හමුදා පාලනය යටතේ පවතින උතුරේ භුමියක පිහිටි හින්දු කෝවිලක් දශක තුනකට වැඩි කාලයකින් පසු වැඳපුදා ගැනිමේ අවස්ථාව දෙමළ ජනයාට හිමිව තිබේ.
යාපනය, උතුරු වලිකාමම්, කට්ටුවාන් ප්‍රදේශයේ පිහිටි ශ්‍රී මුත්තුමාරිඅම්මන් හින්දු කෝවිල 1990 වසරේ සිට යුද හමුදා පාලනය යටතේ පවති.
එම කෝවිලට පිවිසීමට යුද හමුදාව අවසර ලබා දීමෙන් පසු හිටපු අධ්‍යාපන රාජ්‍ය අමාත්‍ය විජයකලා මහේස්වරන් ඇතුළු හින්දු බැතිමතුන් පිරිසක් සැප්තැම්බර් 22 දා කෝවිල වැඳපුදාගත් බවයි පළාත් බද වාර්තාකරුවන් පවසන්නේ.
තමන් අධ්‍යාපන රාජ්‍ය අමාත්‍ය ධුරය දරන සමයේ එවකට අගමැති රනිල් වික්‍රමසිංහගෙන් කළ ඉල්ලීම, ඔහු ජනාධිපති ලෙස පත්වීමෙන් පසුව ඉටු කිරීම නිසා මෙම අවස්ථාව හිමිවු බව විජයකලා මහේස්වරන් හිටපු රාජ්‍ය අමාත්‍යවරිය ප්‍රදේශයේ ජනතාව සමග සදහන් කර තිබේ.
කෝවිලට යාමට බැතිමතුන්ට අවසර දී ඇතත්, එම භුමිය තවමත් මුදා හැර නැත.
හිටපු ඇමැතිනිය වැඩිදුරටත් පවසා ඇත්තේ කෝවිල අයත් භුමිය කඩිනමින් නිදහස් කර දෙන බවට යුද හමුදාව පොරොන්දු වී ඇති බවයි.
ශ්‍රී මුත්තුමාරිඅම්මන් හින්දු කෝවිල තුළ පිහිටි ගණදෙවි කෝවිල පසුගිය සමයේ යුද හමුදා සාමාජිකයන්ගේ වන්දනාවට පත්ව ඇති බවයි පළාත් බද වාර්තාකරුවන් පවසන්නේ.
සැප්තැම්බර් 22 දා කෝවිල වැඳපුදා ගැනීම සදහා වසර 33 ට පසුව හිටපු රාජ්‍ය අමාත්‍යවරිය ඇතුළු හින්දු බැතිමතුන් එහි යන විටත් ගණදෙවි පිළිමයට පුද පුජා පවත්වා තිබුනත් කෝවිලම ජරාවාස වී ඇති ආකාරය දැකගැනීමට ලැබුන බව ඔවුහු වැඩි දුරටත් පවසති.
Facebook Comments
