ති විකෘති කරනවා.” යි 15 බ්‍රහස්පතින්දා සිය අමාත්‍යංශ ආයතන ප්‍රධානීන් සමග පැවති හමුවක දී කියා සිටියේය.
රටේ සෑම නිවසකම පාහේ කඩු ඇති බව පෙන්වා දුන් ඇමැතිවරයා ජනාධිපතිවරයා සන්තයේත් කඩුවක් ඇති බව පැවසු අතර ඇතැම් මාධ්‍ය එය එක් ජාතියකට ඉලක්ක කර වෛරයක් ඇති කිරීමට උත්සාහ දැරූ බවට චෝදනා කළේය.
“ජනාධිපතිතුමා කිව්වා පොළොන්නරුවේ මගේ ඇඳ යටත් තියෙනවා කියලා කඩුවක්. මොකද ලංකාවේ අපේ සමාන්‍යයෙන් ගෙවල් වල ඇමරිකාවේ වගේ අපිට තුවක්කු තියා ගන්න ලයිසන් නොදෙන නිසා. සමාන්‍යයෙන් දුප්පත් මනුස්යෙක්ගෙ එකම ආයුධය කඩුවක් තියා ගන්න එක තමයි.”
ජාතිවාදය ඇති කිරීමට උත්සාහ දරන මාධ්‍ය ආයතන වෙත පමණක් දැන්වීමේ ලබා නොදෙන ලෙසත් රජය විවේචනය කරන නිසාවෙන් මාධ්‍ය වෙත දැන්වීම ලබා දීම නවතා නොදමන ලෙස ද අමාත්‍ය මංගල සමරවීර තම අමාත්‍යංශය සතු ආයතන ප්‍රධානීන්ගෙන් වැඩි දුරටත් ඉල්ලා සිටියේය.
Facebook Comments
