නැගෙනහිර කිරි ගොවි සටනට පාර්ලිමේන්තු විරෝධයෙන් පිළිතුරු

සති තුනකට වැඩි කාලයක් තිස්සේ අඛණ්ඩ විරෝධතාවයක නිරතව සිටින නැගෙනහිර පලාතේ කිරි ගොවීන්ගේ ගැටළු විසදීමට කඩිනමින් පියවර ගන්නා ලෙස බල කරමින් පාර්ලිමේන්තු සභා ගර්භය තුල දෙමළ මන්ත්‍රීවරුන් දියත් කළ විරෝධතාවය පල දරා තිබේ.

ඉලංකෙයි තමිල් අරසු කච්චි පාර්ලිමේන්තු මන්ත්‍රී ෂානක්කියන් රාජපුත්තිරන් රාසමාණික්කම් ඔක්තෝබර් 06 වැනි සිකුරාදා පෙරවරුවේ විරෝධතා පුවරු ප්‍රදර්ශනය කරමින් සටන් පාඨ කියද්දී , දෙමළ ජනතා නියෝජිතයන් කිහිප දෙනකුම එයට සහාය පළ කර තිබුනි.

ගෝඨාභය රාජපක්ෂ පාලන සමයේ පිටතින් ගෙනවිත් පදිංචි කළ සිංහල ගොවීන් විසින් අත්පත්කරගෙන සිටින දෙමළ කිරි ගොවියන් වසර ගණනාවක සිට ගවයන් ලක්ෂ ගණනකට කැවීම සඳහා භාවිත කළ තණ බිම් වහා නිදහස් කරන ලෙස බල කරමින් නැගෙනහිර පළාතේ කිරි ගොවීන් ආරම්භ කළ අඛන්ඩ විරෝධතාවයට මේ වන විට දින 23 ක් සම්පුර්ණ වී තිබේ.

දෙමළ මන්ත්‍රීවරුන්ගේ විරෝධය හමුවේ පාර්ලිමේන්තුවේ සභානායක ද වන සුසිල් ප්‍රේමජයන්ත ඔවුන්ට පොරොන්දු වී ඇත්තේ වාරිමාර්ග අමාත්‍යාංශයේ ලේකම්වරයාට කතා කර සුදුසු පියවරක් ගන්නා ලෙස ඉල්ලා සිටින ලෙස ජනාධිපතිවරයා නියම කළ බවයි.

අමාත්‍යවරයාගේ එම පිළිතුරෙන් සැහීමකට පත් වු දෙමළ ජනතා නියෝජිතයන් අමාත්‍යවරයාට ස්තුතිය පුදකර විරෝධය නවතා දමා තිබුනි.

මඩකලපුව සිත්තාන්ඩි පාසල ඉදිරිපිටදී සැප්තැම්බර් 15 වැනි සිකුරාදා දෙමළ කිරි ගොවීන් විරෝධතාව ආරම්භ කර තිබුනේ සැප්තැම්බර් 13 වැනිදා මඩකලපුව දිස්ත්‍රික් ලේකම් කාර්යාලයේ පැවැති ගොවි කමිටු රැස්වීමේදී කිරි ගොවීන් මුහුණ දී සිටින ගැටළුවට විසදුම් ලබා දීමට තමන්ට නොහැකි බව දිස්ත්‍රික් ලේකම් කමලාවතී පද්මරාජා පැවසීමෙන් පසුවයි.

විරෝධතාවයේ නිරත කිරි ගොවියන් පෙන්වා දෙන්නේ සිය ගවයන් තණකොළ කෑම සදහා භාවිත කළ ඉඩම් අක්කර දෙදාස් පන්සීයක් පමණ භුමි භාගයක් සිංහල ගොවීන් විසින් හේන් කටයුතු වෙනුවෙන් මේ වන අත්පත්කරගෙන තිබීම නිසා කිරී ගොවීන් දැඩි අර්බුදයකට මුහුණ දී සිටින බවයි.

ශානක්කියන් මන්ත්‍රීවරයා පාර්ලිමේන්තුවේදී කියා සිටියේ තණබිම් අහිමිවීමෙන් ආහාර අර්බුදයකට ගොදුරු වන ගවයන් සංඛ්‍යාව හාරලක්ෂයක් වන බවයි.

මඩකලපුව, මයිලත්තමඩු, මාදවනෙයි ප්‍රදේශයේ පිහිටි තෘණ භුමිය හිටපු ජනාධිපති ගෝඨාභය රාජපක්ෂ විසින් නැගෙනහිර ආණ්ඩුකාරධුරය සඳහා පත් කරන ලද වියත් මග ක්‍රියාකාරිණි අනුරාධා යහම්පත් විසින් මෑතකාලීනව පදිංචි කළ සිංහල පවුල් 150 ට පමණ බඩ ඉරිඟු ඇතුළු බෝග වගා කිරීම සඳහා පවරා දීමත් සමග පාරම්පරිකව කිරි ගවයන් පාලනය කරන්නන් සහ වගාකරුවන් අතර පසුගිය කාලයේ අවස්ථා කිහිපයකදීම ගැටුම් ඇති වී තිබුනි.

කිරි ගොවීන් පෙන්වා දෙන්නේ ගවයන්ට කැවීම සඳහා භාවිත කළ තණ බිම් අක්කර 6000 ක භුමියෙන් සිංහල ගොවියන් බලහත්කාරයෙන් අල්ලා ගෙන සිටින්නේ සරුසාරෙට තෘණ වැවෙන අක්කර 2500 ක ප්‍රදේශයක් බවයි.

මයිලත්තමඩු මාදවනෙයි කිරි ගොවි සමිතියේ සභාපති සීනිතම්බි නිමලන් අවධාරණය කරන්නේ තමන් මුහුණ දි සිටින ගැටළුව සම්බන්ධයෙන් අවස්ථා ගණනාවකදීම බලධාරීන් දැනුවත් කළ ද විසදුමක් නොලැබුන බවයි.

“කිරි ගොවීන් 992 ක් ඉන්නවා. ඔවුන්ගෙන් යැපෙන පවුල් 3000 ක් ඉන්නවා. එයාලගේ ආර්ථිකය මේක පදනම් වෙලා තමයි තියෙන්නේ. එයාලා දිනකට කිරි ලීටර් 3000 ක් ලබා දෙනවා. කිරි ගවයන්ට බොන්න වතුර නෑ. ඒකට විසදුමක් අපි රජයෙන් ඉල්ලා සිටියා. සංවර්ධන කමිටු රැස්වීම් ඇතුළු සියළු රැස්වීම් වල දී අපේ ගැටළු ඉදිරිපත් කරනවා. අපි විසදුමක් දෙනවා කියලා කියනවා. ඒ උනාට මුකුත් උනේ නෑ.”

කිරි ගවයන්ට දෛනික ආහාර සොයා ගැනීමේ අපහසුතාවය නිසා පසුගිය කාලයේ අවස්ථා කිහිපයකදීම කිරි ගවයන් සැලකිය යුතු ප්‍රමාණයක් මිය ගිය බව පළාත් බද මාධ්‍යවේදීන් විසින් වාර්තා කර තිබුනි.

ෂානක්කියන් රාජපුත්තිරන් රාසමාණික්කම් මන්ත්‍රීවරයා පාර්ලිමේන්තුවේදී දැඩිව අවධාරණය කර තිබුනේ ඔක්තෝබර් මාසය මැදදී ගොවීන් වගා කටයුතු ආරම්භ කළහොත් කිරි ගොවීන් දැඩි අර්බුදයකට මුහුණ දෙන බවයි.