“අපරාධකරුවන් වීරයන් කරන්න එපා” විග්නේස්වරන් මුල්ලිවයික්කාල් සමරුවේදී (VIDEO)

0

යමෙක් අපරාධ කරුවකු බවට තීන්දු කිරීමේදී එම තැනැත්තා අයත් වන ජාතිය කවරක් ද යන්න ශ්‍රී ලංකාවේදී සලකා බලෙන බවට මුල්ලිවයක්කාල් නම වන සමරුවේ දේශනය පවත්වමින් උතුරු පළාත් මහ ඇමැතිවරයා චෝදනා කර තිබේ.

යුද අපරාධ සහ මානව වර්ගයාට එරෙහි අපරාධ සම්බන්ධයෙන් යුක්තිය ඉටු කිරීමට ආණ්ඩුවට කල් දීම ගැනද සී වී විග්නේස්වරන් දහස් සංඛ්‍යාත ජනකායකගේ සහභාගිත්වයෙන් පැවති මුල්ලිවයික්කාල් සමරුවේදී සිය විරෝධය පල කළේය.

යුද්ධයේ අවසාන දින කීපයේදී රජය විසින් යුද මුක්ත කලාපයක් ලෙස හඳුන්වා දීමෙන් අනතුරුව කොටුවී සිටි නිරායුද දහස් ගණනක් බර අවි ප්‍රහාරයෙන් මියගියේ මුල්ලිවයික්කාහිදි වන අතර එහි නමවන අනුස්මරණය 18 සිකුරාදා කප්පල් අඩි පාදෙයි වෙරළ තීරයේ දී පුෂ්පදීප දල්වා සිදු කරනු ලැබීය.

මුල්ලිවයික්කාල් අනුස්මරණ භූමියේ දී මවත් පියාත් යුද්ධයෙන් අහිමිවූ කේසවන් විනීතා විසින් සමරු දීපය දල්වමින් සමරුව ආරම්භ කරන ලදී.

රටේ ඉහලම බලධාරින් විසින් අපරාධ වලට සම්බන්ධ එකඳු සෙබලෙකුටවත් හිරේ යන්නට ඉඩ නොතබන බව කී මහ ඇමැතිවරයා එයින් අදහස් වන්නේ අපරාධකරුවන් තීරණය වන්නේ අයෙකුගේ ජාතිය හා ප්‍රජාව සලකා බලා දැයි සමරු දේශනය පවත්වමින් ප්‍රශ්න කළේය.

යුද්ධයේ සිදුවූ අපරාධ සම්බන්ධයෙන් තිරසාර විසඳුම් ලබා නොදී වෙනත් යෝජනා කිරීම යුක්තිය ඉල්ලා සටන් කරන ජනතාව මන්දෝත්සාහී කිරීමට දරන ප්‍රයත්නයක් බවට උතුරු පළාත් මහ ඇමැති සි.වී. විග්නේස්වරන්ගේ දැඩි දෝෂ දර්ශණයට ලක්විය.

කොටි සමරුවක් නෙමේ

දෙමළ ජන සංහාරය සම්බන්ධයෙන් රට තුල යුක්තිය ඉටු වීම ගැන බලවත් අවිශ්වාසයක් පල කල උතුරු පළාත් සභා මන්ත්‍රී එම් කේ සිවාජිලිංගම් ජාත්‍යන්තරය මැදිහත් වී දෙමළ ජනයාට යුක්තිය ඉටු කල බවට සමැරුම් භූමියේදී මාධ්‍යවේදීන් හට සිංහලෙන් ප්‍රකාශයක් දෙමින් කියා සිටියේය.

දකුණේ ඇතැම් කොටස් විසින් මුල්ලිවයික්කාල් සමරුව කොටි සමරුවක් ලෙස අර්ථ ගැන්වීමට විරෝධය පල කල මන්ත්‍රීවරයා මෙය යුද්ධයෙන් මියගිය සිවිල් ජනයා වෙනුවෙන් පවත්වනු ලබන අනුස්මරණයක් බව අවධාරණය කළේය.

දෙමළ ජනතාවට යුක්තිය ලබා දීමට එක්වන ලෙස සිවාජිලිංගම් මන්ත්‍රීවරයා යුක්ති ගරුක සිංහල ජනතාවට ආයාචනයක්ද කළේය.

මුල්ලිවයික්කාල් ප්‍රධාන සමරුවට සහභාගි වීම සඳහා යන වාහන මග නැවතූ ශ්‍රී ලංකා යුද හමුදා භට පිරිස් එහි ගමන් ගන්නා අයට සිසිල් පැන් දන්සැලක් පවත්වනු දැක ගන්නට ලැබිනි.

ශ්‍රී ලංකා යුද හමුදාව උතුරේ දියත් කළ යුද්ධයෙන් සාමාන්‍ය වැසියන් අඩුම වශයෙන් හැත්තෑ දහසක්වත් මිය යන්නට ඇති බව එක්සත් ජාතීන්ගේ සංවිධානය ගණන් බලා තිබේ.

Facebook Comments