එක්සත් රාජධානිය මුල් කරගත් ගෝලීය දෙමළ සංසදය (GTF) සහ අමරපුර නිකායේ අනුනායක හිමිනමක් ඇතුළු බෞද්ධ භික්ෂූන් වහන්සේලා කණ්ඩායමක් විසින් සම්පාදනය කරන ලද“හිමාලයා ප්‍රකාශනය” සඳහා අරමුදල් සපයා ඇත්තේ ස්විස්ටර්ලන්ත රජය විසින් බව හෙලි වී තිබේ.
ශ්‍රී ලංකාව තුළ පළ කෙරෙන ප්‍රධාන ධාරාවේ ඉංග්‍රීසි පුවත්පතකට ලියමින් යහපාලන ආණ්ඩු සමයේ හිටපු මානව හිමිකම් කොමසාරිස් අම්බිකා සත්කුනනාදන් නීතිඥවරිය සදහන් කර ඇත්තේ මෙම මුලපිරීම පිළිගැනීමට වඩා දැඩි විවේචනවලට ලක්ව ඇති බවයි.
“ගෝලීය දෙමළ සංසදයේ (GTF) හා යහපත් ශ්‍රී ලංකාවක් සඳහා වූ සංඝ සංසදය එකතුවී, යුද්ධයෙන් විපතට පත් කාන්තාවන්ගේ සංගමයේ මැදිහත්වූ මෙම මුලපිරීම සඳහා ස්විස්ටර්ලන්ත රජය විසින් අරමුදල් සැපයීම දේශීය සහ විදේශීය දෙමළ ප්‍රජාවගේ කෝපයට හේතු වී තිබේ.”
යුද අපරාධ සහ මනුෂ්‍යත්වයට එරෙහි අපරාධ පිළිබඳව ශ්‍රී ලංකා රජයේ ආරක්ෂක හමුදාවලට එල්ලවන චෝදනා සම්බන්ධයෙන් ජිනීවා පදනම් කරගත්, එක්සත් ජාතීන්ගේ මානව හිමිකම් කොමිසම සහ දෙමළ ජනයා වගවීම සඳහා දැඩි ලෙස බලකරමින් සිටින අතර වාරයේ, ගෝලීය දෙමළ සංසදයේ සහ බෞද්ධ භික්ෂුන්ගේ ප්‍රකාශය සඳහා ස්විස්ටර්ලන්තය අරමුදල් සැපයීම ලොව පුරා සිටින දෙමළ ප්‍රජාව දැඩි ලෙස කම්පාවට පත් කිරීමට හේතු වී ඇත.
ඒකාබද්ධ හිමාලයා ප්‍රකාශනය ජනාධිපතිවරයාට බාරදීමෙන් පසු ගෝලීය දෙමළ සංසදයේ නායකයන් අස්ගිරි සහ මල්වතු මහනාහිමිවරුන් බැහැදුටුවද ශ්‍රී ලංකාවේ බෞද්ධ භික්ෂුන් අතර ඊට ප්‍රසාදයක් ලැබී නොමැති සේම එම ප්‍රකාශය අමරපුර නිකායේ මතය නොවන බව එම සංඝ සභාවේ සහකාර ලේඛකාධිකාරී හිමියන් විසින් දැනුම් දී තිබේ.
ත්‍රෛනිකායික මහානායක ස්වාමින්වහන්සේලා ඇතුළු මහා සංඝරත්නයේ සහ පොදු මහජනතාවගේ දැනගැනීම සදහා බව පවසමින් 2023 දෙසැම්බර් 30 වැනිදා ශ්‍රී ලංකා අමරපුර මහාසංඝ සභාවේ සහකාර ලේඛකාධිකාරී අම්බලන්ගොඩ සුමේධානන්ද නාහිමියන් විසින් නිකුත් කළ නිවේදනයක් මගින් දැනුම් දී ඇත්තේ හිමාලයා ප්‍රකාශනයට ශ්‍රී ලංකා අමරපුර මහා සංඝසභාවේ අනුමැතියක් නොමැති බවයි.
“හිමාලයා ප්‍රකාශනයට ශ්‍රී ලංකා අමරපුර මහාසංඝ සභාවේ එකගතාවයක් හෝ ඒ පිළිබදව සාකච්ඡාවක් පවත්වා නොමැති බවත්, හුදෙක් එය භික්ෂුන් වහන්සේ කිහිප නමකගේ පෞද්ගලික මත ප්‍රකාශ කිරීමක් පමණක් බවත් මෙයින් අවධාරණය කර සිටිමී.”
‘සියලුම ප්‍රජාවන්ගේ යහපැවැත්ම ප්‍රවර්ධනය කරන බහුත්වවාදී ශ්‍රී ලංකාවක් ඇතිකිරීම’ සඳහා යැයි ප්‍රසිද්ධියට පත් කොට ඇති “හිමාලයා ප්‍රකාශනය” සදහා GTF කණ්ඩායම සමග ප්‍රධාන ලෙස වැඩ කටයුතු කර තිබුනේ අමරපුර නිකායේ අඹගහපිටිය පාර්ශවයේ අනුනායක ආචාර්ය මාදම්පාගම අස්සජි ස්වාමීන්වහන්සේ ප්‍රමුඛ භික්ෂුන් වහන්සේලා පිරිසකි.
ශ්‍රී ලංකා ආරක්ෂක හමුදා වෙත එල්ල වී තිබෙන බරපතල යුද අපරාධ චෝදනා සහ එක්සත් ජාතීන්ගේ මානව හිමිකම් කොමිසම විසින් යෝජනා කරන ලද, බොහෝ දෙමළ ඩයස්පෝරා සංවිධාන විසින් ඉල්ලා සිටින ජාත්‍යන්තරව අධීක්‍ෂණය කෙරෙන වගවීමේ යාන්ත්‍රණයක් පිළිබඳව මෙම ප්‍රකාශය කථා නොකරයි.
බුද්ධශාසන, ආගමික හා සංස්කෘතික කටයුතු අමාත්‍යාංශය ද පවසා ඇත්තේ ඒකාබද්ධ ප්‍රකාශය පිළිබඳ කිසිදු තොරතුරක් තමන් සතුව නොමැති බවයි.
“අන්තර් ඇදහිලි මුල පිරීම් ශ්‍රී ලංකාවට අලුත් දෙයක් නොවුන ද ඊට පටහැනිව, එවැනි මුල පිරීම් ජාත්‍යන්තර පරිත්‍යාගශීලීන් විසින් අරමුදල් සපයනු ලැබ ඇති අතර එය දශක ගණනාවක් පුරා කුඩා සාමය ගොඩනැගීමේ කර්මාන්තයක් නිර්මාණය කිරීමට දායක වී ඇත. නමුත් විවිධ හේතූන් මත මෙම මුලපිරීම් අසාර්ථක විය. එක් ප්‍රධාන හේතුවක් නම්, දෙමළ සහා මුස්ලිම් ජාතිකයන් එය ඔවුන්ගේ සමාජ-ආර්ථික හා දේශපාලනික වශයෙන් බලපාන සාධකයක් ලෙස හඳුනාගෙන තිබියදීත්, මෙම මුලපිරීම් මගින් අන්තර් ප්‍රජා සබඳතා කෙරෙහි සිංහල බෞද්ධ බහුතරවාදයේ බලපෑම ආමන්ත්‍රණය නොකිරීමයි. ” යැයි අම්බිකා සිය ලිපියේ ලියා තිබුනේය.
දෙමළ ජනතාව විසින් ප්‍රතික්ෂේප කරන ලද මෙම මතභේදාත්මක “හිමාලයා ප්‍රකාශනය” සඳහා අරමුදල් සැපයීම පිළිබඳව කොළඹ සිටින ස්විස්ටර්ලන්ත තානාපතිවරයා හෝ ජිනීවා රජය කිසිවක් ප්‍රකාශ කර නොමැත.
Facebook Comments
