මෛත්‍රීපාල සිරිසේන දුන් පොරොන්දු ජනාධිපති වීමෙන් පසු ඉටු නොකර රැවටු ආකාරයෙන් තමන්ව නොරවටන ලෙස සිවිල් සංවිධාන සහ වෘත්තීය සමිති නියෝජිතයන් එක්සත් ජාතික පෙරමුණු ජනපති අපේක්ෂකයාගෙන් ඉල්ලීමක් කර තිබේ.
2015 දී මහින්ද රාජපක්ෂට එරෙහි සටනට පැමිණි මෛත්‍රීපාල සිරිසේනට සහය දුන් ආකාරයෙන් ගෝඨාභය රාජපක්ෂට එරෙහිව සජිත් ප්‍රේමදාස හට සහයෝග ලබා දෙන බවයි අතුරුදහන් වුවන්ගේ පවුල් එකතුවේ සභාපති බ්‍රිටෝ ප්‍රනාන්දු පවසන්නේ.
“සිරිසේනට අපි කිව්වේ ඔහේව අපිට විශ්වාස නැති වුනත් මහින්ද රාජපක්ෂ පරාජය කරන්න ඉදිරිපත්වීම තමයි අපිට ඔයා ගැන විශ්වාසය ඇති කරන්න පුලුවන් කාරණය හැබැයි ඒ විශ්වාසය නම් කඩන්න එපා කිව්වා. අමු අමුවේ කඩා දැම්මා ඒ අතීතයත් මතක තියාගෙන තමයි සජිත් ප්‍රේමදාසට උදව් කරන්නේ.”
ගෝඨාභය රාජපක්ෂ කිරිම සඳහා කිසිඳු කොන්දේසියකින් තොරව සජිත් ප්‍රේමදාස හට සහාය දෙන බව කී බ්‍රිටෝ ප්‍රනාන්දු එහෙත් ඔහු නැවත වරක් ජනතාව රැවටීමත් උත්සාහ කළහොත් රට වළපල්ල යාම නවතාලීමට නොහැකි වන බවටද අනතුරු ඇඟවීය.
“ඩේසි ආච්චිලාගේ මැණික් මලු කොහෙ ගියාද දන්නෙ නෑ, තාජුඩීන්ලගෙ මරන පරීක්ෂණ මිස යන්න නැහැ ඉදිරියට, අර 11 දෙනෙක් නාවික හමුදාවෙන් පැහැරගෙන ගියා කියලා ඉතා පැහැදිලි සාක්ෂි තියෙද්දි ඒකෙ සැකකාරයෝ ජනාධිපති අතින් උසස් වීම් ලබනවා,” යි අතුරුදහන් වුවන්ගේ පවුල් එකතුවේ සභාපතිවරයා පැවසීය.
එක්සත් ජාතික පෙරමුණ හා සජිත් ප්‍රේමදාස සමඟ කොතරම් ප්‍රශ්න තිබුනද ප්‍රතිවාදි අපේක්ෂකයා ලෙස ගෝඨාභය රාජපක්ෂ ඉදිරිපත් වන විට එම සියලු ප්‍රශ්න පසෙකින් තියන්නට කිසිදු අපහසුතාවයක් නැති බව අතුරුදහන් වුවන්ගේ පවුල් එකතුවේ සභාපති බ්‍රිටෝ ප්‍රනාන්දු 09 බදාදා සිවිල් සංවිධාන හා වෘත්තිය සමිති එක්ව කොළඹ පැවැත්වු ජන හමුවක දී කියා සිටියේය.
Facebook Comments
