යුද්ධයෙන් සිවිල් වැසියන් මිය ගිය බව ජනපති පිළිගනී (VIDEO)

1

උතුරේ පැවති යුද්ධයේ දී සිවිල් වැසියන් මියගිය බවට ජනාධිපතිවරයා යුද්ධයේ දී මියගිය හමුදා සෙබලුන් වෙනුවෙන් පැවති රාජ්‍ය සැමරුමක දී පිළිගෙන තිබේ.

කොපමණ සිවිල් ජනතාවක් මියගිය බව නිවැරදිව කිව නොහැකි වුවද වසර තිහකට ආසන්න කාලයක් පැවැති යුද්ධය තුල සිවිල් වැසියන් ලක්ෂයකට ආසන්න ප්‍රමාණයක් මිය යන්නට ඇති බවට ඔහු විශ්වාසය පල කළේය.

“සිවිල් ජනතාවගේ පැත්තෙන් මියගිය සංඛ්‍යාව නිවැරදිව මෙතෙකයි කියා කීමට හැකියාවක් නැහැ. එවකට සිදුවූ සිදුවීම්වල අත්දැකීම් ඇති අපිට ඒ මතකය අවදි කිරිම තුළ විශ්වාස කළ හැකියි ලක්ෂයකට ආසන්න සංඛ්‍යාවක් අපේ රටේ මිය ගිය බව. ඒ මිය ගියේ සිංහල, දමිළ, මුස්ලිම් සියලු ජන කොටස්.” යැයි ජනාධිපතිවරයා කියා සිටියේය.

ශ්‍රී ලංකා යුද හමුදාව උතුරේ දියත් කළ යුද්ධයේ අවසන් සටනින් සාමාන්‍ය වැසියන් හැත්තෑ දහසක්වත් අඩුම වශයෙන් මිය යන්නට ඇති බව එක්සත් ජාතීන්ගේ සංවිධානය ගණන් බලා තිබේ.

රාජ්‍ය මාධ්‍යයට වෙඩි මුරයක්

යුද්ධයේ දී මියගිය හමුදා සෙබලුන් හරියාකාරකව ඇගයීමට ලක් නොකරන බවට රාජ්‍ය මාධ්‍ය මෙහිදී ජනාධිපතිවරයගේ දෝෂ දර්ශණයට ලක් විය

රාජ්‍ය මාධ්‍ය මෙන්ම රාජ්‍ය නොවන මාධ්‍යය ද වත්මන් රජය හමුදා සෙබලුවෙනුවෙන් ගෙන යන වැඩපිළිවෙල පිළිබඳව ප්‍රචාරයක් ලබා නොදීම සම්බන්ධව 19 සෙනසුරාදා පාර්ලිමේන්තු ක්‍රීඩාංගණයේ ඉදිකර ඇති රණවිරු ස්මාරයක අසල පැවති ජාතික රණවිරු සැමරුම් දින දේශනයේ දී ජනපති මෛත්‍රීපාල සිරිසේන සිය කණගාටුව පල කළේය.

“මා කනගාටුවෙන් වූවත් කිව යුතුයි රාජ්‍ය මාධ්‍යවලටත් රණවිරුවා පිළිබඳව පැහැදිලි ඇගයීමක් කරන්නට ඔවුන්ට කුමක්දෝ අතපසුවීමක් ඇතිවී තිබෙනවා.මා රාජ්‍ය මාධ්‍ය ආයතනවලට පැහැදිලිවම කියනවා රණවිරුවාට දිය හැකි ගෞරවය සහ සැබෑ රණවිරුවා ජීවිතය පරිත්‍යාග කරමින් කළ කැපකිරීම් පිළිබඳව කිසිවිටකත් අමතක නොකරමින් ජනතාවට ඒ මතකය අවදි කරමින් ඔවුන්ට ලබා දිය යුතු ගෞරවය සැමවිටම ලබා දෙන්න කියා.”

“රාජ්‍ය නොවන මාධ්‍ය ආයතන රණවිරුවන් වෙනුවෙන් අපේ රජය කරනු ලැබූ සේවාවන් පිළිබඳව කතා නොකිරීම පිළිබඳවත් මම කනගාටු වෙනවා.” යි ජනාධිපති මෛත්‍රීපාල සිරිසේන කියා සිටියේය.

කෙසේ වෙතත් යුද්ධයේදී මියගිය සෙබලුන් අනුස්මරණය වෙනුවෙන් පැවති ජාතික රණවිරු සැමරුම් උළෙල රාජ්‍ය රූපවාහිනි නාළිකා සහ පුද්ගලික රූපවාහිනි සියල්ලම පාහේ විසින් සජීවීව විකාශය කරන ලදී.

Facebook Comments

wedding people