ජෝ බයිඩන් ඊශ්‍රායලයට යද්දී යුද ප්‍රහාරයට ජාත්‍යන්තර විරෝධය

දස දිනකට ඉහත දී ඇරඹි ඊශ්‍රායල හා පලස්තීන ගාසා යුද ගිනි දැල් මැද අමෙරිකානු ජනපතිවරයා අද ඊශ්‍රායලයට පැමිණි තිබේ.

එක්සත් ජනපද රාජ්‍ය නායකයකු යුද සමයක ඊශ්‍රායලයට පැමිණි මුල්ම වතාව මේ සංචාරය ලෙස සැලකේ. ජෝ බයිඩන්ට පෙර ඇමරිකානු රාජ්‍ය ලේකම් ඇන්තනි බ්ලින්කන් සය දින මැද පෙරදිග සංචාරයක යෙදෙමින් ඔවුන්ගේ සහාය ලබන ඊශ්‍රායල අගමැති බෙන්ජමින් නෙතන්යාහු මෙන්ම අරාබි නායකයන්ද මුණ ගැසී තිබුණි.

එසේ වෙතත්, ගාසා තීරයේ යුද්ධයෙන් උන්හිටි තැන් සහ ජලය ආහාර හා ඖෂධ නොමැති ලක්ෂ සංඛ්‍යාත ජනකායකටද, ජීවිත අහිමි කෙරෙන දහස් ගණනකටද සහනයක් සලසන්නට රාජ්‍ය ලේකම්ගේ සංචාරයට හැකියාවක් ලැබී නැත.

කෙසේවෙතත්, ගාසා තීරයේ උතුරුදිග රෝහලකට ඔක්තෝබර් 17 වැනිදා එල්ලවූ බෝම්බ ප්‍රහාරයකින් 500කට වැඩි පලස්තීනුවන් පිරිසක් මියයාමත් සමඟ අමෙරිකානු ජනාධිපති ජෝ බයිඩන් හමුවීමට අරාබි නායකයන් කැඳවා තිබුණු රැස්වීම ද අවලංගු කර තිබේ.

දරුවන් හා කාන්තාවන් මෙන්ම යුද අනාථයන්ද ලැගුම් ගෙන සිටි අල් අහිල් රෝහලට ගුවන් බෝම්බ ප්‍රහාරයක් එල්ල කළ බවට චෝදනා ලබන ඊශ්‍රායලය පවසන්නේ මග වැරදී කඩා වැටුණු ඉස්ලාමීය ජිහාඩ්වාදීන්ගේ රොකට්ටුවකින් හානිය සිදුවූ බවයි.

රෝහල් විනාශය සමග කෝපාවිෂ්ටවූ පලස්තීනයේ බටහිර ඉවුර ඇතුළු අරාබිකරයේ ජනතාව වීදි බැස විරෝධතා දක්වන දර්ශන සමාජ මාධ්‍ය මෙන්ම ප්‍රධාන ජාත්‍යන්තර මාධ්‍යවලද ප්‍රධාන තැනක් ගෙන තිබේ.

අමෙරිකානු නායකයා, 18 දා අන්තර්වාර යුද කැබිනට්ටුව සමඟ සාකච්ඡා කිරීමට පෙර ඊශ්‍රායල අගමැතිවරයා සමග මාධ්‍යවේදීන් හමුවේ ප්‍රකාශ කළේ ඊශ්‍රායලයට යුද සහ ආර්ථික ආධාර ඇතුළු පූර්ණ සහාය දෙන බවයි.

ඒ සමගම සවුදි අරාබියේ ජෙඩා නුවර හදිසි සමුළුවකට සහභාගී වූ ඉරාන විදේශ ඇමැති හොසේන් අමීර් අබ්දුලාහියාන් මාධ්‍යවේදීන්ට ප්‍රකාශ කළේ ඊශ්‍රායල තානාපතිවරුන් ඒ රටවලින් පිටමන් කොට ඊශ්‍රායලයට පූර්ණ සම්බාධක පැනවීමට තෙල් අපනයනය කරන රටවලින් සැදුම්ලත් ඉස්ලාමීය සහයෝගිතා සංවිධානය (OIC) තීන්දු කළ බවයි.

ගාසාවට මානුෂීය ආධාර යවනු පිණිස සටන් විරාමයක් ක්‍රියාත්මක කරන ලෙස ඉල්ලා එක්සත් ජාතීන්ගේ ආරක්ෂක මණ්ඩලය හමුවේ 16 දා රුසියාව ගෙනා යෝජනාවක් පරාජයට පත්වූයේ ඊට අවශ්‍ය රටවල් 9ක ඡන්දය නොලැබී යාම නිසාය. එක්සත් ජනපදය, බ්‍රිතාන්‍යය, ප්‍රංශය සහ ජපානය ඊට විරුද්ධව ඡන්දය පාවිච්චි කළ රටවල් වෙයි. රටවල් හයක් ඡන්දය දීමෙන් වැළකී සිටියේය.

දකුණු අප්‍රිකාවේ සිට නෝර්වේ දක්වාත් මැද පෙරදිග රටවල සිට දකුණු ආසියාතික රටවල් දක්වාත් ගාසා තීරය වටලෑම අවසන් කිරීම සඳහා වන ඉල්ලීම් පසුගිය සතිය තුළ වර්ධනය වෙමින් තිබුනි.

හමාස් සංවිධානය විසින් ඔක්තෝබර් 7 වැනිදා ඊශ්‍රායලයට එල්ල කළ පෙර නොවූ විරූ අනපේක්ෂිත ප්‍රහාරයෙන් පසුව, බොහෝ ජාත්‍යන්තර ප්‍රජාව ආතතීන් උත්සන්න වීම ගැන සිය කනස්සල්ල කඩිමුඩියේම පළ කළේය.

කෙසේ වෙතත් මෙම ප්‍රහාරයට ප්‍රති ප්‍රහාර ලෙස ඊශ්‍රායලය විසින් ගාසා තීරයේ බටහිර ඉවුරේ ජිවත්වන පලස්තීන සාමාන්‍ය ජනතාවට එල්ල කරන ලද ප්‍රහාරයන් විිදේශිය රටවල බොහෝ රජයන්ගේ විවේචනයට ලක්ව ඇති අතර ඇතැම් රජයන් ඔවුන්ව ඉතා දැඩි ලෙස විවේචනයට ලක් කර ඇත.

යුද ගැටුමේ දස දිනක් තුලදී පලස්තීනුවන් 3,500ක් මරුමුවට පත්වී ඇති අතර තුවාල ලද සංඛ්‍යාව 12,500 ඉක්මවන බව පලස්තීන සෞඛ්‍ය බලධාරීහු කියති. තවත් සිය ගණනක් සුන්බුන්වලට යටවී ඇති බවට විශ්වාස කෙරේ.

ඊශ්‍රායල් බලධාරීන්ගේ සංඛ්‍යාලේඛන අනුව ඊශ්‍රායලුන් 1,400ක් මරුමුවට පත්වී ඇත. 200කට ආසන්න පිරිසක් 7 දා කඩා වැදී ප්‍රහාරයක් එල්ල කළ හමාස් සටන්කාමීන් විසින් පැහැරගෙන ගොසිනි.

ඊශ්‍රායලයේ ආක්‍රමණශීලී ප්‍රහාර හමුවේ ගාසා තීරයෙන් පලා එන්නන්ට සරණ වෙමින් තුවාලකරුවන්ට ප්‍රතිකාර කිරීමට ස්කොට්ලන්තයේ ඇති සුදානම මහ ඇමැති හම්සා යුසෆ් විසින් ප්‍රකාශයට පත් කර ඇති අතර සටන් විරාමයකට යන ලෙස රටවල් ගණනාවක්ම යුද වැදී සිටින පාර්ශවයන්ගෙන් ඉල්ලා තිබේ.

ඇල්ජීරියාව

ගාසා තීරයට ඊශ්‍රායලය එල්ල කරන ලද ප්‍රහාර සම්බන්ධයෙන් ඇල්ජීරියානු විදේශ කටයුතු අමාත්‍යාංශය ඔවුන්ගේ දැඩි කනස්සල්ල පළ කර ඇති අතර, එය ජාත්‍යන්තර මානුෂීය නීතිය උල්ලංඝනය කරන බවට චෝදනා කර තිබේ.

තවද පලස්තීන ජනතාව ආරක්ෂා කිරීම සඳහා වහාම ජාත්‍යන්තර මැදිහත් වන ලෙස ඉල්ලා සිටින ඇල්ජිරියාව, ගැටුම් නිරාකරණය කිරීම මෙම ජනතාවගේ කේන්ද්‍රීය අයිතිවාසිකමක් බවද අවධාරණය කර ඇත.

අප්‍රිකානු සංගමය

අප්‍රිකානු සංගමයේ සභාපතිනි මෞසා ෆාකි මහාමත් විසින් පලස්තීන ජනතාවගේ මූලික අයිතිවාසිකම් ප්‍රතික්ෂේප කිරීම වත්මන් තත්වය ඇතිවීමට ප්‍රධාන හේතුව බව පවසා තිබේ. මිලිටරි සතුරුකම් අවසන් කර නැවත සාකච්ඡා මේසයට පැමිණෙන ලෙස අප්‍රිකානු සංගමය දෙපාර්ශවයටම ආයාචනා කර තිබේ.

බෙලීස්

හමාස් සහ ඊශ්‍රායලය අතර එදිරිවාදිකම් ඉතා ඉක්මනින් නැතිකරගන්නා ලෙස ඉල්ලා සිටිනා බෙලිස් රාජ්‍යය පලස්තීන රාජ්‍යයකට සහය දෙන බව පවසා ඇත. නැගෙනහිර ජෙරුසලම පලස්තීන අගනුවර ලෙස පිළිගත යුතු බවත් ඔවුන්ගේ මුතුන් මිත්තන්ගේ මව්බිමෙන් අවතැන් වූ පලස්තීනුවන්ට නැවත පැමිණීමේ අයිතිය ඉල්ලා සිටී.

බ්‍රසීලය

බ්‍රසීලයේ විදේශ අමාත්‍ය මෞරෝ ලුඉස් ලෙකර් වීරා සිකුරාදා පැවසුවේ “ඊශ්‍රායල හමුදා උතුරු ගාසා තීරයේ වෙසෙන මිලියනයකට වඩා වැඩි සිවිල් වැසියන්ට පැය 24 ක් ඇතුළත පිටව යන ලෙස ඉල්ලා සිටි බවට වූ පුවත දැනගන්නට ලැබීමෙන් කලකිරීමට පත්වූ” බවයි.

එක්සත් ජාතීන්ගේ ආරක්ෂක කවුන්සිලයේ රැස්වීමකින් පසු නිව්යෝර්ක්හි දී කතා කළ සිටි වීරා, එවැනි විශාල පරිමාණයේ මිනිසුන්ගේ චලනය සිවිල් වැසියන්ට “පෙර නොවූ විරූ දුක්ඛිත තත්වයන්” උදා කළ හැකි බවට එක්සත් ජාතීන් කර ඇති අනතුරු ඇඟවීම ගැන සඳහන් කරමින් දෙපාර්ශවයෙන්ම ප්‍රචණ්ඩත්වය අවසන් කරන ලෙස ඉල්ලා සිටියේය.

කොලොම්බියාව

කොලොම්බියානු ජනාධිපති ගුස්ටාවෝ පෙට්‍රෝ ඊශ්‍රායලය සහ පලස්තීනය සාකච්ඡා මේසයට පැමිණ රාජ්‍ය දෙකක විසඳුමක් සඳහා කටයුතු කිරීමේ අවශ්‍යතාව අවධාරණය කළේය. ඔහු ගාසා තීරයේ තත්වය සහ අතීත කුරිරුකම් අතර ඓතිහාසික සැසඳීමක් සිදු කළේය.

ඔහුගේ ට්විටර් ගිණුමේ පළ කරන ලද ප්‍රකාශයකින් ඔහු මෙසේ පැවසීය: “යුදෙව් සහ සමාජවාදී කැරැල්ලට ප්‍රතිචාර වශයෙන් නාසි ම්ලේච්ඡත්වය විසින් විනාශ කළ වෝර්සෝ ගෙටෝවට වඩා අද ගාසා තීරය විනාශ වී ඇති බවක් දක්නට ලැබේ”.

කියුබාව

කියුබාව ඊශ්‍රායලයේ සහ පලස්තීනයේ ප්‍රචණ්ඩ ක්‍රියා හෙළා දැක ඇති අතර එය දිගු කලක් තිස්සේ පලස්තීන අයිතිවාසිකම් උල්ලංඝනය කිරීමක් ලෙස සඳහන් කර තිබේ.

ඉන්දුනීසියාව

ඉන්දුනීසියාව තවදුරටත් ජීවිත හානි වැළැක්වීම සඳහා ප්‍රචණ්ඩත්වය වහා නතර කරන ලෙස ඉල්ලා ඇති අතර, ඊශ්‍රායලය විසින් පලස්තීන භූමි ප්‍රදේශ අත්පත් කර වාඩිලෑම මෙම ගැටුමට මූලික හේතුව බව තර්ක කරයි.

ඉරාකය

ඉරාකය ද ගාසා තීරයට එල්ල කරන ප්‍රහාර ඊශ්‍රායල ආක්‍රමණය යටතේ පලස්තීනුවන් පීඩාවට පත්කිරීමේ අඛණ්ඩ පැවැත්මක් ලෙස හඳුන්වයි.

ඉරානය

ඉරානයේ විදේශ අමාත්‍යාංශයේ ප්‍රකාශක නසර් කන්නානි පලස්තීන ප්‍රතිරෝධය විස්තර කර ඇත්තේ ඊශ්‍රායලයේ ප්‍රකෝපකරනයන්ට ස්වභාවික ප්‍රතිචාරයක් ලෙසයි.

අයර්ලන්තය

අයර්ලන්තයේ හි අගමැති ලියෝ වරද්කර් ඊශ්‍රායලය විසින් විදුලිය, ඉන්ධන සැපයුම් සහ ජලය කපා හැරීම හෙළා දකින අතර එය ජාත්‍යන්තර මානුෂීය නීතිය උල්ලංඝනය කිරීමක් සහ සහ සාමූහික දණ්ඩනයක් ලෙස හඳුන්වයි.

කුවේටය

කුවේටයේ විදේශ කටයුතු අමාත්‍යාංශය ගාසා තීරයේ සටන් උත්සන්න වීම පිළිබඳව කනස්සල්ල පළ කර ඇති අතර, ප්‍රචණ්ඩත්වය නැවැත්වීමට, පලස්තීන ජනතාව ආරක්ෂා කිරීමට සහ ඊශ්‍රායලයේ ප්‍රකෝප කිරීම් අවසන් කරන ලෙස ජාත්‍යන්තර ප්‍රජාවෙන් ඉල්ලා සිටී. බාධාවකින් තොරව ප්‍රචණ්ඩත්වය දිගටම පැවතීම සාම ප්‍රයත්නයන් සහා රාජ්‍ය දෙකක විසඳුමක අපේක්ෂා අඩපණ කරනු ඇතැයි අනතුරු අඟවා තිබේ.

මොරොක්කෝව

ඒබ්‍රහම් ගිවිසුම යටතේ ඊශ්‍රායලය සමඟ පූර්ණ රාජ්‍ය තාන්ත්‍රික සබඳතා කරා ගමන් කරන මොරොක්කෝව, ගාසා තීරයේ තත්වය පිළිබඳව දැඩි කනස්සල්ල පළ කර ඇති අතර, ප්‍රචණ්ඩත්වය වහා නතර කර සන්සුන් වන ලෙස ඉල්ලා තිබේ. තවද රාජ්‍ය දෙකක විසඳුමකට එළඹීමේ මාර්ගය ලෙස සංවාදයේ සහ සාකච්ඡාවල වැදගත්කම අවධාරණය කර සිටි.

අරාබි ලීග සැසියකදී මොරොක්කෝවේ විදේශ කටයුතු අමාත්‍ය නසාර් බෞරිටා, පලස්තීනය සඳහා මොරොක්කෝවේ “පූර්ණ සහ නොසැලෙන සහයෝගය” අවධාරණය කළේය.

මැලේසියාව

ගැටුමේ මූල හේතුව ලෙස අල්-අක්සා පල්ලිය කෙලෙසීම, පෙන්වා දී ඇති අතර පලස්තීන ජනතාවගේ දිගුකාලීන වාඩිලෑම සහ දුක් වේදනා ඉස්මතු කරමින් ගාසා තීරයේ ප්‍රචණ්ඩත්වය අවසන් කරන ලෙස මැලේසියාව ඉල්ලා තිබේ.

මාලදිවයින

ගාසා තීරයේ උත්සන්න වන ප්‍රචණ්ඩ ක්‍රියා පිළිබඳව මාලදිවයින් රජය කනස්සල්ල පළ කර ඇති අතර පලස්තීන ජනතාවට තම සහයෝගය ලබා දෙන බවට යළිත් අවධාරණය කර තිබේ.

මැදපෙරදිග දිගු කාලින සහා කල්පවත්නා සාමයක් අත්කර ගත හැක්කේ 1967 ට පෙර දේශසීමා මත පදනම් වූ රාජ්‍ය දෙකක විසඳුමක් හරහා පමණක් බවත්, නැගෙනහිර ජෙරුසලම පලස්තීනයේ අගනුවර වන බවත් එහි රජය පවසා ඇත.

නෝර්වේ

නෝර්වේ විදේශ ඇමති ඇනිකෙන් හුට්ෆෙල්ඩ් ගාසා තීරය සම්පූර්ණයෙන් අවහිර කිරීම පිළිගත නොහැකි බවට විවේචනය කර ඇති අතර ඊශ්‍රායලයේ ආත්මාරක්ෂාව සඳහා ඇති අයිතිය ජාත්‍යන්තර නීතියට අනුගත විය යුතු බව අවධාරණය කළේය.

“ඊශ්‍රායලය විසින් ගාසා තීරයේ සිවිල් ජනතාවගේ පැවැත්ම සඳහා අත්‍යවශ්‍ය වන විදුලිය, ජලය, ආහාර සහ වෙනත් භාණ්ඩ සඳහා ප්‍රවේශය ඇතුළුව සියලු දේ සම්පුර්ණයෙන් අවහිර කිරීම පිළිගත නොහැකි” යයි හුට්ෆෙල්ඩ් ප්‍රකාශයක් නිකුත් කරමින් කියා සිටි.

“ගාසා තීරයේ විනාශයේ පරිමාණය අතිමහත්ය. සිවිල් වැසියන් විශාල ප්‍රමාණයක් මිය ගොස් ඇත. ඊශ්‍රායලයේ සම්පූර්ණ අවහිර කිරීම්, දේශසීමා හරස් මාර්ග වසා දැමීම සහා ඊශ්‍රායල ප්‍රහාර අඛණ්ඩව සිදු කිරීම හේතුවෙන් ගාසා තීරයේ සිවිල් ජනතාව ඉදිරි දිනවලදී ඊටත් වඩා දුෂ්කරතාවන්ට මුහුණ දෙනු ඇතැයි මම බිය වෙමි” යැයි ඇය තව දුරටත් කියා සිටියාය.

ඕමානය

ඕමානයේ විදේශ කටයුතු අමාත්‍යාංශය පලස්තීන සහ ඊශ්‍රායල ජාතිකයන් අතර සිදුවෙමින් පවතින ප්‍රචණ්ඩ කාරී කටයුතු උත්සන්න වීම පිළිබඳව කනස්සල්ල පළ කර ඇති අතර, දෙපාර්ශවයම සංයමයෙන් ක්‍රියා කිරීමේ අවශ්‍යතාවය අවධාරණය කර ඇත. උත්සන්න වීම නැවැත්වීමට ජාත්‍යන්තර මැදිහත්වීමක් අවශ්‍ය බව ද කියා සිටී.

ජාත්‍යන්තර නීතියට අනුගත වීමේ වැදගත්කම අවධාරණය කරමින් ඕමානය, දෙරටේ විසඳුම පලස්තීන ප්‍රශ්නයට සාධාරණ, විස්තීර්ණ සහ කල්පවත්නා විසඳුමක් සෙවීමේ උපායමාර්ගික අවශ්‍යතාවය අවධාරණය කළේය.

පකිස්ථානය

පකිස්තානයේ දැනට භාරකාර තනතුර දරන එෆ් .එම් ජලීල් අබ්බාස් ජිලානි, වටලනු ලැබූ ගාසා තීරයට ඊශ්‍රායල බෝම්බ හෙලීම හෙළා දකිමින්, එම ක්‍රියාවන් “ජන සංහාරයකට” සමාන කරයි.

“මෙය මානුෂීය අර්බුදයක්, ජන සංහාරයකට සමාන කළ හැකි තත්වයක්. ඇත්ත වශයෙන්ම, එය පලස්තීනයේ ජනතාවට එරෙහිව ඊශ්‍රායලය විසින් සිදු කරනු ලබන වර්ග සංහාරයකි, ”ජිලානි පැවසීය. “අපගේ ස්ථාවරය නම් ආක්‍රමණිකයා වන ඊශ්‍රායලය පලස්තීන අරගලයට සමාන කිරීමට ගන්නා ඕනෑම උත්සාහයක් පකිස්ථානයට පිළිගත නොහැකි බවයි.”

පකිස්තානය ඊශ්‍රායල රාජ්‍යය පිළි නොගන්නා අතර දෙරටේ විසඳුමක් සඳහා වාඩිලාගෙන සිටින පලස්තීන භූමි ප්‍රදේශවලින් එක්සත් ජාතීන්ගේ යෝජනාවලට අනුකූලව ඉවත් කළ යුතු බව අතීතයේ දී පවසා ඇත.

කටාර් රාජ්‍ය

පලස්තීන අයිතීන් උල්ලංඝණය කිරීම, විශේෂයෙන්ම අල්-අක්සා මුස්ලිම් පල්ලියට කඩා වැදීම හේතුවෙන් ඇති වූ ගැටුම් උත්සන්න වීමට ඊශ්‍රායලය වගකිව යුතු වන අතර ගාසා තීරයේ උත්සන්න වන තත්ත්වය මධ්‍යයේ සංයමයෙන් කටයුතු කරන ලෙස කටාරය සියලු පාර්ශවයන්ගෙන් ඉල්ලා තිබේ.

ජාත්‍යන්තර නීතියට සහ පලස්තීන ජනතාවගේ ඓතිහාසික අයිතිවාසිකම්වලට ගරු කරන ලෙසත්, පලස්තීන සිවිල් වැසියන්ට එරෙහි තවදුරටත් ප්‍රචණ්ඩත්වය වැලැක්වීමටත් ඊශ්‍රායලයට බල කරන ලෙස විදේශ කටයුතු අමාත්‍යාංශය ජාත්‍යන්තර ප්‍රජාවෙන් ඉල්ලා සිටියේය. 1967 නැගෙනහිර ජෙරුසලම එහි අගනුවර වන දේශසීමා මත පදනම්ව ස්වාධීන රාජ්‍යයක් පිහිටුවීම ඇතුළු පලස්තීන අරමුණට සහය දැක්වීම සඳහා කටාරය සිය ස්ථිර ස්ථාවරය යලි අවධාරණය කර ඇත.

රුසියාව

ඊශ්‍රායල-පලස්තීන ගැටුම දේශපාලන හා රාජ්‍ය තාන්ත්‍රික ක්‍රමවලින් මිස බලහත්කාරයෙන් විසඳිය නොහැකි බව රුසියාව අවධාරණය කළේය. රුසියාව වහාම සටන් විරාමයක් ඉල්ලා සිටියේ, ප්‍රචණ්ඩත්වය අත්හැරීම සහ මැද පෙරදිග තිරසාර සාමයක් ඇති කිරීම සඳහා ජාත්‍යන්තර ප්‍රජාවගේ සහාය ඇතිව සාකච්ඡා ක්‍රියාවලියක් ආරම්භ කරන ලෙසයි.

මෙම ගැටළුවට විසඳීම “නැගෙනහිර ජෙරුසලම අගනුවර කොටගත් ස්වාධීන පලස්තීන රාජ්‍යයක් නිර්මාණය කිරීම”යැයි ජනාධිපති ව්ලැඩිමීර් පුටින් අවධාරණය කර තිබේ.

මෙම සතිය මුලදී ප්‍රංශය සහ යුරෝපා සංගමය විසින් ගනු ලැබූ පියවර අනුගමනය කරමින් හමාස් සංවිධානය “ත්‍රස්තවාදී” සංවිධානයක් ලෙස ලැයිස්තුගත කිරීම මොස්කව් ප්‍රතික්ෂේප කර ඇත.

සිරියාව

ඔක්තෝබර් 7 ප්‍රහාරය පිටුපස ඉන්නා පලස්තීන කන්ඩායම්වලට සිරියාව ප්‍රශංසා කර ඇති අතර ඊශ්‍රායලයේ වාඩිලෑම සහ වැටලීම විවේචනය කර තිබේ.

දකුණු අප්‍රිකාව

දකුණු අප්‍රිකානු ජනාධිපති සිරිල් රමෆෝසා සෙනසුරාදා පලස්තීනුවන්ගේ “සාධාරණ අරගලයට” තම රටේ සහයෝගය ප්‍රසිද්ධ ප්‍රකාශයකින් අවධාරනය කළේය.

“මෙහි ඉන්නා අපි සියලු දෙනාම පලස්තීනයේ ජනතාව සමඟ අපගේ සහයෝගීතාවය ප්‍රතිඥා දෙමු,” යි ඔහු පැවසීය.

ඔහු ඊශ්‍රායලය “පීඩක පාලනයක්” ලෙස විස්තර කළ අතර බොහෝ මානව හිමිකම් කණ්ඩායම් පලස්තීනුවන් සම්බන්ධයෙන් ඊශ්‍රායලයේ වර්ණභේදවාදී ප්‍රතිපත්ති ලෙස විස්තර කර ඇති දේ පෙන්වා දුන්නේය.

වෙනිසියුලාව

වෙනිසියුලා රජය ගාසා තීරයේ තත්වය පිළිබඳව සිය කනස්සල්ල පළ කළ අතර 2334 එක්සත් ජාතීන්ගේ ආරක්ෂක කවුන්සිලයේ යෝජනාවට අනුකූලව සෘජු සංවාදයකින් තුලින් පලස්තීන භූමිය පුරා ප්‍රචණ්ඩත්වය අවසන් කරන ලෙස ඉල්ලා සිටියේය. ජාත්‍යන්තර සාමය සහ නීත්‍යානුකූලභාවය රැකගැනීමේ ඇපකරුවකු ලෙස සිය කාර්යභාරය ඉටු කරන ලෙස වෙනිසියුලාව එක්සත් ජාතීන්ගේ සංවිධානයෙන් ඉල්ලා සිටියේය.