අන්තර්ජාතික තරුණ විද්‍යාඥයින්ගේ තරගාවලියට ප්‍රථම වරට ශ්‍රී ලාංකික පාසල් සිසුන්

ජර්මනියේ ස්ටුට්ගාඩ් හි පැවැත්වෙන 24 වන අන්තර් ජාතික තරුණ විද්‍යාඥයින්ගේ තරගාවලිය සඳහා තම විද්‍යාත්මක පර්යේෂණ ඉදිරිපත් කිරීමට අවස්ථාව ලැබූ සිසුන් දෙදෙනාට ගුවන් ටිකට්පත් ප්‍රධානය අධ්‍යාපන අමාත්‍ය අකිල විරාජ් කාරියවසම් අතින් අධ්‍යාපන අමාත්‍යාංශයේ දී සිදු කෙරුණි.

අමාත්‍යවරයා අතින් ගුවන් ටිකට් පත් ලබාගත්තේ Modification of Microbiology fuel cells via the immobilization of the anaerobe Clostridium butyricum and Escherichia coli-XII blue පර්යේෂණය ඉදිරිපත් කරන මන්නාරම සිත්ති විනායගම් හින්දු විද්‍යාලයේ ජිතේන්ද්‍රන් ජූට් සජිත් හා Deposition of air pollutants on pollen grains and occurrence of respiration allergies among humans පර්යේෂණය ඉදිරිපත් කරන කොළඹ නාලන්ද විද්‍යාලයේ රකිඳු වික්‍රමරත්න යන සිසුන් ය.

සංවර්ධනය සඳහා තරුණ පරම්පරාවේ උසස් චින්තන හැකියාවන් ප්‍රයෝජනයට ගැනීමේ අරමුණින් අන්තර් ජාතික තරුණ විද්‍යාඥයින්ගේ තරගාවලිය පැවැත්වෙන අතර ඒ සඳහා ඉදිරිපත්වීමට අවස්ථාව ලද 39 වන රට බවට පත්වීමට ශ්‍රී ලංකාවට හැකි වී ඇති අතර එහිදී තම විද්‍යාත්මක පර්යේෂණ ඉදිරිපත් කිරීමට මෙම සිසුන් දෙදෙනාට අවස්ථාව ලැබී තිබේ.

ඔවුන් ඉදිරිපත් කළ විද්‍යාත්මක පර්යේෂණ ජාත්‍යන්තර ප්‍රමිතියකින් යුක්තව ඉදිරිපත් කළ බවට එම සංගමයේ පිළිගැනීමට ලක් වීම හේතුවෙන් මෙම අවස්ථාව ලැබී ඇති බවයි රජය පවසන්නේ.

ලෝකය පුරා විසිරී සිටින තරුණ විද්‍යාඥයින්ගේ ජාත්‍යන්තර ප්‍රමිතියෙන් යුත් පර්යේෂණ මූලික කරගනිමින් මෙම තරගාවලිය පැවැත්වෙන අතර 2016 අප්‍රේල් මස රුමේනියාවේ පැවති මෙම තරගාවලියට ශ්‍රී ලංකාවේ සිසුන් දෙදෙනෙකුට නිරීක්ෂණ මට්ටමින් පමණක් සහභාගිවීමට අවස්ථාව ලැබී තිබුණි.

මෙම තරගාවලියට සහභාගිවීම හරහා ශ්‍රී ලාංකික තරුණ විද්‍යාඥයින්ට ජාත්‍යන්තර මට්ටමේ අත්දැකීම් ලබාගැනීමේ අවස්ථාව උදාවන අතර ඒ මගින් මෙරට විද්‍යාත්මක පර්යේෂණ සඳහා පාසල් සිසුන්ගේ උනන්දුව ඉහළ යනු ඇති බවට අධා්‍යපන අමාත්‍යංශය විශ්වසය පළ කරයි.