හිටපු අමාත්‍යවරයකුගේ කොළඹ නිවසක මෙහෙකාර සේවයේ යෙදි සිටියදී පිලිස්සී මිය ගිය දැරියගේ සිරුර ගොඩ ගෙන නැවත පශ්චාත් මරණ පරික්ෂණයක් සදහා පේරාදෙණිය ශික්ෂණ රෝහල වෙත යොමු කර තිබේ.
හැටන් ඩයගම පොදු සුසාන භූමියේ මිහිදන් කර තිබු ඉෂාලිනි ජුඩ් දැරියගේ සිරුර ජුලි 30 සිකුරාදා නුවරඑළිය මහෙස්ත්‍රාත්වරියගේ අධීක්ෂණය යටතේ ගොඩගැනීම සිදු වු බවයි පළාත් බද වාර්තාකරුවන් පවසන්නේ.
ගොඩගත් සිරුර පොලිස් ආරක්ෂාව යටතේ පේරාදෙණිය ශික්ෂණ රෝහලට යොමු කර තිබේ.
සිරුර මිහිදන් කර තිබෙන වසම භාර ග්‍රාමසේවා නිලධාරි සහ මහජන සෞඛ්‍ය පරික්ෂකවරුන් ද සහභාගි කර ගනිමින් නිරෝධායන උපදෙස් වලට අනුකුලව විශේෂඥ වෛද්‍ය මණ්ඩලයක් ඉදිරියේදි දැරියගේ සිරුර ගොඩගෙන දෙවන පශ්චාත් මරණ පරික්ෂණය සඳහා යොමු කරන ලෙස නුවරඑළිය මහෙස්ත්‍රාත් ලුෂාකා කුමාරි ධර්මකිර්ති ජුලි 29 බ්‍රහස්පතින්දා පොලීසියට නියෝග කර තිබුණි.
පොලිස් ප්‍රශ්න කිරීම් දිගටම
රිෂාඩ් බදියුදීන් මන්ත්‍රීවරයාගේ නිවසේදී ඉෂාලිනි ජුඩ් දැරිය මිය යෑම සම්බන්ධයෙන් සැකපිට අත්අඩංගුවට ගෙන සිටින මන්ත්‍රීවරයාගේ බිරිද ඇතුළු සාමාජිකයන් හතර දෙනකු මේ වන විට රක්ෂිත බන්ධනාගාරගත කර තිබේ.
ඔවුන් මේ වන විට නිරෝධායනයේ පසුවන බව ජනමාධ්‍ය වාර්තා කර ඇත.
දැරියගේ මරණය සම්බන්ධයෙන් වැඩිදුර පරීක්ෂණ සදහා ඩයගම ප්‍රදේශයට ගොස් සිටින ප්‍රධාන පොලිස් පරීක්ෂක වරුණි බෝගවත්ත ඇතුළු කණ්ඩායම මිය ගිය දැරියගේ පවුලේ සාමාජිකයන්ගෙන් ප්‍රකාශ සටහන් කර ගැනීම අද දිනයේත් සිදු කර තිබුනි.
මිය ගිය දැරියගේ සහෝදරයා නිවසින් බැහැර ස්ථානයකට රැගෙන ගොස් ප්‍රකාශ සටහන් කරගෙන ඇති බව පළාත් බද වාර්තාකරුවෝ වැඩි දුරටත් පවසති.
ඇමැති නිවසේ මරණය
හිටපු අමාත්‍ය සහ වත්මන් පාර්ලිමේන්තු මන්ත්‍රී රිෂාඩ් බදියුදීන්ගේ නිවසේ මෙහෙකාර සේවයේ යොදවා සිටි බාල වයස්කාර දැරියක් වූ හැටන්, දියගම පදිංචි ජූඩ් කුමාර් ඉශාලිනී පිලිස්සුම් තුවාල සහිතව 2021 ජූලි මස 3 දින, කොළඹ ජාතික රෝහලට ඇතුළත් කර තිබුනි.
15 දා දැඩි සත්කාර ඒකක අංක 2 හි 73 වැනි වාට්ටුවේ ප්‍රතිකාර ලබමින් සිටිය දී ඇයගේ තුවාල හේතුවෙන් ඇය මිය ගියාය.
දිගුකාලයක් පුරා ඇය ලිංගිකව අපයෝජනයට ලක් වීම පිළිබඳ සැකය සම්බන්ධයෙන් ද පොලිස් පරීක්ෂණයක් පැවැත්වෙන බව කොළඹින් පලකෙරෙන ඇතැම් ජනමාධ්‍ය වාර්තා කර තිබුණි.
මිය ගිය දැරිය හිටපු අමාත්‍යවරයාගේ නිවසේ මෙහෙකාර සේවයට ගෙනැවිත් ඇත්තේ ඇයට අවුරුදු 15 මාස 11ක කාල සීමාවේදී බව ජනමාධ්‍ය වැඩි දුරටත් වාර්තාකර තිබේ.
දැරියට යුක්තිය ඉල්ලා දිවයිනේ ප්‍රදේශ රැසක මේ වන විටත් විරෝධතා මාලාවක් දියත් වෙමින් පවති.
පැමිණිලි 4,700 ක්
විවිධ ළමා හිංසන ක්‍රියා සම්බන්ධයෙන් මේ වසරේ මුල් මාස 6 තුළ පැමිණිලි 4,700 ක් ලැබි ඇතැයි ජාතික ළමා ආරක්ෂක අධිකාරිය සදහන් කරයි.
එම අධිකාරියේ සභාපති මහාචාර්ය මුදිත් විදානපතිරණ පවසන්නේ , එම පැමිණිලිවලින් 73 ක් ළමා ශ්‍රමිකයන් සම්බන්ධයෙන් ලැබී ඇති බවයි.
එම පැමිණිලි සම්බන්ධයෙන් ජාතික ළමා ආරක්ෂක අධිකාරිය මේ වන විටත් පරීක්ෂණ ආරම්භ කර තිබෙන බව පවසන මහාචාර්යවරයා වැඩි දුරටත් සදහන් කරන්නේ ඉෂාලිනි ජුඩ් දැරියගේ මරණය සම්බන්ධයෙන් ද ජාතික ළමාරක්ෂක අධිකාරිය විශේෂ විමර්ශනයක් සිදු කරමින් පවතින බවයි.
වන්නිනායකගේ නීති තර්ක
රිෂාඩ් බදියුදීන් මන්ත්‍රීවරයාගේ නිවසේ දී මියගිය දැරිය අවුරුදු 16ක තරුණියක් බව පවසන ගුණරත්න වන්නිනායක නීතිඥවරයා පසුගියදා සදහන් කර තිබුනේ තමන් විසින් සිරුරට ගිනි තබා ගත් බව මිය ගිය තරුණිය මරණාසන්න ප්රකාශය ලෙස වෛද්‍යවරයා වෙත පවසා ඇති බවයි.
මියගිය තැනැත්තියගේ මරණාසන්න ප්රකාශය සාක්ෂි බවට පත්වන බැවින් ඉන් ඔබ්බට ගොස් නැවත පරීක්ෂණ කිරීමේ හැකියාවක් නොමැති බව නීතිඥයා එහිදී පවසා තිබුනි.
“මෙම තැනැත්තිය මිය යන්න පෙර වෛද්‍යවරයාට කියලා තියනවා මම ගිනි තියාගත්තා.එය මරණාසන්න ප්‍රකාශයක් .ඒ මරනාසන්න ප්රකාශය තමයි සාක්ෂිය බවට පරිවර්තනය වෙන්නේ. එතකොට ඊට එහාට ගිහිල්ලා නැවත නැවත පරීක්ෂණ කිරීමේ හැකියාවක් නැහැ.”
ඔහු ඒ බව සදහන් කර තිබුනේ පාර්ලිමේන්තු මන්ත්‍රී පාඨලී චම්පික රණවක නායකත්වය දරන 43 වන සේනාංකයට අනුබද්ධ නීති ප්‍රතිසංස්කරණ ජාතික ව්‍යාපාරය විසින් පසුගියදා කොළඹදී සංවිධානය කර තිබු මාධ්‍ය හමුවක් අමතමිනි.
දැරියට දුෂණයක් හෝ ලිංගික බලපෑමක් වී තිබුණද ඇය මියගොස් ඇති බැවින් ඒ සම්බන්ධයෙන් නීතිය ක්රියාත්මක කළ නොහැකි බවයි නීතිඥයා එහිදී පවසා තිබුනේ.
” මෙම දැරිවියට යම්කිසි අපරාධයක් උනානම් ලිංගිකව නැත්නම් ස්ත්‍රී දුෂණයක් සිද්ධ වෙලා තියනවානම් එය ක්රියාත්මක කරන්නත් හැකියාවක් නෑ, ඇය මිය ගිහිල්ලා.එතකොට මිය ගිය තැනැත්තෙකුට සිදුවු ලිංගික අපරාධයක් නඩු පවරන්න හැකියාවක් නෑ. ”
නීතිඥයා එම මාධ්‍ය හමුවේදී වැඩි දුරටත් සදහන් කළේ මේ වන විට හෙලිවන කරුණු අනුව දැරියගේ මිය යාමට අදාල නඩුව යම් කිසි දේශපාලන මුහුණුවරක් ගෙන තිබෙන බවයි.
Facebook Comments
