මැලේසියාවේ හිටපු අගමැතිගේ ගෙදර ලංකාවේ සල්ලි

0

බරපතල මුල්‍ය අක්‍රමිකතා සහ දුෂණ සම්බන්ධව චෝදනා ලබා සිටින මැලේසියාවේ හිටපු අගමැතිවරයාට අයත් පෞද්ගලික නිවසක තිබී ‘ශ්‍රී ලංකා රුපියල්’ මිලියන 2.87ක් සොයාගෙන ඇති බව විදෙස් මාධ්‍ය වාර්තා කරයි.

හිටපු අගමැති නජීබ් රසාක්ට අයත් නිවසක් සහ එම පවුලට අයත් ස්ථාන හයක් පසුගිය 16,17 යන දිනවල පරීක්ෂා කිරීමට එරට ආරක්ෂක අංශ කටයුතු කල අතර එහිදී මෙම මුදල් තොගය සොයාගෙන ඇත.

මෙම පරීක්ෂාවේ දී මිල අධික අත්බෑග් සහ ඔරලෝසූ බහාලූ පෙට්ටි 284ක් සහ මුදල් බහාලූ මළු 72ක් ආරක්ෂක අංශ සොයාගෙන තිබේ.

හිටපු අගමැතිවරයා විසින්ම ආරම්භ කරනු ලැබු ‘1 මැලේසියා ඩිවලොප්මන්ට් බර්හාඩ්’ රාජ්‍ය අරමුදලෙන් ඩොලර් බිලියන ගණනක මුදලක් වංචා කළ බවට චෝදනා එල්ලවී ඇති අතර මේ සම්බන්ධයෙන් ඇමෙරිකා එක්සත් ජනපදය ඇතුළු රටවල් හයක පොලිස් පරීක්ෂණ පැවැත්වෙමින් ඇත.

මැලේසියානු පොලිසියේ වාණිජ අපරාධ ඒකකය විසින් වැටලීම් කර තිබෙන අතර මුදල් විශුද්ධිකරණයට එරෙහි පනත, ත්‍රස්තවාදයට මුදල් සැපයීමට එරෙහි සහ නීති විරෝධී ක්‍රියාවලට එරෙහි පනත් යටතේ මෙම වැටලීම් සිදුකර ඇති බවයි එරට මාධ්‍ය වාර්තා පෙන්වා දෙන්නේ.

Facebook Comments