නාත්තන්ඩිය හා අවට ප්‍රදේශයේ ජාතිවාදී ප්‍රචණ්ඩ ක්‍රියා සම්බන්ධයෙන් හදිසි නීතිය යටතේ අත්අඩංගුවට ගන්නා ලද පිරිසක් නිදහස් කරගැනීම සඳහා කිසිදු ගාස්තුවක් අය නොකර ජාතිකවාදී පදනමකින් අධිකරණයේ පෙනී සිටීමට වයඹ පළාතේ නීතිඥ සංගමයක් සහතික වී තිබේ.
මේ සතිය මුල නාත්තන්ඩිය, තුම්මෝදර, මැල්ලකැලේ සහ කොට්ටාරමුල්ල ඇතුළු ප්‍රදේශ වල මුස්ලිම් දේවස්ථාන ඇතුළු දේපල වලට හානි කිරීම සම්බන්ධයෙන් සැකකෙරෙන 31 දෙනකු වෙනුවෙන් “මේ ජාතිය වෙනුවෙන්, මේ සිංහලකම වෙනුවෙන්, මේ ශ්‍රී ලංකාව වෙනුවෙන්” ඉදිරිපත් වන බව මාරවිල නීතිඥ සංගමයේ සභාපතිවරයා ප්‍රකාශ කළේය.
“අධිකරණය තුල පෙනී ඉන්න නීතිඥවරු විදියට අපි සියලු නීතිඥවරු මේ ජාතිය වෙනුවෙන්, මේ සිංහලකම වෙනුවෙන්, මේ ශ්‍රී ලංකාව වෙනුවෙන් ඕගොල්ලන්ට පොරොන්දුවක් දෙනවා ඊළඟ ඉදිරි නඩු දිනයේදී මේ වරදට දායක වුනයි කියලා සාක්කි ඇතුව ඔප්පු කරන්න පුලුවන් කෙනෙක් හිටියොත්, ඒ හැර අනික් අයව මේ නඩුවේදී මුදාගන්න අපි ඕගොල්ලන් වෙනුවෙන් නීතිඥවරු වෙනුවෙන් මාරවිල නීතිඥ සංගමය ඉතා වෙහෙස මහන්සි වෙලා කටයුතු කරනවා කියලා,” යි සභාපති ලලන්ත සරත්චන්ද්‍ර මාරවිල උසාවි භූමියේ රැස් කමින් සිටි සැකකරුවන්ගේ ඥාතීන් හා හිතවතුන් අමතා කියා සිටියේය.
පොලිසියේ විශේෂ ඒකකයක් විසින් අත් අඩංගුවට ගන්නා ලද සැකකරුවන් 15 බදාදා අධිකරණයටඉදිරිපත් කරන ලද්දේ පාස්කු ඉරිදා ප්‍රහාරයත් සමගම ජනාධිපතිවරයා විසින් නීතිගත කරන ලද හදිසි අවස්ථා විධිවිධාන යටතේය.
මැයි මස 30 දා දක්වා සැකකරුවන් රක්ෂිත බන්ධනාගාර ගතකළ මාරවිල මහේස්ත්‍රාත් හා දිසා විනිසුරු සිරිමෙවන් මහේන්ද්‍රරාජා විසින් එදිනට සැකකරුවන්ට එරෙහි සාක්ෂි සම්පිණ්ඩනයක් ඉදිරිපත් කරන ලෙස පැමිණිල්ල මෙහෙයවූ ජ්‍යෙෂ්ඨ නියෝජ්‍ය පොලිස්පති ප්‍රියන්ත ජයකොඩිට නියම කර ඇත.
මහේස්ත්‍රාත්වරයකුට ඇප දිය නොහැකි වන පරිද්දෙන් එම පනත යටතේ චෝදනා ගොනු කිරීම සම්බන්ධයෙන් පොලිසිය ද මාරවිල නීතිඥ සංගමයේ දෝෂ දර්ශනයට ලක්විය.
මාරවිල නීතිඥ සංගමයේ සභාපතිවරයා විසින් එම සැකකරුවන් “මේ සමාජය ආරක්ෂා කර ගැනීමට, මේ ගම ආරක්ෂා කර ගැනීමට” පෙරමුණ ගත් පිරිසක් ලෙස උත්කර්ෂයට නංවන ලදී.
නඩු ගොනු කිරීම සඳහා ජ්‍යෙෂ්ඨ නියෝජ්‍ය පොලිස්පතිවරයකු පැමිණීම නාත්තන්ඩිය ප්‍රාදේශීය සභාවේ සභාපති ශ්‍රී ලංකා පොදුජන පෙරමුණේ නීතිඥ නිලන්ත ප්‍රනාන්දු විසින් හඳුන්වන ලද්දේ “සිංහලයන් හැටියට ලැජ්ජාවක්” ලෙසිනි.
සැක කරුවන් අධිකරණයට ඉදිරිපත් කරන අවස්ථාවේ දී හමුදා, පොලිස් හා කැරලි මර්ධන ඒකක සහිත දැඩි සන්නද්ධ රැකවල් යොදා තිබෙනු දක්නට ලැබුනි.
Facebook Comments
