පාස්කු ඉරිදා ප්‍රහාරයේ මහමොලකරු ලෙස ශ්‍රී ලංකා රජයේ ආරක්ෂක අංශ විසින් නම් කර ඇති සහරාන් හෂීම් ඉන්දියාවට පැන ගොස් ඇති බව යුද හමුදාවේ ප්‍රධානිය පවසයි.
සහරාන් හෂීම් මරාගෙන මැරුනු බව රහස් පොලිසිය ඇතුළු ආණ්ඩුවේ බලධාරීන් පැවසුවත් ඔහු තවමත් ජීවතුන් අතර ඉන්නා බව 16 බ්‍රහස්පතින්දා පැවති මාධ්‍ය හමුවක දී මාධ්‍යවේදියෙකු නැඟු පැනයකට පිළිතුරු දෙමින් යුද හමුදාපති ලුතිනන් ජෙනරාල් මහේෂ් සේනානායක කියා සිටියේය.
දෙසිය පනහකට අධික පිරිසක් මරුමුවට පත්වූ බෝම්බ ප්‍රහාර මාලාවෙන් එකක් සිදුකෙරුනු ෂැන්ග්‍රිලා තරු පන්තියේ හෝටලයේදී ජාතික තව්හීඩ් ජමාත් (NTJ) ඉස්ලාමීය සංවිධානයේ නායක සහරාන් හෂීම් මවුලවි මියගිය බව පොලිසිය අධිකරණයට දැනුම් දී තිබුනි.
“ඉන්දියාවේ ගියපු තැනක් ගත්තොත් මං කියලා තියෙනවා බැංගලෝර් කියලා. මං කියලා තියෙනවා කාශ්මීර් කියලා. මම දකුණු ඉන්දියාවේ කොටසක් කේරලය කියලා කියලා තියෙනවා,” යැයි දෙස් විදෙස් මාධ්‍යවේදීන් හමුවේ යුද හමුදාපතිවරයා කියා සිටියේය.
තරු පන්ති හෝටලයේ මරාගෙන මැරෙන බෝම්බය පුපුරුවා ගත් තැනැත්තගේ හා පොලිස් බාරයේ පසුවන සහරාන් හෂීම් දියණියගේ ඩී.එන්.ඒ පරික්ෂාවක් සිදු කිරිමට අධිකරණය විසින් පසුගියදා අවසර ලබා දී තිබුනි.
Facebook Comments
