මාසයක් තිස්සේ අරගල කළත් කල්මුනේ උතුරට තාමත් විසඳුම් නෑ

දශක හතරකට ආසන්න කාලයක් තිස්සේ නැගෙනහිර ක්‍රියාත්මක වන උප ප්‍රාදේශීය ලේකම් කාර්යාලයක්, පුර්ණ බලතල සහිත ප්‍රාදේශීය ලේකම් කාර්යාලයක් බවට පත් කරමින් එම ප්‍රදේශයේ පාරම්පරික ජීවත් වන දෙමළ ජනතාව මුහුණ දී සිටින පීඩාවන්ගෙන් ඔවුන් නිදහස් කිරීමට කටයුතු කරන ලෙස රජයට බල කරමින් ආරම්භ කළ අඛණ්ඩ අරගලයට මාසයක් සම්පුර්ණ වී තිබේ.

පළාත් බද වාර්තාකරුවන් පවසන්නේ සිය ඉල්ලීම් ඇතුලත් සටන් පුවරු ප්‍රදර්ශනය කරමින් ප්‍රදේශවාසීන් අම්පාර දිස්ත්‍රික්කයේ කල්මුණේ උතුර උප ප්‍රාදේශීය ලේකම් කාර්යාලය ඉදිරිපිටදී මාර්තු 25 වැනිදා ආරම්භ කළ විරෝධතා ව්‍යාපාරය අප්‍රේල් 24 වැනිදාත් ක්‍රියාත්මක කළ බවයි.

අම්පාර දිස්ත්‍රික්කයේ කල්මුණේ උතුර උප ප්‍රාදේශීය ලේකම් කාර්යාලය, ප්‍රාදේශීය මහ ලේකම් කාර්යාලයක් ලෙසට උසස් නොකිරීම නිසා එම ප්‍රදේශයේ ජීවත් වන දෙමළ ජනයා ගැටළු රැසකට මුහුණ දී සිටිති.

විරෝධතාවයට එක්ව සිටින ප්‍රදේශයේ සිවිල් සංවිධාන ක්‍රියාකාරිකයකු වන තාමෝදරම් ප්‍රදීපන් සදහන් කළේ මාසයකට වැඩි කාලයක් තිස්සේ සිදු කරන අඛණ්ඩ අරගලය අයිතීන් දිනාගැනීම වෙනුවෙන් විනා කිසිවකුගේ හෝ අයිතියක් නැති කිරීම වෙනුවෙන් අරගලයක් නොවන බවයි.

“මේ අරගලය කාටවත් විරුද්ධව නෙවෙයි. කාගෙවත් අයිතිය නැති කරන්න කරන අරගලයක් නෙමෙයි. කාගෙන්වත් දෙයක් ඉල්ලන අරගලයක් නෙමෙයි. 1993 දී ඇති කළ කල්මුණේ උතුර ප්‍රාදේශීය ලේකම් කාර්යාලයට පූර්ණ බලතල ලබා දෙන ලෙස ඉල්ලමිනුයි අපි සටන් කරමින් ඉන්නේ. ”

අගමැති දිනේෂ් ගුණවර්ධන වෙත අප්‍රේල් 14 වැනිදා ලිපියක් යොමු කරමින් දෙමළ ජාතික ජනතා පෙරමුණේ පාර්ලිමේන්තු මන්ත්‍රී සෙල්වරාජා ගජේන්ද්‍රන් දැනුම් දී තිබුනේ දශක කීපයක් තිස්සේ ප්‍රදේශයේ ජනතාවට මේ හේතුවෙන් අත්‍යවශ්‍ය රජයේ සේවා ලබා ගැනීමට බාධා පැමිණ ඇති බවයි.

“දශක තුනක් තිස්සේ, කල්මුණේ උතුර ප්‍රදේශයේ ජනතාව, තවමත් නොවිසඳුණු අභියෝගයන් සමඟ පොරබදමින් සිටින අතර ඒ හේතුවෙන් ඔවුන්ට අත්‍යවශ්‍ය රජයේ සේවාවන් වෙත ප්‍රවේශ වීමේ හැකියාව සැලකිය යුතු ලෙස අඩාල වී ඇති අතර එමඟින් ඔවුන්ගේ දෛනික ජීවිතයට ද බාධා පැමිණ තිබේ.”

දෙමළ ජනතා නියෝජිතයා සිය ලිපිය මගින් අගමැතිවරයාට වැඩි දුරටත් දැනුම් දී තිබුනේ රජයේ නිලධාරීන් සිදු කරන ප්‍රජාතන්ත්‍ර විරෝධී ක්‍රියා හේතුවෙන් දෙමළ සහ මුස්ලිම් ප්‍රජාවන් අතර නොසන්සුන්තා වර්ධනය වී ගැටුම්වලට තුඩුදිය හැකි බවයි.

“අපගේ ඉල්ලීම් වලට කිසිදු ගරු කිරීමක් සිදු වී නැති අතර, කල්මුණේ උතුර ප්‍රාදේශීය ලේකම් කොට්ඨාසය උප කාර්යාලයක් බවට පහත හෙළීමට කටයුතු කෙරෙමින් පවතී. කල්මුණේ උතුර ප්‍රාදේශීය ලේකම් කොට්ඨාසය උප කාර්යාලයක් බවට පහත හෙලීමට ඇති මෙම චේතනාව සහ, අදාළ නීතිවලට පටහැනිව කල්මුණේ දකුණ ප්‍රාදේශීය ලේකම්වරයා සිදු කරන ප්‍රජාතන්ත්‍ර විරෝධී නීති විරෝධී ක්‍රියාකාරකම් හේතුවෙන් දෙමළ සහ මුස්ලිම් ප්‍රජාවන් අතර නොසන්සුන්තාවන් සහ ගැටුම් වර්ධනය වීමේ අවදානමක් පවතී.”

තාමෝදරම් ප්‍රදීපන් සිවිල් සංවිධාන ක්‍රියාධරයා ද විරෝධතාවය අතරතුරදී මාධ්‍යවේදීන් හමුවේ කියා සිටියේ දිස්ත්‍රික් ලේකම්වරයා මෙන්ම කල්මුණේ දකුණ ප්‍රාදේශීය ලේකම්වරයා ද කල්මුණේ උතුර “ උප” ප්‍රාදේශීය ලේකම් කාර්යාලය ලෙස නිල වශයෙන් කටයුතු කිරීම නතර කළ යුතු බවයි.

“කල්මුණේ උතුරු ප්‍රාදේශීය ලේකම් කාර්යාලය, ප්‍රාදේශීය ලේකම් කාර්යාලයක් ලෙස ක්‍රියාත්මක නොවිය යුතුයි කියන අදහසින් බොහෝ දෙනෙක් කටයුතු කරනවා. විශේෂයෙන්ම දිස්ත්‍රික් ලේකම්වරයා මෙන්ම කල්මුණේ දකුණ ප්‍රාදේශීය ලේකම්වරයා කල්මුණේ උතුර උප ප්‍රාදේශීය ලේකම් කාර්යාලය ලෙස ලිපි ලිවීමේ උත්සාහය නතර කරන්න ඔන කියන ඉල්ලීම ඇතුළු තවත් ඉල්ලීම් රැසක් ඉදිරිපත් කරලා තමයි අපි අරගල කරමින් ඉන්නේ.”

පළාත් බද වාර්තාකරුවන් පවසන පරිදි අම්පාර දිස්ත්‍රික්කයේ, කල්මුණේ උතුර උප ප්‍රාදේශීය ලේකම් කාර්යාලය 1986 වසරේදී ස්ථාපනය කර තිබෙන අතර 1993 වසරේ අමාත්‍ය මණ්ඩල රැස්විමේදී එම උප කාර්යාලය, ප්‍රාදේශීය මහ ලේකම් කාර්යාලයක් බවට පරිවර්තනය කිරිමට තීරණය වී තිබේ.

එම තීරණය ක්‍රියාත්මක කරන ලෙස එවකට ස්වදේශ කටයුතු හා පළාත් රාජ්‍ය ලේකම් ලෙස කටයුතු කළ එස්. ඒ. ඕබඩගේ විසින් කල්මුණේ ප්‍රාදේශීය ලේකම්වරයාට ලිඛිතව දැනුම් දී ඇතත් එය මෙතෙක් ඉටු වී නැත.

කල්මුණේ උතුරු කොට්ඨාසයේ ජීවත් වන දෙමළ ජනයා පවසන්නේ සිය පරිපාලන අවශ්‍යතා ඉටු කරගැනීම වෙනුවෙන් බොහෝ අවස්ථා වලදී මුස්ලිම් ජනයා වැඩි වශයෙන් ජීවත් වන ප්‍රදේශයක පිහිටි කල්මුණේ දකුණ ප්‍රදේශීය ලේකම් කොට්ඨාසය වෙත යෑමට සිදු වන බවයි.

කල්මුණේ උතුර උප ප්‍රාදේශීය ලේකම් කාර්යාලයට මුදල් සහ ඉඩම් බලතල අහිමි අතර සංවර්ධන කටයුතුවල දී දෙමළ ප්‍රදේශවලට මුදල් නොලැබිමේ තත්වයකට මුහුණ දී සිටින බවත් ඔවුහු පවසති.

ලියුම් තුන්සීයක්

තාමෝදරම් ප්‍රදීපන් සිවිල් සංවිධාන ක්‍රියාධරයා පවසන පරිදි මේ සම්බන්ධයෙන් වගකිව යුතු නිලධාරීන්ට ලිපි 300 ට අධික ප්‍රමාණයක් යොමු කර ඇතත් කිසිදු ප්‍රතිපලයක් අත් නොවු බවයි.

“අම්පාර දිස්ත්‍රික් ලේකම්වරයාට සහ විෂයභාර අමාත්‍යවරයාගේ ලේකම්වරයාට ලිපි 300කට අධික ප්‍රමාණයක් ලිව්වත් කිසිම ප්‍රතිචාරයක් ලැබී නැහැ. මේ සම්බන්ධයෙන් මහජනතාව අම්පාර දිස්ත්‍රික් ලේකම්වරයා හමුවී සෘජුවම පැමිණිලි කළ නමුත් දිස්ත්‍රික් ලේකම්වරයා තමන්ට මේ සම්බන්ධයෙන් කිසිවක් කළ නොහැකි බව පැවසූවා. විෂය භාර ඇමැතිවරයා ලේකම්වරයා සමඟ කතා කර විසඳුමක් ලබා දෙන බව කිිව්වා. නමුත් මාස හයක් ගතවී ඇතත් තවමත් ඔහුට නිසි විසඳුමක් ලැබී නැහැ.”

ගණකාධිකාරීවරුන් ඇතුළු වැදගත් පත්වීම් ලබා දී කල්මුණේ උතුරු උප ප්‍රාදේශීය ලේකම් කාර්යාලය පුර්ණ බලතල සහිත ප්‍රාදේශීය ලේකම් කාර්යාලයක් බවට පත් කරන ලෙස දෙමළ ජාතික ජනතා පෙරමුණේ (TNPF) නායක, පාර්ලිමේන්තු මන්ත්‍රී ගජේන්ද්‍ර කුමාර් පොන්නම්බලම් ද 2023 වසරේ නොවැම්බර් 28 වැනිදා ද පාර්ලිමේන්තුවේ දී ඉල්ලා තිබුනි.

කල්මුණේ උතුරු උප ප්‍රාදේශීය ලේකම් කාර්යාලය යටතේ ග්‍රාම සේවා වසම් 29 ක්‍රියාත්මක වේ.