යහපාලනයේදීත් යුක්තිය නොලද සිංහල, දෙමළ මාධ්‍යවේදීන් දෙදෙනෙක්

රාජපක්ෂ පාලන සමයේදී මරා දැමු සහ අතුරුදහන් කරනු ලැබු මාධ්‍යවේදීන් දෙදෙනෙකුගේ අනුස්මරණය අදට යෙදී තිබේ.

එකොලොස් වසරකට ඉහත දී තිස් අට හැවිරිදි දෙදරු පියකු වූ සුබ්‍ර‍මනියම් සුගීර්තරාජන්, වෙඩි තබා ඝාතනය කරන ලද අතර අට වසරකට ඉහත දී මාධ්‍යවේදී ප්‍රගීත් එක්නැලිගොඩ කොළඹට තදාසන්න ප්‍රදේශයකදි පැහැර ගෙන ගොස් අතුරුදහන් කරනු ලැබුවේ 2010 ජනවාරි මස 24 වැනි දිනයි.

සුඩර් ඔලි හා උදයන් පුවත්පත්වල හිටපු ත්‍රිකුණාමලය ප්‍රධාන වාර්තාකරු ‘රාජන්’ හෙවත් සුබ්‍ර‍නියම් සුගීර්තරාජන් ත්‍රිකුණාමලයේ සිසුන් පස් දෙනකු 2006 ජනවාරියේ ඝාතනය කෙරුනු බව හෙළි කෙරෙන ඡායාරූප යාපනයේ සුඩරෝලි පුවත්පතේ මුල් පිටුවේ පල කොට දෙසතියක් ගතවත්ම ඝාතනය කරන ලදී.

අහිමි යුක්තිය

ඝාතනය කෙරුනු ත්‍රිකුණාමලයේ සිසුන් පස් දෙනා හෝ මාධ්‍යවේදී සුගීර්දරාජන් හෝ සම්බන්ධයෙන් හෝ මේතාක් යුක්තිය ඉටුවී නොමැත.

මාධ්‍යවේදී ප්‍රගීත් එක්නැළිගොඩ පැහැරගෙන අතුරුදහන් කරවීමට සැක පිට අත්අඩංගුවට ගෙන සිටි හමුදා සෙබලුන් ඇප ලබා යළි සේවයේ පිහිටුවන ලදී.

ප්‍රගීත් එක්නැලිගොඩ අතුරුදහන් කිරීමේ නඩුවේ චූදිත සෙබළුන්ට නැවත යුද හමුදාවේ රැකියා ලබා දී ඇත්තේ රටේ ආරක්ෂක අමාත්‍යවරයා මෙන්ම සේනාධිනායාද වන ජනාධිපති මෛත්‍රිපාල සිරිසේන ගේ අනුදැනුම සහිතව බවට ශ්‍රී ලංකා වෘත්තිය ජනමාධ්‍යවේදින්ගේ සංගමය චෝදනා කර තිබුණි.

JDS ලයිස්තුව

රාජපක්ෂ පාලස සමයේ ඝාතනයට හා අතුරුදහන් කිරීමට ලක්වූ මාධ්‍යවේදීන් ගේ ලැයිස්තුවක් 2015 දෙසැම්බරයේ ජාත්‍යන්තර මානව හිමිකම් දිනයේ දී මාධ්‍ය සංසදය විසින් අගමැති රනිල් වික්‍රමසිංහ අතට පත් කළ අතර අග්‍රාමාත්‍යවරයා එහිදි සදහන් කර තිබුනේ එම ලේඛනයේ මාධ්‍යවේදීන් 44 දෙනකුගේ නම් ඇතුලත්ව ඇති බවයි.

අගමැතිවරයාට භාර දෙන ලද ලැයිස්තුව සකස් කොට මුල් වතාවට ප්‍රසිද්ධියට පත් කර තිබුනේ ශ්‍රී ලංකාවේ ප්‍රජාතන්ත්‍රවාදය සඳහා මාධ්‍යවේදියෝ (JDS) විසිනි.

තෙවසරක් ගතව ඇතත් රජය සතුව ඇති එම ලැයිස්තුවේ සඳහන් මාධ්‍යවේදීන් සම්බන්ධයෙන් යුක්තිය ඉටු කිරීමට ගන්නා පියවර තවමත් ප්‍රකාශයට පත් කර නැති අතර එම ලයිස්තුවේ නම් සඳහන් 41 දෙනකුම මාධ්‍යවේදින් වේ.