සාමකාමී උද්ඝෝෂකයන් සම්බන්ධයෙන් කටයුතු කිරීමේ දී ශ්‍රී ලංකා පොලීසිය, සිය බලහත්කාර බලය යොදා ගැනීම ප්‍රධාන පෙළේ ජාත්‍යන්තර මානව හිමිකම් සංවිධානයක් දැඩි සේ හෙළා දැක තිබේ.
මඩකලපුව දිස්ත්‍රික්කයේ දෙමළ කිරි ගොවීන් මුහුණ දී සිටින ගැටළු වලට විසදුම් ලබා ගැනීමට විරෝධතාවයේ යෙදුන උද්ඝෝෂකයන්ට එරෙහිව රාජ්‍යය විසින් ගෙන ඇති තර්ජනාත්මක ක්‍රියාපිලිවෙත් පිළිබඳව ඩබ්ලින් නුවර මුලස්ථාන කොටගත් ෆ්‍රන්ට්ලයින් ඩිෆෙන්ඩර්ස් (පෙරමුණේ රැකවලුන්) සංවිධානය නිවේදනයක් මගින් සිය දැඩි කනස්සල්ල පළ කර ඇත.
එම නිවේදනය නිකුත් කරමින් පෙරමුණේ රැකවලුන් පෙන්වා දෙන්නේ උද්ඝෝෂකයන් විරෝධතා මගින් අදහස් ප්‍රකාශ කිරීමේ හා සාමකාමීව රැස්වීමට ඇති නිදහස ක්‍රියාත්මක කිරීමේදී, බලධාරීන් ප්‍රතිචාර දක්වා ඇත්තේ පහරදීම් සහ තැති ගැන්වීම් වලින් බවයි.
“මඩකලපුවේ මාදවනෙයි සහ මයිලතමඩු යන ප්‍රදේශවල සත්ව පාලනයේ නිරත සුළු ජාතික දෙමළ ගොවින් හා ඔවුන්ගේ දරුපවුල් වෙත සහය පළ කළ සාමකාමී උද්ඝෝෂකයන්ගේ රැස්වීමට එරෙහිව ශ්‍රී ලංකා පොලිසිය විසින් දැවැන්ත බලහත්කාර බලයක් යොදවා තිබේ”
තමන්ගේ ජීවන වෘත්තිය අඩපණ කරමින් ආර්ථික පැවැත්ම අහෝසි කිරීමට කටයුතු කරන බවට, යුද්ධයෙන් පීඩාවට පත්ව සිටින දෙමළ ජනතාව විසින් ජාතිවාදී සිංහල කොටස් වෙත දිගින් දිගටම චෝදනා එල්ල කර ඇත.
වසර කිහිපයක් තිස්සේ මාදවනෙයි සහ මයිලතමඩු යන ප්‍රදේශවල තණබිම් අත්පත් කරගෙන සිටින්නේ මඩකලපුවට මායිම්ව පිහිටි අම්පාර සහ පොළොන්නරුව වැනි දිස්ත්‍රික්කවලින් පැමිණි රාජ්‍ය අනුග්‍රහය ලබා සිටින බහුතර සිංහල පදිංචිකරුවන් ය.
මෙම තණබිම් අත්පත්කරගැනීම් හේතුවෙන් සත්ව පාලනයේ නියුතු දෙමළ ගොවීන්ට තම ගවයන් විකුණා දැමීමට බලකෙරී ඇති අතර එමඟින් ගව මරණ අනුපාතය ද ඉහළ ගොස් ඇත.
මෙම තත්වය තුල දෙමළ ගොවි ජනතාව වෙනත් රැකියා අවස්ථා සෙවීමේ ප්‍රශ්නයට මුහුණ දී ඇතැයි ද ජාත්‍යන්තර මානව හිමිකම් සංවිධානය සිය නිවේදනයේ වැඩිදුරටත් සඳහන් කර ඇත.
බලයෙන් පහ කරන ලද ජනාධිපති ගෝඨාභය රාජපක්ෂ පාලන සමයේ එහි ගෙන ආ සිංහල පිරිස් විසින් මේ ඉඩම් වලින් සෑහෙන කොටසක් බලහත්කාරයෙන් අත්පත් කරගෙන සිටීමට විරුද්ධව, මාසයකට අධික කාලයක් තිස්සේ උද්ඝෝෂණයේ යෙදී සිටින කිරි ගොවීන් ඉල්ලා සිටින්නේ, රජය විසින් පවරා ඇති මේ ඉඩම්වල තම ගවයන්ට නිදහසේ තණ කෑමට ඉඩ ලබාදෙන ලෙසයි.
විශාල ඉඩම් කොල්ලකෑමේ උපායක කොටසක් ලෙස බෞද්ධ භික්ෂූන්ගේද සහය ලබන සිංහල ජන කොටස්වල බලහත්කාර ජනපදකරණය මගින් තම සතුන්ට තණබිම් අහිමි වේ යැයි දෙමළ ගොවීහු බියෙන් පසුවෙති.
අම්පිටියේ සුමනරතන භික්ෂුවගේ මූලිකත්වයෙන් පසුගිය 15 වැනිදා නැගෙනහිර පළාත් හිටපු ආණ්ඩුකාර අනුරාධා යහම්පත්ගේ ද සහභාගිත්වයෙන් එම ප්‍රදේශයේ බුද්ධ ප්‍රතිමාවක් ස්ථාපනය කිරීමත් සමඟ ඔවුන්ගේ මේ බිය හේතු සහගත බවට මේ වන විට සනාථ වී තිබේ.
මේ අතර මයිලතමඩු- මාදවනෙයි ප්‍රදේශයේ බුද්ධ ප්‍රතිමාවක් පිහිටුවීම සම්බන්ධයෙන් දෙමළ මන්ත්‍රීවරුන් දැඩි විරෝධය පළ කර තිබේ. පසුගිය අඟහරුවාදා (17) පාර්ලිමේන්තුවේදී අදහස් දක්වමින් පාර්ලිමේන්තු මන්ත්‍රි ගෝවින්දන් කරුණාකරන් එවැනි ස්ථාපනයක් කිරීමට ඔවුනට ඇති බලය කුමක්දැයි ප්‍රශ්න කළේය.
“කවුද මේ රට පාලනය කරන්නේ? ඒ ජනාධිපතිවරයා හරි පාර්ලිමේන්තුව හරි ද නැතිනම්, බෞද්ධ භික්ෂූන් හරි වියත්මග සාමාජිකයන් හරි ද? මේ වගේ දේවල් දිගින් දිගටම වුනොත් වෙන්නේ රට බෙදෙන එක විතරයි.”
වෙනත් දිස්ත්‍රික්ක වල විසූ සිංහල ජනතාව, ප්‍රධාන වශයෙන් දෙමළ ජනතාව වෙසෙන ප්‍රදේශ වල පදිංචි කරමින් රජය ගෙන යන දුෂ්ට ක්‍රියාවලිය හේතුවෙන්, සත්ව පාලනයේ නියුතු දෙමළ ගොවීන්ට තම ගවයන් විකිණීමට බල කෙරී ඇති තත්වය යටතේ, ගවයන්ගේ මරණ සංඛ්‍යාව ඉහල ගොස් විකල්ප රැකියා අවස්ථා සෙවීමට ඒ ජනතාව යොමු කෙරී ඇති බවද පෙරමුණේ රැකවලුන් පෙන්වා දෙයි.
“මෙම තණබිම් වලින් නීති විරෝධී පදිංචිකරුවන් කිහිප දෙනෙකු ඉවත් කිරීම සඳහා ගොවීන් නීතිමය ක්‍රියාමාර්ග ගෙන ඇත. ඒ කෙසේ වෙතත්, අද වන විටත් බහුතරයට අයත් සිංහල පවුල් 500 කට අධික සංඛ්‍යාවක් සව පාලනයේ නියුතු දෙමළ ගොවීන්ගේ එදිනෙදා කටයුතු වලට විවිධ මාර්ග හරහා බාධා පමුනුවමින් සිටී”.
මේ මස මුලදී ජනාධිපති රනිල් වික්‍රමසිංහ මඩකලපුවට පැමිණි අවස්ථාවේ දී විරෝධතාකරුවන් සහ මානව හිමිකම් ක්‍රියාකාරීන් සිය ගණනක් ඔහු හමුවීමේ අදහසින් සාමකාමී පා ගමනක් අරඹන ලදී. කෙසේ වෙතත්, කාන්තාවන් හා අතුරුදහන් වූවන්ගේ පවුල් වල සාමාජිකයන්ද සහභාගී වූ මේ විරෝධතා පාගමන ඉදිරියට යෑම හරස් කිරීමේ උත්සාහයක් ලෙස, ශ්‍රී ලංකා පොලිසිය මැදිහත් වී මාර්ග බාධක සවි කළ අතර, ඔවුන්ට ශාරීරිකව පහර දීමට ද පොලීසිය පියවර ගෙන තිබුනි.
දෙමළ ජනතාවගේ අයිතීන් වෙනුවෙන් කතා කරන අයට දිගින් දිගටම හිරිහැර කරන බව සිය නිවේදනයෙන් පෙන්වා දෙන මෙම ජාත්‍යන්තර මානව හිමිකම් සංවිධානය, එම හිරිහැර නතර කරන ලෙස ඉල්ලා සිටී.
“විශේෂයෙන් ම ශ්‍රී ලංකාවේ උතුරු හා නැගෙනහිර ප්‍රදේශවල මානව හිමිකම් වෙනුවෙන් පෙනී සිටින්නන් ඇතුළු සාමකාමී උද්ඝෝෂකයන්ට එරෙහිව දිගින් දිගටම කෙරෙන පළිගැනීම් සම්බන්ධයෙන් ෆ්‍රන්ට්ලයින් ඩිෆෙන්ඩර්ස් සංවිධානය බලවත්සේ සංවේගයට පත්ව සිටී. මානව හිමිකම් ආරක්ෂා කරන්නන්ට, සාමකාමී උද්ඝෝෂකයන්ට, සිවිල් සමාජ ක්‍රියාකාරීන්ට සහ මාධ්‍යවේදීන්ට ඔවුන්ගේ අව්‍යාජ කාර්යයන්ට එරෙහි පළිගැනීම් ලෙසින් සිදුකරනු ලබන හිරිහැර සම්බන්ධයෙන් දිනපතා වාර්තා වෙයි. දෙමළ හා මුස්ලිම් සුළුතර ජාතීන්ට අයත් මානව හිමිකම් ආරක්ෂකයන් සහ ඒ අතරින් විශේෂයෙන් ම බෙහෙවින් මිලිටරිකරණය වී තිබෙන, ගැටුම් වලින් පීඩාවට පත් ප්‍රදේශවල ක්‍රියාත්මක වන්නවුන්, මෙවන් පළිගැනීම්වල විශේෂයෙන් ගොදුරු බවට පත් වේ. මඩකලපුවේදී සිය ඉල්ලීම් සාමකාමීව ඉදිරිපත් කරන මෙන්ම යුක්තිය වෙනුවෙන් පෙනී සිටින මානව හිමිකම් ආරක්ෂකයන් සහ අතුරුදහන් වූවන්ගේ පවුල්වල උදවිය ඇතුළු සාමකාමී උද්ඝෝෂකයන්ට එරෙහි මර්දනය, හිරිහැර කිරීම සහ බිය වැද්දීම නතර කරන ලෙස අපි ඉල්ලා සිටිමු.”
Facebook Comments
