මීළඟට පත්වන ජනාධිපතිවරයාගේ ප්‍රමුඛතම වගකීම වනුයේ ජාති, ආගම් බෙදීම් වලින් තොර ජන සමාජයක් ගොඩනැංවීම බවට ජාතිවාදයට එරෙහි බෞද්ධ භික්ෂුන් වහන්සේ නමක් ප්‍රකාශ කර තිබේ.
රටේ ආරක්ෂාව ඇති කිරිම කළ යුත්තේ අවි ආයුධ වලින් සන්නද්ධ කිරීම හෝ හමුදා ශක්තිමත් කර රට වටේට යුද නැව් තැබීම නොවන බව පෙන්වා දෙන කථිකාචාර්ය ගල්කන්දේ ධම්මානන්ද හිමියන් ඒ සඳහා කළ යුත්තේ මිනිස්සු අතරේ එකිනෙකාට සම්බන්ධතා පවත්වන, ආදරය කරන, සමාජයක් නිර්මාණය කිරිම බවයි අවධාරණය කරන්නේ.
“ජනකොටස් අතරේ සම්බන්දේ හදන එක වගේම, අධ්‍යාපනය මානුෂික කරන එක. අධ්‍යාපනය සඳහා තරඟ විභාග වලින් එකිනෙකා පරයා යන අධ්‍යාපනය නෙමෙයි. මිනිස්සුන්ට, ගහකොළට, සතා සීපාවාට, පරිසරයට ආදරය කරන මනුෂ්‍යයා නිර්මාණය කරන එක තමයි මේ අවස්ථාවෙදි ප්‍රමුඛ කාර්යයන් වනු ඇත්තේ.”
“මෙතනින් ඉස්සරහට ගමන තියෙන්නේ යුද වීරත්වයවත්, ඒ සංග්‍රාම ජයග්‍රහණ මතවත් නෙවෙයි. මනුෂ්‍යයින් ලෙස, මිනිසුන් එකිනෙකාට ආදරය කරන, සමාජයක් ගොඩනැංවීම තුළයි. ඒක ඇතුළේ අවි ආයුධ, යුද ජයග්‍රහණ, සංග්‍රාම විජයග්‍රහණයේ කිසිවක් අදාල වෙන්නේ නැහැ. යුදකාමීත්වය මිනිසුන් අතර වෛරය ක්‍රෝධය, ඇති කරවනවා.”
රටේ ඉදිරි ගමන තීරණය වන්නේ මනුෂ්‍යත්වය මත බැවින් අනාගත ජනාධිපතිවරයා විසින් මිනිසුන් මිනිසුන්ව සුවපත් කරවන, එකිනෙකාට ආදරය කරන සමාජයක් ගොඩනැංවීමට ක්‍රියා කළ යුතු බව කථිකාචාර්ය ගල්කන්දේ ධම්මානන්ද හිමියන් වැඩි දුරටත් වදාළේය.
Facebook Comments
