සිව් වසරකට පෙර එල්ල වූ පාස්කු බෝම්බ ප්‍රහාරයට ගොදුරුව මිය ගිය හා තුවාල ලැබුවන්ට යුක්තිය ඉල්ලා මඩකලපුවේ දී විරෝධතා පා ගමනක් දියත් කර තිබේ.
ප්‍රහාරයෙන් මිය ගිය පිරිස සිහිකරමින් මඩකලපුව චාල්ස් ශාලාවේ දී ඔවුන්ට මලින් පහනින් උපහාර දක්වා එම ස්ථානයේ සිට මඩකලපුව රදගුරු නිල නිවස තෙක් යුක්තිය ඉල්ලා විරෝධතා පා ගමනක් දියත් කිරීමට මඩකලපුව සර්ව ආගමික සංගමය කටයුතු කර ඇත.
මඩකලපුව සර්ව ආගමික සංගමයේ සභාපති ශිව ශ්‍රී ශිව බාලම් කුරුක්කල්වරයාගේ ප්‍රධානත්වයෙන් පැවැති අනුස්මරණය හා පා ගමන සදහා හින්දු සහ ක්‍රිස්තියානි පුජකවරු ද එක්ව සිටි බව පළාත් බද වාර්තාකරුවෝ පවසති.
පාස්කු ප්‍රහාරයෙන් දැරුවන් 14ක් ඇතුළු ජීවිත 31ක් බිලිගත් මඩකලපුවේ සියොන් දේවස්ථානය වෙනුවට අලුතින් ඉදිකළ දේවස්ථාන ගොඩනැගිල්ලේද විශේෂ දේව මෙහෙයක්ද පැවැත්වු බවයි ඔවුන් වැඩි දුරටත් පවසන්නේ.
දේවස්ථාන සහ සංචාරක හෝටල් කිහිපයක් ඉලක්ක කර ගනිමින් 2019 අප්‍රේල් මස 21 වන දින එල්ල කළ මරාගෙන මැරෙන බෝම්බ ප්‍රහාර මාලාවට කටුවාපිටිය ශාන්ත සෙබස්තියන් දේවස්ථානය, කොටහේන කොච්චිකඩේ ශාන්ත අන්තෝනි දේවස්ථානය හා මඩකලපුව සියොන් දේවස්ථානය ඉලක්ක වී තිබුනි.
2019 අප්‍රේල් මස 21 වන දින එල්ල කළ බෝම්බ ප්‍රහාර මාලාව නිසා 250 කට අධික සාමාන්‍ය වැසියන් සංඛ්‍යාවක් මියගියේය.
කටුවාපිටිය ශාන්ත සෙබස්තියන් දේවස්ථානය, කොටහේන කොච්චිකඩේ ශාන්ත අන්තෝනි දේවස්ථානය, මඩකලපුව සියොන් දේවස්ථානය, දෙහිවල හෝටලයක සහ කොළඹ කිංග්ස්බරි, ෂැන්ග්‍රිලා, සිනමන් ග්‍රෑන්ඩ් හෝටල්වල තෙවසරකට ඉහතදී බෝම්බ පිපිරීම් සිදු වුයේ පුද්ගලයන් 268ක් ජීවිතක්ෂයට පත්කරමින්, තවත් 500කට අධික ප්‍රමාණයක් තුවාල සිදුකරමිනි.
ඒ සම්බන්ධයෙන් හෝ ප්‍රහාරයෙන් අනතුරුව මුස්ලිම්වරුන් ඉලක්ක කොට රාජ්‍ය අනුග්‍රහයෙන් දියත් වූ ජාතිවාදී ප්‍රහාර මාලාව හෝ සම්බන්ධයෙන් අද වනතුරු කිසිවකුත් නීතිය හමුවට පමුණුවා නොමැත.
පාස්කු ප්‍රහාරයට සිව් වසරක් සපිරෙන දිනයේ ශ්‍රී ලංකාව පුරා විවිධ ආගමික කටයුතු, සිහිකිරීමේ උත්සව හා යුක්තිය ඉල්ලා විරෝධතා පැවැති බව පළාත් බද වාර්තාකරුවෝ පවසති.
පාස්කු ප්‍රහාරයෙන් මියගිය සහ වින්දිත පිරිස් සිහි කරමින් කොච්චිකඩේ ශාන්ත අන්තෝනි දේවස්ථානයේදී පැවති ප්‍රධාන සැමරුම් උත්සවය අමතමින් කොළඹ අගරදගුරු මැල්කම් කාදිනල් රංජිත් හිමිපාණන් සදහන් කළේ පාස්කු ඉරිදා ප්‍රහාරය බලය ලබා ගැනීම වෙනුවෙන් කළ දේශපාලන කුමන්ත්‍රණයක් බවයි.
” ඒකාධිපතිවාදය රජ කරවා ජනතා පරමාධිපත්‍යට පයින්ගසන්නට පියවර ගන්නා අප රටේ අද පවත්නා නායකත්වය පිළිබඳව අපිට විශ්වාසය තැබිය නොහැකියි. ආදරණීය දෙවි පියාණන්ගෙන් ඉල්ලා සිටින්නේ, අපේ මේ හඬට සවන්දී පාස්කු ඉරුදින සිදුවුණේ කුමක් දැයි අපිට පෙන්වා දෙන්නට කටයුතු කරන ලෙසයි. ඒලෙසම අප රට තුළ ලබා ගත් ඒක්සත් කමේ ජයග්‍රහණය කිසිවෙකුට පරාජය කරන්නට ඉඩ නොදෙන ලෙසයි. සියල්ලන්ට අපි දැනුම් දෙන්නේ, යුක්තිය ඉටු වන තුරු අපි අවදියෙන් ඉන්නවා ”
පාස්කු ප්‍රහාරයෙන් දිවි අහිමිවූවන් හා තුවාල ලැබූවන්ට යුක්තිය හා සාධාරණය ඉටු කරන්නැයි ඉල්ලමින් සංවිධානය කර තිබූ මෙම සැමරුම් උළෙලට වතිකානයේ ශ්‍රී ලංකා තානාපති බ්‍රයන් උඩයිගුවේ හිමිපාණන්, සර්ව ආගමික නායකයන්, විදේශ තානාපතිවරුන් ඇතුළු පිරිසක්ද එක්ව සිටියහ.
පාස්කු ප්‍රහාරයෙන් මියගිය හා වින්දිතයන්ට යුක්තිය ඉල්ලමින් අප්‍රේල් 20 වැනිදා පස්වරුවේ කටුවාපිටිය ශාන්ත සෙබස්තියන් දේවස්ථානයේ පැවති විශේෂ දේව මෙහෙයකින් අනතුරුව ආරම්භ කළ පාගමන පසුදා පෙරවරුවේ කොච්චිකඩේ ශාන්ත අන්තෝනි සිද්ධස්ථානයට ලගා වී තිබුනි.
කතෝලික පියතුමන්, කන්‍යා සොයුරියන්, පාස්කු ප්‍රහාරයේ වින්දිතයන් සහ තරුණ තරුණියන් යුක්තිය අයැදීමේ එම පාගමනට එක්ව සිටි බවයි පළාත් බද වාර්තාකරුවන් පවසන්නේ.
‘යුක්තිය ඉටුවන තුරු අප අවදියෙන්’ යන මැයෙන් කොච්චිකඩේ ශාන්ත අන්තෝනි සිද්ධස්ථානයේ සිට කටුවාපිටිය ශාන්ත සෙබස්තියන් දේවස්ථානය දක්වා මීගමුව, කොළඹ ප්‍රධාන මාර්ගය දෙපස ජන පවුරක් ද නිර්මාණය කර තිබු බව ඔවුහු වැඩි දුරටත් පවසති.
Facebook Comments
