“පක්ෂය විනාශ කරන්න එපා” ශ්‍රීලනිප, පොහොට්ටු දීගයට චන්ද්‍රිකාගේ විරෝධය

0
Ivory Agency Sri Lanka
wedding people

ශ්‍රී ලංකා නිදහස් පක්ෂ පාර්ලිමේන්තු මන්ත්‍රී කණ්ඩායම පොදුජන පෙරමුණේ ජනාධිපති අපේක්ෂක ගෝඨාභය රාජපක්ෂ හට සහය දැක්වීමට ගත් තීරණයට පක්ෂ අනුශාසිකාව සිය විරෝධය පළ කර තිබේ.

බහුතර ආසන සංවිධායකවරු පොහොට්ටු පක්ෂය සමඟ එක්වීමට විරෝධය පළ කර තිබියදී එසේ එම පක්ෂයට සහය පළ කිරිමට ගත් තීරණය ශ්‍රීලනිපය පාවා දීමක් බව හිටපු ජනාධිපතිනි චන්ද්‍රිකා බණ්ඩාරනායක කුමාරතුංග ලිපියක් මඟින් ශ්‍රීලනිප ‌ලේකම් දයාසිරි ජයසේකරට චෝදනා කර ඇත.

“අපගේ සංවිධායකයින්ගෙන් 90% කට වඩා වැඩි පිරිසක් තමන් ‌පොහොට්ටුව සමග ‌එක්වීමකට විරුද්ධ බව ප්‍රකාශ කර ඇති විට, ඔබ ගෝටාට සහාය දීමට තීරණය කරන්නේ කෙසේද? මෙය ශ්‍රී ලංකා නිදහස් පක්ෂය මුලුමනින්ම පාවාදීමකි.” යැයි පක්ෂ අනුශාසිකාව යවා ඇති ලියුමේ සඳහන්ව තිබේ.

පක්ෂය දුර්වල වූයේ අප එක්සත් ජාතික පක්ෂය සහ අනෙකුත් පක්ෂ සමඟ සන්ධානයට සම්බන්ධ වූ නිසා නොව බව පෙන්වා දෙන චන්ද්‍රිකා බණ්ඩාරනායක කුමාරතුංග තම පක්ෂයේ නායකයාට සන්ධානයට නායකත්වය දීමට ශක්තියක් හා දැක්මක් නොතිබූ බැවින් සහ රාජපක්ෂලාගේ කුමන්ත්‍රණ වලට රැවටීමත්, යහපත විනාශ කර පක්ෂය අවුල් කිරීමත් නිසා බවයි අවධාරණය කර ඇත්තේ.

“මෛත්‍රිට ආණ්ඩුවේ බලය පාවිච්චි කිරීමේ දක්ෂතාවයක් තිබුනේ නම් සහ ශ්‍රී ලංකා නිදහස් පක්ෂය ගොඩනඟා නීතිය නිසි ලෙස ක්‍රියාත්මක වීමට ඉඩ දී රාජපක්ෂලාගේ මිනීමැරුම් සහ මංකොල්ලකෑම්වලට එරෙහිව පියවර ගත්තේ නම්, රට සහ ශ්‍රී ලංකා නිදහස් පක්ෂය මේ වන විට ඉතා ශක්තිමත් වනු ඇත.” යි ඇය දයාසිරි ජයසේකර මන්ත්‍රීවරයාට දන්වා සිටී.

ශ්‍රී ලංකා නිදහස් පක්ෂයට වඩාත්ම ආදරය කරන හා දන්නා පුද්ගලයා තමන් බව පවසන හිටපු ජනාධිපතිනි චන්ද්‍රිකා බණ්ඩාරනායක කුමාරතුංග පෞද්ගලික අවශ්‍යතාවයට පමණක් සීමා නොවී අපගේ වටිනා පක්ෂය විනාශ කිරීමට ඉඩ නොදෙන ලෙස පක්ෂ ලේකම් දයාසිරි ජයසේකරගෙන් වැඩි දුරටත් ආයාචනා කර ඇත.

Facebook Comments