සිව් වසරකට ඉහතදී අලුත්ගම දර්ගා නගරයේ සිදුවු මුස්ලිම් විරෝධි ප්‍රහාරයට රාජපක්ෂවරුන් වග කිව යුතු බව මෙන්ම එම ගැටුමට දායක වු ස්වාමීන් වහන්සේලා ගැටුම සැලසුම් කරන ලද මහ මොළකරුවන් හෙළි කිරීමට සුදානම් බව සුව ඇමැතිවරයා පවසයි.
“රාජපක්ෂලාගේ වුවමනාව මත තමයි එම ගැටුම ඇති වුයේ. ඊට උපදෙස් ලබාදුන්නේ කවුද කියලා හෙළි කිරීමට එම ස්වාමීන් වහන්සේලා සුදානමින් සිටිනවා.” යි ඇමැති රාජිත සේනාරත්න 07 බදාදා බේරුවල පැවති ජන හමුවකදී ප්‍රකාශ කර තිබේ.
තමන් ජාතිවාදින්ට හෝ සිංහල බෞද්ධ බලවේග වලට යටත් නොවු බව කී ඇමැතිවරයා පොහොට්ටුවට ඡන්දය ලබා දී මිනී මරන යුගයක් යළි නිර්මාණය කිරීමට ඉඩ ලබා නොදෙන ලෙස ඉල්ලා සිටියේය.
වත්මන් රජයේ විවිධ ගැටලු ඇති බව පිළිගත් සුව ඇමැතිවරයා හිටපු ජනාධිපතිවරයාට යළි බලයට ඒමට ඉඩ දෙන්නේ නොමැති බවත් ජනවාරි 08 ජනවරම ඉදිරියටම ගෙන යාමට අවශ්‍ය ජන බලය පෙබරවාරි මස 10 දා ජනතාව ලබාදෙන බවට විශ්වාසය පළ කළේය.
ජාතිවාදය නිසාවෙන් තමන්ට රාජපක්ෂවරු එපා වු බව කී ඇමැති රාජිත සේනාරත්න බලය බෙදා ජාතික ප්‍රශ්ණය විසඳිය යුතු බවට එදා සිටි මතයේම අදත් සිටින බව වැඩි දුරටත් කියා සිටියේය.
Facebook Comments
