පොලිසිය සහ බුද්ධි අංශ දේශපාලන අතකොළු නොවිය යුතු බව එක්සත් ජනරජ පෙරමුණේ නායකයා අවාධාරණය කර තිබේ.
පොලිසිය, අපරාධ පරීක්ෂණ දෙපාර්තමේන්තුව, වෙනත් විමර්ශන අංශ අදාළ අමාත්‍යවරයාගේ සහ රජයේ අතකොළු බවට පත්වීම ගැටලු සහගත බවයි පාර්ලිමේන්තු මන්ත්‍රී පාඨලී චම්පික රණවක පෙන්වා දෙන්නේ.
බුද්ධි අංශ රාජ්‍ය ප්‍රතිවාදීන්ගේ දත්ත රැස්කිරීමට යොදා ගන්නා තත්ත්වයක් නිර්මාණය වී ඇති බවත් ඒ හේතුවෙන් ජාතික ආරක්ෂාවට අදාල තොරතුරු රැස් කිරීම අඩපණ වී ඇති බවයි මන්ත්‍රීවරයා පෙන්වා දෙන්නේ.
එවැනි තත්ත්වයකදී රාජ්‍ය ආරක්ෂාව තහවුරු කිරීම සඳහා පොලිසිය, බුද්ධි අංශ සහ වෙනත් විමර්ශන අධිකාරීන් ස්වාධීන කළ යුතු බව මන්ත්‍රී පාඨලී චම්පික රණවක පවසයි.
හිටපු පාලකයන් සිදුකළ වැරදි තුනක්
2010 සිට 2015 දක්වා කාලයේදී ප්‍රධාන වැරදි තුනක් එවකට පාලකයන් සිදු කළ බවද මන්ත්‍රීවරයා පෙන්වා දුන්නේය.
කුමරන් පද්මනාදන් ඇතුළු අන්තවාදීන් රැසක් සාධාරණ හේතුවලින් තොරව නිදහස් කිරීමට පියවර ගත් බව කී මන්ත්‍රීවරයා ඒ මඟින් මධ්‍යස්ථ පිරිස් පාලනයට එවක රජය සැලසුම් කර තිබූ බවට චෝදනා කළේය.
තව්හිද් ජමාත් සංවිධානය නිර්මාණය වීමට දැනුවත්ව ඉඩකඩ සැලසීමට පාලකයන් පියවර ගෙන තිබු බවත් ඉන් බෙදී ආ සහරාන් ඇතුළු පිරිස පාස්කු ප්‍රහාරයට සම්බන්ධ බව හෙළිවු බව ද පැවසීය.
ඔවුන් මගින් මධ්‍යස්ථ මුස්ලිම් ජාතිකයන්ට අභියෝග කිරීමට හිටපු පාලකයන් ක්‍රියා කළ බව ද පාර්ලිමේන්තු මන්ත්‍රී පාඨලී චම්පික රණවක කියා සිටියේය.
හිටපු පාලකයන් සිදුකළ තුන්වන වරද ලෙස ඔහු කියා සිටියේ විවිධ භික්ෂූන් යොදා ගනිමින් බෞද්ධ සම්ප්‍රදායට පටහැනි ව්‍යාපාරයක් ක්‍රියාවට නැංවීම බවයි.
ඉන් ශ්‍රී ලංකාවේ ජාතිකවාදය, වසල ජාතිකවාදයක් බවට පරිවර්තනය කළ බවයි හෙතෙම පෙන්වා දෙන්නේ.
මේ වන විට රටට ආදරය කරන, ආගමික අයිතිවාසිකම් පිළිගන්නා, සැබෑ ජාතිකත්වයක් සහිත ජාතික ව්‍යාපාරයක අවශ්‍යතාව මතුව ඇති බවද මන්ත්‍රීවරයා කියා සිටියේය.
එය විධිමත්ව ක්‍රියාවට නැංවීම පාස්කු ප්‍රහාරයෙන් මිය ගිය පුද්ගලයන්ට කළ හැකි සුදුසුතම උපහාරය බවත් අන්තවාදය පෝෂණය කරමින්, අහිංසක ජනතාව විපතට පත් කරමින්, දේශපාලන වාසි ලබාගත් පුද්ගලයන්ට එරෙහිව නීතිය දැඩිව ක්‍රියාත්මක කළ යුතු බවද මන්ත්‍රීවරයා අවධාරණය කළේය.
එක්සත් ජනරජ පෙරමුණේ නායක පාර්ලිමේන්තු මන්ත්‍රී පාඨලී චම්පික රණවක එම කාරනා කියා සිටියේ, පාස්කු ප්‍රහාරයෙන් මිය ගිය පුද්ගලයන් සිහිකිරීම සඳහා ශාන්ත අන්තෝනි දෙව් මැදුරේ පැවති විශේෂ සැමරුම් අවස්ථාවේදීය. එහිදී පාස්කු ප්‍රහාරයෙන් මියගිය පුද්ගලයන් සමරා ඉටි පහන් දැල්වීමටද පියවර ගැනිණ.
Facebook Comments
