පොලිස් අත් අඩංගුවේ කොරෝනා ව්‍යාප්තියක්

රට තුළ පවතින කොරෝනා වසංගත ව්‍යාප්තිය හමුවේ බන්ධනාගාර පොකුර හාර දහස ඉක්මවා තිබියදී, පොලිස් අත්අඩංගුවේ පසුවන සැකකරුවන් පිරිසකටද වෛරසය ආසාදනය වී ඇති බව හෙළි වී තිබේ.

මේ තොරතුරු අනාවරණය වී ඇත්තේ ශ්‍රී ලංකාවට ඉන්දියාවෙන් ලැබුණු කොරෝනා එන්නත විදීම ආරම්භ කිරීමත් සමගමය.

වව්නියාව පොලීස් සංකිර්ණය තුළ පිහිටුවා තිබෙන පොලිස් ත්‍රස්ත විමර්ශන ඒකකයේ රඳවා සිටි ත්‍රස්තවාදය වැලැක්වීමේ පනත යටතේ අත්අඩංගුවට ගත් සැකකරුවන් 19 ක් අතුරින් 17 දෙනකුටම කොරෝනා වෛරසය ආසාදනය වී ඇති බවයි වව්නියාව සෞඛ්‍ය පරීක්ෂක කාර්යාලය පවසන්නේ.

ඔවුන් අතුරින් කිලිනොච්චිය පුනරීන් ප්‍රදේශයේ පදිංචි 29 හැවිරිදි සැකකරුවකුට ජනවාරි 24 වනදා සිදු කරන ලද පී.සී.ආර්. පරික්ෂණයකදී කොරෝනා වෛරසය වැළඳී ඇති බවට හෙළි වීමෙන් පසුව සෙසු සැකකරුවන් 18 දෙනාටද පී.සී.ආර්. පරික්ෂණයන්ට යොමු කර තිබේ.

එහිදී හෙළි වී ඇත්තේ තවත් සැකකරුවන් දහසය දෙනකුට කොරෝනා වෛරසය අසාදානය වී ඇති බවයි.

පාස්කු ඉරුදින ප්‍රහාරයට සැකපිට අත්අඩංගුවට ගත් සැකකරුවන් කිහිප දෙනකුද ඒ අතර වන බව වාර්තා වේ.

වෛරසය ආසාදනය වී නොමැති සැකකරුවන් දෙදෙනා වෙනම ස්ථානයක රැඳවීමට පියවර ගෙන ඇති අතර පළමුව වෛරසය වැළඳුනු සැකකරුගෙන් සෙසු සැකකරුවන්ට කොරෝනා වෛරසය ආසාදනය වන්නට ඇතැයි සෞඛ්‍ය නිලධාරීහු සැක පලකරති.

මේ හේතුවෙන් වව්නියාව පොලිස් ත්‍රස්ත විමර්ශන ඒකකයේ පොලිස් නිලධාරීන්ද පී.සී.ආර්. පරික්ෂණ සදහා යොමු කිරීමට පියව ගෙන ඇති අතර ඔවුන් නිරෝධායනය කිරීමටද පියවර ගෙන ඇති බව වව්නියාව සෞඛ්‍ය නිලධාරී කාර්යාලය පළාත් බද මාධ්‍යවේදීන් සමග වැඩි දුරටත් පවසා තිබේ.

ජනාධිපතිවරයා වෙත ලිපියක් යොමු කරමින් උතුරේ සර්ව ආගමික නායකයන් පිරිසක් පසුගියදා දන්වා තිබුනේ මේ වන විට රටේ පවතින කොරෝනා වසංගත ව්‍යාප්තිය හමුවේ බන්ධනාගාර පොකුර 4000 ඉක්මවා තිබෙන අතර දේශපාලන සිරකරුවන්ද 16 දෙනකු ඒ අතර වන බවයි.

උතුර නියෝජනය කරන බෞද්ධ, හින්දු, මුස්ලිම්, කතෝලික සහ ක්‍රිස්තියානි ආගමික නායකයන් හය දෙනකුගේ අත්සනින් යුතුව ජනාධිපති ගෝඨාභය රාජපක්ෂ වෙත යොමු කළ එම අභියාචනය මගින් ඔවුන් හෘදයාංගමව ඉල්ලා ඇත්තේ සියලු දේශපාලන සිරකරුවන්ට පොදු සමාවක් ලබා දෙන ලෙසයි.

බන්ධනාගාර වලට කොරෝනා එන්නත ලබා දෙන්නේද යන්න සෞඛ්‍ය බලධාරීන් විසින් ප්‍රකාශයට පත් කර නැත.