මත්ද්‍රව්‍ය ඡාවාරම්කරුවෙකු හා පාතාල නායකයෙකු ලෙස හඳුන්වනු ලබන මාකඳුරේ මධුෂ් හට එල්ල වන චෝදනා සියල්ලම හිටපු ආරක්ෂ ලේකම්වරයාටද එල්ලවන බව බන්ධනාගාර රැඳවියන්ගේ අයිතිවාසිකම් සුරැකීමේ කමිටුව පෙන්වා දී තිබේ.
මධුෂ් හට එල්ලවන මත්කුඩු ඡාවාරම හා මීනිමැරීමට අනුබල දීම යන චෝදනා ගෝඨාභය රාජපක්ෂ ඇතුලු මැති ඇමැතිවරුන් කිහිප දෙනෙකුටම එල්ල වී ඇති බවයි එම කමිටුවේ කැඳවුම්කාර සුදේශ් නන්දිමාල් චෝදනා කරන්නේ.
“ඔය මධුෂ්ට තියෙන විදියටම කුඩු චෝදනාව තියෙනවා හිටපු ආරක්ෂක ලේකම්ට, එ් වගේම හිටපු ඇමැති ලංසට, හිටපු මන්ත්‍රී දුමින්ද සිල්වාට, මේගොල්ලන්ටත් තියෙනවා මේ රටට කුඩු ගෙනවා, කුඩු බෙදා හරිනවා කියලා.” යි නන්දිමාල් පැවසීය.
සියල්ලටම එකම ආකාරයේ චෝදනා එල්ල වන විට හිටපු මැති ඇමැතිවරුන්ට හා ආරක්ෂ ලේකම්වරයාට එල්ල වන චෝදනා වලට වඩා වැඩි ප්‍රචාරයක් මධුෂ් හට පමණක් ලබා දෙන්නේ ඇයි දැයි සිතා ගත නොහැකි බවයි හෙතෙම පවසන්නේ.
මධුෂ් හට කිසිඳු අධිකරණය මත් කුඩු සම්බන්ධව චෝදනාවක් නොමැති බවට අවධාරණය කරන සුදේශ් නන්දීමාල් ඔහුට ද ඇත්තේ හිටපු ආරක්ෂක ලේකම්වරයාට එල්ල වන මිනීමැරුම් මෙහෙය වු බවට වන චෝදනා බවයි පෙන්වා දෙන්නේ.
“මිනිමැරුම් චෝදනා ඔහුට තියෙනවා. ඔහු මෙහෙයුව සංවිධානය කර කියලා. එ් චෝදනාවම දේශපාලකයින්ට තියෙනවා, හිටපු ආරක්ෂ ලේකම්ටත් තියෙනවා. සුදු වෑන් සංස්කෘතිය ගෙනාවේ ආරක්ෂ ලේකම් කියලා කියනවා, සුදු වෑන් වලින් පැහැරගෙන ගිහිල්ලා ඝාතනය කරන්න සැලසුම් කරා කියලා චෝදනා තියෙනවා. එක්නැළිගොඩ ඝාතනය, ලසන්ත වික්‍රමතුංග වගේ මාධ්‍යවේදියෝ ඝාතනය කලා කියලා හිටපු ආරක්ෂ ලේකම්ට චෝදනා තියෙනවා. ඔහු තමයි ඒවා මෙහෙයවුවේ කියලා.”
පිටරට සිට මිනිමැරුම් මෙහෙයවු බවට චෝදනා කර මධුෂ් අත්අඩංගුවට ගන්නේ නම් ඒ ආකාරයෙන් හිටපු ආරක්ෂ ලේකම් ගෝඨාභය රාජපක්ෂ ද අත්අඩංගුවට ගත යුතු බව සුදේශ් නන්දිමාල් පැවසීය.
මත්ද්‍රව්‍ය හෝ මිනිමැරීමට මධුෂ් සම්බන්ධව ඇත්නම් ඔහු අත්අඩංගුවට ගෙන නඩු පැවරිය යුතු බවට අවධාරණය කරන බන්ධනාගාර රැඳවියන්ගේ අයිතිවාසිකම් සුරැකීමේ කමිටුවේ කැඳවුම්කාර සුදේශ් නන්දිමාල් “මම හිතන්නේ මධුෂ්ට කිසිම චෝදනාවක් දන්න තරම් සාක්ෂි නැහැ.” යැයි වැඩි දුරටත් කියා සිටියේය.
Facebook Comments
