ජනවරම අනුව නව ව්‍යවස්ථාවේ වැඩ කටයුතු ඉදිරියට ගෙන යනවා – රාජිත

0

නව ආණ්ඩුක්‍රම ව්‍යවස්ථා සම්පාදනය කිරීමේ හෝ පවතින ව්‍යවස්ථාව සංශෝධනයට ලක් කිරීමේ ක්‍රියාදාමය ඉදිරියටම ගෙන යන බව රජය අවධාරණය කරයි.

නව ආණ්ඩුක්‍රම ව්‍යවස්ථා කෙටුම්පත සම්මත කිරීම සඳහා අවශ්‍ය වන්නේ නම් ජනමත විචාරණයක් කැඳවීමට ද ආණ්ඩුව සූදානම් බව සම කැබිනට් ප්‍රකාශක සෞඛ්‍ය අමාත්‍ය රාජිත සේනාරත්න 05 බදාදා පැවති කැබිනට් තීරණ දැනුම්දීමේ මාධ්‍ය හමුවේදී සඳහන් කළේය.

ශ්‍රී ලංකාවට නව ආණ්ඩුක්‍රම ව්‍යවස්ථාවක් හෝ ව්‍යවස්ථා සංශෝධනයක් අවශ්‍ය නොවන බවට ත්‍රෛනිකායික මාහා නාහිමිවරුන් ඇතුළු මහා සංඝරත්නය 04 අඟහරුවාදා කළ ඒකමතික නිවේදනය පිළිබඳව මාධ්‍යවේදියෙකු කළ විමසීමකට පිළිතුරු දෙමින් ඇමතිවරයා මේ බව පැවසුහ.

මහනායක හා අනුනායක හිමිවරුන් ප්‍රමුඛ හැත්තෑපස් නමකගේ පමණ සහභාගිත්වයෙන් පැවති සංඝ සම්මේලනයකදී නව ආණ්ඩුක්‍රම ව්‍යවස්ථාවක් සම්පාදනය කිරීම සහ අතුරුදහන් වුවන් සොයාගැනීම සඳහා කාර්යාලයක් පිහිටුවීම අත් හිටුවන ලෙස රජයට බලකර සිටි අතර බලය බෙදීම සම්බන්ධයෙන් ද විරෝධය පලකළ එම සඟ සමුලුව රජයේ ක්‍රියා පිළිවෙත හැඳින්වූයේ “සංහිඳියාව නමින් හැඳින්වෙන මිත්‍යා ක්‍රියාකාරකම්,” ලෙසිනි.

ජනවරම ක්‍රියාත්මක කිරීමක්

එහිදී මල්වතු පාර්ශවයේ නියංගොඩ විජිතසිරි අනුනායක හිමියන් රජයට චෝදනා කළේ අලුත් ව්‍යවස්ථාවක් සකස් කරන්නට පියවර ගැනීම මැතිවරණයේදී දුන් වරම ඉක්මවා යාමක් ලෙසයි.

මහා නාහිමිවරුන් ගේ ඉහත කී ප්‍රකාශය සම්බන්ධයෙන් ප්‍රතිචාරය පළකරමින් අමාත්‍ය රාජිත සේනාරත්න කියා සිටියේ ජනතාව ලබා දී තිබෙන ජනවරම ක්‍රියාත්මක කිරීම ආණ්ඩුවේ වගකීම බවය.

නව ව්‍යවස්ථාවක් කෙටුම්පත් කිරීමේ ක්‍රියාදාමයට විරෝධය පළකිරීමට පෙර එහි සැබෑ අරමුණ හඳුනාගත යුතු බව කී ඇමතිවරයා නව ව්‍යවස්ථාවක් ක්‍රියාත්මක කරන්නේ රටේ බහුතර සිංහල ජනතාව එයට අනුමැතිය පළකරන්නේ නම් පමණක් බවද ප්‍රකාශ කළේය.

කෙටුම්පත් කර නැහැ

නව ව්‍යවස්ථාවේ අවසාන කෙටුම්පත තවමත් කෙටුම්පත් කර අවසන් නොමැති බවයි සම කැබිනට් ප්‍රකාශක, ක්‍රීඩා අමාත්‍ය දයාසිරි ජයසේකර මෙම මාධ්‍ය හමුවේදී අවධාරණය කර සිටියේ.

රටේ අනාගත අභිවෘද්ධිය උදෙසා නව ව්‍යවස්ථාවක් සකස් කිරීම් අවශ්‍යතාවය ජනතාව වටහාගත යුතු බවද ඇමතිවරයා සඳහන් කළේය.

 

Facebook Comments