ඇන්සල් කම්කරුවන් වෙනුවෙන් ‘ඕස්ට්‍රේලියා-ආසියා කම්කරු සබැඳිය’ උද්ඝෝෂණ අරඹයි

බියගම නිදහස් වෙළඳ කලාපයේ ඇන්සල් ලංකා ආයතනයේ පාලනාධිකාරිය විසින් හත් වසරකට ඉහත දී සේවයෙන් නෙරපා හරින ලද කම්කරුවන්ට යුක්තිය ඉටු කර ගැනීම සදහා නව ජාත්‍යන්තර සහයෝගීතා ව්‍යාපාරයක් ජනවාරි 21 වන දින ඔස්ට්‍රේලියාවෙන් අරඹා තිබේ.

වෛද්‍ය හා කාර්මික අත්වැසුම් නිෂ්පාදනයේ ලොව ප්‍රමුඛයකු ලෙස සැලකෙන ඔස්ට්‍රේලියානු බහුජාතික සමාගමක් වූ ඇන්සල් සමාගම මෙම කම්කරුවන් සේවයෙන් පහ කරන ලද්දේ වෘත්තීය සමිතියක සාමාජිකයන් වීමේ ‘වරදටය’.

එමගින් ඇන්සල් සමාගම ඉලක්ක කර ඇත්තේ තම ආයතනයේ ක්‍රියාත්මක ශක්තිමත් වෘත්තීය සමිති කඩාදැමීමය.

ඕස්ට්‍රේලියා-ආසියා කම්කරු සබැඳිය (Australia Asia Workers Links – AAWL) විසින් ඇන්සල් සේවකයන්ට ජාත්‍යන්තර සහාය එක් කිරීම වෙනුවෙන් සංවිධානය කරන ලද පළමු අන්තර්ජාල ඔන්ලයින් රැස්වීම ආසියා ශාන්තිකර කලාපීය කම්කරු ක්‍රියාධාරයන්ගේ සහභාගිත්වයෙන් පසුගිය 21 දා පැවැත්විණි.

ඔවුන් අතර ශ්‍රී ලංකාව, මැලේසියාව, නේපාලය සහ ඕස්ට්‍රේලියාව යන රටවල වෘත්තීය සමිති ක්‍රියාකාරීන් සහ සහයෝගීතා ක්‍රියාකාරීන් ද වේ.

1991 වසරේදී සේවයට එක්වී 2013 වසරේදී සේවයෙන් නෙරපා හරින තෙක් ඇන්සල් කම්හලේ වසර 22 ක් කාලයක් සේවය කළ ඇන්සල් වෘත්තීය සමිතියේ උප ලේකම් ව සිටි දසන්ත ජයලත් මෙම රැස්වීමේ දී කියා සිටියේ 2013 වසර මුලදී සමාගම සිය නිෂ්පාදන ඉලක්ක වැඩි කළ බවයි.

එහි අරුත වූයේ සේවකයන්ට හුස්ම ගැනීමටවත් ඉස්පාසුවක් නැතිවන තරමට වැඩ ප්‍රමාණය ඉහල දැමීම බවයි හිටපු උප ලේකම්වරයා කියා සිටියේ.

පාලනාධිකාරියේ මෙම පියවරට එරෙහිව කම්කරුවන් අතරින් උද්ඝෝෂණ මතුවීමත් සමග සමාගමේ පිලිතුර වූයේ වෘත්තීය සමිතියේ සභාපති ඇතුළු සමිති නායකයන් 10 දෙනෙක් සේවයෙන් පහ කිරීමයි.

දසන්ත ජයලත් ද ඒ පිරිසට ඇතුලත් විය.

මෙසේ සේවා තත්ත්වයන් වඩාත් අසීරු කිරීම හා වෘත්තීය සමිති මර්දනයට එරෙහිව වැඩ වර්ජන ක්‍රියාමාර්ගයට එළඹීම මුල් කරගනිමින් අවසානයේ දී සමාගම විසින් කම්කරුවන් 300 කගේ පමණ රැකියා අහිමි කරන ලදී.

මෙසේ සේවයෙන් නෙරපා හරින ලද තවත් ඇන්සල් සේවකයෙකු වන ජනක, ඔන්ලයින් රැස්වීමේ දී විස්තර කලේ ඇන්සල් ලංකා කර්මාන්ත ශාලාවේ සේවකයන් විසින් වඩා හොඳ වැටුප් හා සේවා කොන්දේසි සඳහා ගෙන ගිය දිර්ඝ අරගලය ගැන ය.

එම අරගලයේ එක් අවස්ථාවක දී, එනම් 1994 දී ඇති වූ වැඩ වර්ජනයක් සහිත කම්කරු උද්ඝෝෂණයක් අතරතුර දී පොලීසිය කළ වෙඩි තැබීමකින් තම සහෝදර සේවකයන් තිදෙනෙකුගේ ජීවිත අහිමි වූ අයුරු ඔහු සිහිපත් කළේය.

ඒ අතර වෘත්තීය සමිති නායකයකු ද විය.

එසේ වුවත්, 2013 ඔක්තොම්බර් 13 දින දී සමාගමේ පාලනාධිකාරිය විසින් වෘත්තීය සමිති සාමාජිකයන් සියල්ලන් සේවයෙන් නෙරපා හරින තෙක් ගත වූ කාලය තුලදී ආයතනයේ කම්කරුවන් ගෙන ගිය මෙවන් මහත් පරිත්‍යාගයන් මධ්‍යයේ ගත්තාවූ වෘත්තීය සමිති ක්‍රියාමාර්ග තුළින් වඩා හොඳ වැටුප් හා සේවා කොන්දේසි දිනා ගත් අවස්ථාවන් දැකිය හැකිය.

මේ සංවිධාන ශක්තිය බිදීම ඇන්සල් පාලනාධිකාරියේ සැලැස්ම වී තිබේ.

ඒ අතර මෙම නෙරපා හැරීමට විරුද්ධව ශ්‍රී ලංකා නීති පද්ධතිය හරහා යමින් නෙරපා හැරීමට එරෙහිව අභියෝග කිරීමට දැරූ ප්‍රයත්නයන් හුදු කාලය නාස්ති කිරීමක් වූ බව ද ජනක කියා සිටියේ ය.

“අපට උදව් කළ හැක්කේ ජාත්‍යන්තර සහයෝගීතාවයට පමණයි.”

අන්තර්ජාතික සමායතන සහ කම්කරුවන්ගේ අයිතිවාසිකම් පිළිබඳ පර්යේෂකයෙකු වන ඇන්ඩි හෝල් මෙහි දී කියා සිටියේ ඇන්සල් සමාගම සතුව කර්මාන්ත ශාලා ශ්‍රී ලංකාව, මැලේසියාව සහ තායිලන්තය යන රටවල තිබෙන අතර, මෙම රටවල දේශීය සමාගම් සමඟ ගිවිසුම් පවත්වාගෙන යෑම ද ඇන්සල් සමාගමේ සැපයුම් දාමයේ කොටසක් ලෙස පවතින බවයි.

මෙම කර්මාන්තශාලා බොහොමයක වෘත්තීය සමිති නොපවතී. සේවකයාට පැය 48 ක වැඩ සතියක් පවත්වාගෙන යන කරන අතර මසකට පැය 150 ක් දක්වා වූ අතිකාල වැඩවල යෙදීමත් අපේක්ෂා කෙරේ.

මෙම රැස්වීම මැලේසියානු හෙද සංගමයේ සභාපති නුර්හයාති, ඕස්ට්‍රේලියානු හෙද හා වින්නඹු සම්මේලනයේ සහකාර ලේකම් මැඩි හැරඩන්ස්, ලංකා වෙළඳ කාර්මික හා පොදු කම්කරු සංගමයේ ප්‍රධාන ලේකම් සිල්වෙස්ටර් ජයකොඩි සහ නැගී සිටිමු ලංකා (Stand Up Movement Lanka) ව්‍යාපාරයේ අශිලා දන්දෙනිය විසින්ද අමතනු ලැබීය.

සේවයෙන් පහකරන ලද ඇන්සල් ලංකා කම්කරුවන් සම්බන්ධයෙන් යුක්තිය ඉෂ්ට කර ගැනීම සඳහා කරුණු දැක්වීමට මෙල්බර්න් නුවර පිහිටි ඔවුන්ගේ මූලස්ථානයට ගිය ඕස්ට්‍රේලියා-ආසියා කම්කරු සබැඳියේ වෘත්තීය සමිති නියෝජිතයන් මුණගැසීමට සමාගමේ පාලනාධිකාරිය පැමිණ නැත.

“ලංකාවේ කම්කරු පිරිසකගේ ජීවිතයට අදාල, අපගේ බැරෑරුම් කාරණය ගැන සාකච්ඡා කිරීමට සමාගම තුල කිසිවෙක් නැහැ” යි ඇන්සල් හාම්පුතුන් හමුවීම අසාර්ථක වීමෙන් පසු AAWL කැඳවුම්කරු මැන්රිකෝ මෝරෝ කියා සිටියේය.

ඔවුන් ගොස් සිටියේ කලින් කළ දැනුම් දීමකින් අනතුරුවය.

“මේ කම්කරුවන්ගේ රස්සාවලින් ඔවුන්ව දොට්ට දාලා දැන් අවුරුදු 07 ක් වෙනවා, ඔවුන්ට එක්කෝ යලි රැකියා නැතිනම් වන්දි ලැබිය යුතුයි,” යනුවෙන් ඕස්ට්‍රේලියානු වෘත්තීය සමිති ක්‍රියාධර විරාජ් දිසානායක පැවසීය.

“ඔවුන් වසර 07 ක් තිස්සේ සටන් කරන්නේ සමාගමේ වෘත්තීය සමිති විරෝධී බවට, මෑන්පවර් ක්‍රමයට, දැරිය නොහැකි සේවා කොස්දේසි වලට හා තමන් වෙත එල්ල කර ඇති අභූත චෝදනාවලට විරුද්ධවයි. මේ සේවකයන්ගේ අනාගත වැඩ විලිවෙලට අපි අපගේ සහයෝගය ප්‍රකාශකර සිටිනවා වගේම මම විශ්වාස කරනවා අපි තවත් වෘත්තීය සමිති මෙම සටනට එක්වෙන බවට.”

‘ඕස්ට්‍රේලියා-ආසියා කම්කරු සංධානය’ ලංකාවේ ඇන්සල් කම්කරුවන්ට සහයෝගය දැක්වීමේ ජාත්‍යන්තර ක්‍රියාකාරී දිනයක් පැවැත්වීමට ද ජාත්‍යන්තර අන්තර්ජාල රැස්වීමේදී තීරණය කර තිබේ.

ඒ පිළිබඳ ක්‍රියාකාරකම් ඉදිරියේ දී තීරණය කිරීමට නියමිතය.