වැලිකඩ බන්ධනාගාරයේ 2012 නොවැම්බර් මස 09 වැනි දින සිදු කළ ලැයිස්තුගත පුද්ගල ඝාතනයට ආරක්ෂක අමාත්‍යාංශයේ හිටපු ලේකම් ගෝඨාභය රාජපක්ෂ ඍජුව උපදෙස් දී ඇති බව තහවුරු වන සාක්ෂි රැසක් අපරාධ පරීක්ෂණ දෙපාර්තමේන්තුව සොයාගෙන ඇත.
අදාළ ඝාතනය සම්බන්ධයෙන් හිටපු ආරක්ෂක ලේකම්වරයා නියෝජ්‍ය පොලිස්පති අනුර සේනානායක හරහා පොලිස් මත්ද්‍රව්‍ය නාශක කාර්යාංශයේ පොලිස් පරීක්ෂක නියොමාල් රංගජීවට ලබා දුන් ‘චිට්’ එකක් අපරාධ පරීක්ෂණ දෙපාර්තමේන්තුවට ලැබී ඇතැයි එහි උසස් නිලධාරියෙක් හෙළිදරව් කළේය.
එසේම අදාළ සිද්ධිය අවස්ථාවේ දී හිටපු ආරක්ෂක ලේකම්වරයා දුරකථන ඇමතුම් ලබා ගත් පුද්ගලයන්ගේ තොරතුරු සහ අදාළ ඇමතුම් සම්බන්ධ විස්තර ද අපරාධ පරීක්ෂණ දෙපාර්තමේන්තුව අනාවරණය කරගෙන ඇත.
මේ සාක්ෂි අනුව වැලිකඩ සමූහ ඝාතනයට ආරක්ෂක අමාත්‍යාංශයේ හිටපු ලේකම්වරයා ඍජුව උපදෙස් දී ඇති බව තහවුරු වන බවත්, ඉදිරියේ දී එම සාක්ෂි අධිකරණයට ඉදිරිපත් කිරීමට කටයුතු කරන බවත් අදාළ නිලධාරියා වැඩිදුරටත් අවධාරණය කළේය.
මේ සම්බන්ධයෙන් අදහස් දක්වමින් පසුගිය සතියේ පැවැති මාධ්‍ය හමුවක දී සිවිල් සංවිධාන නියෝජිතයන් පවසා තිබුණේ වැලිකඩ සිද්ධිය සහ දූෂිත මිග් යානා ගනුදෙනුව සම්බන්ධයෙන් ආරක්ෂක අමාත්‍යාංශයේ හිටපු ලේකම් ගෝඨාභය රාජපක්ෂ අත්අඩංගුවට ගත යුතු බවයි.
ඔහුව කඩිනමින් අත්අඩංගුවට ගන්නා ලෙස ආණ්ඩුවට බල කරන බවත්, ඊට මැදිහත්වීම නීතිපතිවරයා ප්‍රමාද කිරීම ගැටලුවක් බවත් එම මාධ්‍ය හමුවේ දී සිවිල් සංවිධාන මඟින් අවධාරණය කෙරිණි.
ශාලික විමලසේන
සත්හඬ
Facebook Comments
