නාවික හමුදාවේ 60කට කොරෝනා වැලඳුනේ ආරක්ෂාව නැති නිසාද?

0

ශ්‍රී ලංකා නාවික හමුදාවේ විශාල පිරිසකට එකවර කෝවිඩ් 19 වෛරසය ආසාදනය වී ඔවුන්ගේ දරුමල්ලන් ඇතුළු දහස් ගණනක් නිරෝධායනයට යොමු කිරීමට සිදුවුයේ ආරක්ෂක අංශ නිලධාරීන් සෞඛ්‍ය බලධාරීන්ගේ නිර්දේශ නිසියාකාර පිළිපදින්නේ නැති නිසාදැයි බිය පලවෙමින් පවතී.

වසංගත මර්දනය සඳහා මෙහෙයුම් භාරකාරත්වය පවරා දී තිබෙන හමුදා අංශ වලට විෂයානුබද්ධ දැනුම හා පුහුණුව නොමැති වීම මෙවැනි ව්‍යසන වලට මග පාදන බව සෞඛ්‍ය ක්ෂේත්‍රයේ ක්‍රියාධාරීහු පෙන්වා දෙති.

කොවිඩ් – 19 වෛරසය පැතීරීම වැළැක්වීමේ මධ්‍යස්ථාන ප්‍රධානි, ආරක්‍ෂක මාණ්ඩලික ප්‍රධානි මෙන්ම යුද්ධ හමුදාපති ලුතිනන් ජෙනරාල් ශවේන්ද්‍ර සිල්වා පවසන පරිදි දින දෙකක් තුළ එම වෛරසය ආසාදිතයන් 60 දෙනකු වැලිසර නාවික හමුදා කඳවුර තුලින් වාර්තා වී තිබේ.

මේ එකම ආයතනයක රාජකාරි කරමින් සිටියදී එකවර කොරෝනාබාධිත වූ වැඩිම පිරිස මෙන්ම සංඛ්‍යාවක් එකම දිනයක නිරෝධායනයට යොමු කරන ලද විශාලතම සංඛ්‍යාව ලෙස සැලකේ.

ඒ සමගම වැලිසර පිහිටි නාවික නෞකා ගැමුණු කඳවුරු පරිශ්‍රය හුදෙකලා කිරීමට නාවික හමුදාව කටයුතු කර තිබෙන අතර එහි සිටින 4000 ආසන්න නාවික පුද්ගලයන්, ඔවුන්ගේ පවුල් වල සාමාජිකයන් (වැලිසර නාවික කඳවුර තුල විවාහක නිවාස 194 පිහිටා ඇත) සමග කඳවුර තුලත් හුදෙකලා කර ආයතනික නිරෝධායන කටයුතු සදහා යොමු කර ඇති බව ශ්‍රී ලංකා නාවික හමුදාව පවසයි.

වැලිසර නාවික හමුදා කඳවුරේ නාවික සෙබළුන් හැට දෙනකු ට කොරෝනා ආසාදනය වීමත් සමග පොලිසියේ හා හමුදා සාමාජිකයන් ආරක්ෂිත ඇදුම් හැඳීම ඇතුළු සෞඛ්‍යාරක්ෂක විධිවිධාන නිසියාකාර පිලිපදින්නේදැයි සමාජ මාධ්‍ය ඔස්සේ ප්‍රශ්න මතුවී තිබේ.

නිසි දැනුමක් නෑ

කොවිඩ් 19 වෛරසය මැඩ පැවැත්වීමේ රාජකාරි වලදී ආණ්ඩුව විසින් ආරක්ෂක අංශ වලට ප්‍රමුඛත්වය ලබා දුන්නද ඔවුනට ඒ සම්බන්ධ විද්‍යා හා තාක්ෂණික ඥානය නොමැති වීමෙන් මෙවැනි අවදානම් තත්වයක් මතුව ඇති බවයි හෙද ක්ෂේත්‍රයේ නියමුවන් පවසන්නේ.

රජයේ හෙද නිලධාරීන්ගේ සංගමයේ සහ ජාතික වෘත්තිය සමිති පෙරමුණේ සභාපති සමන් රත්නප්‍රිය පවසන පරිදි මෙවැනි වසංගත තත්වයකදී ආරක්ෂක අංශ විසින් සිදු කළ යුත්තේ මර්දන මෙහෙයුම් සඳහා ප්‍රමුඛත්වය ගැනීම නොව සෞඛ්‍ය අංශ සදහා අවශ්‍ය සහාය ලබා දීමයි.

වසංගත තත්වයකදී රෝගීන් සමග මෙන්ම සැක සහිත පුද්ගලයන් සමග කටයුතු කළ යුතු ආකාරය සම්බන්ධයෙන් ආරක්ෂිත ක්‍රමවේද මෙන්ම ආරක්ෂිත උපක්‍රම පිළිබදවත් බොහෝ ආරක්ෂක අංශ සාමාජිකයන්ට නිසි දැනුමක් නොමැති කමින් ඔවුන්ද වෛරසයට ගොදුරු වන බව හෙද සංගම් නායකයාගේ අදහසයි.

මුඛ ආවරණයක් හෝ අත් ආවරණයක් පැලඳු පමණින් මෙවැනි වසංගත වලින් ආරක්ෂා වීමට නොහැකි බව පවසන සමන් රත්නප්‍රිය මාධ්‍යවේදීන් හා කියා සිටියේ ඇතැම් හමුදා සහ පොලිස් නිලධාරීන් අනාරක්ෂිත ලෙස කටයුතු කරන අවස්ථා ද දක්නට ලැබෙන බවයි.

එපමණක් නොව ආරක්ෂක අංශ නිලධාරීන් ඇතැම් අවස්ථා වලදී අනවශ්‍ය මැදිහත්වීම් පවා සිදු කරන ආකාරයක් නිරීක්ෂණය වී ඇති බව ඔහු පවසයි.

මෙවැනි අවස්ථාවකදී කටයුතු කළ යුතු ආකාරය සම්බන්ධයෙන් ආරක්ෂක අංශ නිලධාරීන්ට නිසි පුහුණුවක් ලබා දීමට හෝ මෙය අවස්ථාවක් නොවන බව පවසන වෘත්තිය සමිති නායකයා අවධාරණය කරන පරිදි මතුවී ඇති තත්වයට වගකිව යුතුතේ ආරක්ෂක අංශ නිලදාරීන් නොව ඔවුන් වෙත ප්‍රම්‍රඛ රාජකාරි බාර දුන් ආණ්ඩුවයි.

ලොක්කන් පවා නොතකන ශික්ෂා

කොරෝනා රෝගාබාධිත වීමෙන් ගැලවීම සඳහා සෞඛ්‍ය විශේෂඥයන් ලබාදෙන උපදෙස් රටේ ඉහල බලධාරීන් පවා නොසලකා හරින බව ශ්‍රී ලංකාවේ මහජන සෞඛ්‍ය උන්නතිය පිළිබදව කටයුතු කරන ප්‍රමුඛතම වෘත්තිකයන්ගේ සංවිධානයක් විසින් පසුගියදා අනාවරණය කර තිබුනි.

සෞඛ්‍ය බලධාරීන් විසින් යෝජනා කර ඇති මාර්ගෝපදේශ “ඉහල මට්ටමේ පාර්ශවකරුවන්” මෙන්ම බිම් මට්ටමේ නිලධාරීන්ද අනුගමනය නොකරන විවිධ අවස්ථා වාර්තා වී ඇති බව ශ්‍රී ලංකා ප්‍රජා වෛද්‍ය විශේෂඥ වෛද්‍යවරුන්ගේ සංගමය (CCPSL)ද පෙන්වා දී තිබුනි.

අනියත බියක් එපා

කෝවිඩ් 19 වසංගත මර්දනයේ ප්‍රධානියා පවසන පරිදි වැලිසර නාවික හමුදා කඳවුරට අනුයුකත්ත නාවික සෙබලූන්ට නව කොරෝනා වෛරසය ආසාදනය වී ඇත්තේ ජාඇල, සුදුවැල්ල ප්‍රදේශයේ මත්ද්‍රව්‍යවලට ඇබ්බැහි වු පිරිස නිරෝධායනයට ලක් කිරීම සඳහා වූ මෙහෙයුමේදීය.

ලූතිතන් ජෙනරාල් ශවේන්ද්‍ර සිල්වා මාධ්‍යවේදීන් හා කියා තිබුනේ “මෙම නාවික හමුදා භට පිරිස් පසුගිය දින කිහිපය පුරාවටම ජා – ඇල සුදුවැල්ල ප්‍රදේශයේ මත්කුඩුවලට ඇබ්බැහි වී සිටි අය නිරෝධායන කටයුතු සඳහා යොමු කිරීමේ රාජකාරීවල යෙදී සිට තිබුණා. එහිදී එහි සිටි ඇතැම් පිරිස් හඳුනා ගැනීම සඳහා ඔවුන් සමග ළඟින් ඇසුරු කරන්නට සිදු තිබීමත් ඇතැම් අය පැන යන්නට කටයුතු කිරීම තුළ ඔවුන් පාලනය කර ගැනීමටත් සිදුව තිබුණා. එහිදී මේ ආකාරයෙන් වෛරසය ආසාදනය වෙන්න ඇති යනුවෙන් දැනට සැක කරන,” බවයි.

වැලිසර නාවික හමුදා කඳවුරේ නාවික සෙබළුන් ආයතනික නිරෝධාන කටයුතු වල දැනටමත් ඇති අතර, එම කටයුතු සෞඛ්‍ය අංශවල මඟ පෙන්වීම මත සැළසුම් සහගතව සිදු වෙමින් පවතින බවට සහතික වන ශ්‍රී ලංකා නාවික හමුදාව පවසන්නේ එබැවින් ශ්‍රී ලාංකික ජන සමාජය නාවික හමුදාවේ සේවය කරන පුද්ගලයින් පිළිබඳව සෞඛ්‍යමය වශයෙන් අනියත බියක් ඇති කර ගතයුතු නැති බවයි.

Facebook Comments

wedding people