රොටි කන්නවත් සල්ලි නැතිව වතු කම්කරුවන් සටනේ

දරාගත නොහැකි ආකාරයට අත්‍යවශ්‍ය ආහාර ද්‍රව්‍ය වල මිල දිනෙන් දින ඉහළ ඉහල යමින් තිබියදී තමන්ට ලැබෙන වැටුප බඩ වියත රැක ගැනීමට කිසිදු අයුරකින්වත් ප්‍රමාණවත් නොවීම ගැන විරෝධය දක්වමින් ලංකාවේ ප්‍රධාන පෙලේ තේ වතු යායක කම්කරුවන් පිරිසක් උද්ඝෝෂණයක් දියත් කර තිබේ.

ලංකෙම් ව්‍යාපාර සමුහයට අයත් ආගරපතන, ටොරින්ටන් වතු යායේ තේ කම්කරුවන් සිය ගණනක් නොවැම්බර් 29 වැනි සඳුදා උද්ඝෝෂණය දියත් කර තිබුනේ රුපියල් දස දහසකින් වැටුප් වැඩිකර ගැනීම ඇතුළු ඉල්ලීම් කිහිපයක් මුල් කර ගනිමින් රාජ්‍ය සේවක වැටුප් වැඩිකර ගැනීමේ වෘත්තීය සමිති එකමුතුව දහවල් 12ට දිවයින පුරා විරෝධතා ව්‍යාපාරයක් දියත් කරමින් තිබියදීය.

පසුගිය වසරේ තේකොල කිලෝග්‍රෑම් අසූ ලක්ෂයක් අපනයනය කොට ඇති ලංකෙම් සමාගම පවසන්නේ රටේ රබර් නිෂ්පාදනයෙන් 4%ක් ද තමන් සතු බවයි.

ඌව පළාතේ වැඩිම තේ නිෂ්පාදනයක් සහිත කම්හල ඇත්තේ සෑම අවුරුද්දකම කළු තේ කිලෝග්‍රෑම් පහළොස් ලක්ෂයක අස්වැන්නක් ලබන ආගරපතන වතුයාය සතුව බව ලංකෙම් සමාගම කියා සිටී.

එම සමාගම නියමිත වැටුප් නොගෙවන බවට චෝදනා කරමින් කම්කරුවන් සටන් බිමට බැස ඇත්තේ ඇඟලුම් කර්මාන්තය, වතුකරය, සංචාරක කර්මාන්තය සහ ගෘහ සේවය ඇතුළු ක්ෂේත්‍ර සම්බන්ධයෙන් සොයා බැලීමට සමකාලීන වහල් භාවය පිළිබඳ එක්සත් ජාතීන්ගේ විශේෂ නියෝජිත ටොමෝයා ඔබොකටා මේ දිනවල ශ්‍රී ලංකාවේ නිල සංචාරයක යෙදී සිටියදීය.

වතු කම්කරු ජනතාව ප්‍රධාන ආහාරයක් ලෙස රොටි පරිභෝජනය කරන බව පෙන්වා දෙන උද්ඝෝෂකයන් අවධාරණය කළේ තිරිඟු පිටි මිල ඉහළ දෑමීමට කටයුතු කිරීම නිසා සියලුම වතු කම්කරුවන් දෛනික ආහාරය සපයා ගැනීමේ ගැටළුවකට මුහුණ පා සිටින බවයි.

ප්‍රීමා සමාගම නොවැම්බර් 29 වැනි සදුදා පෙරවරුවේ නිවේදනය කළේ පසුගිය 27වැනි දින සිට ක්‍රියාත්මක වන පරිදි තිරිඟු පිටි මිල රුපියල් 17.50කින් ඉහළ දැමු බවයි.

සෙරන්ඩිබ් සමාගමත් තිරිඟු පිටි කිලෝවක මිල රුපියල් 17.50කින් ඉහළ දමා ඇති බව තහවුරු කර තිබේ.

උද්ඝෝෂනයේ නිරත වු වතු කම්කරුවන් වැඩි දුරටත් අවධාරණය කළේ සිය දෛනික මුලික වැටුප කප්පාදු කිරීමට වතු පාලනාධිකාරිය ක්‍රියාකිරීම නිසා සිය ආර්ථිකය දැඩි කඩා වැටීමකට ලක්ව ඇති බවයි.

දවසට 1000

වතු කම්කරුවන්ගේ දිනක මුලික වැටුප රුපියල් දහසක් ලෙස පඩිපාලක සභාව මගින් නියම කොට එය ගැසට් නිවේදනයක් මගින් ප්‍රකාශයට පත් කර ඇතත් වතු සමාගම් විසින් විවිධ අසාධාරණ කොන්දේසි පනවමින් මූලික වැටුප රුපියල් දහස කප්පාදු කිරීමට කටයුතු කරන බවත් ඔවුන් එහිදී අවධාරණය කර තිබේ.

රුපියල් දහසක දෛනික මුලික වැටුපක් ගෙවීමට නම් එක් කම්කරුවෙක් දිනකට අවම වශයෙන් තේ දළු කිලෝ 20 ක් කැඩිය යුතු බවට වතු කළමනාකරුවන් විසින් කොන්දේසි පනවා ඇති බව පෙන්වා දෙන වතු කම්කරුවන් එහිදී තව දුරටත් පවසා තිබුනේ නොඑසේ නම් දිනකට නෙලන තේ දළු ප්‍රමාණය අනුව වැටුප් ගෙවීමට වතු කළමනාකරුවන් විසින් කටයුතු කරන බවයි.

පළාත් බද වාර්තාකරුවන් පවසන්නේ එක් කම්කරුවකුට දිනකට අවම වශයෙන් තේ දළු කිලෝ 20 ක් කැඩීමට නොහැකි වූවහොත් වතු පාලනාධිකාරිය විසින් ගෙවීම් කරනු ලබන්නේ එක් කිලෝවක් වෙනුවෙන් රුපියල් හතලිහත් පනහත් අතර මුදලක් බවයි.

තේ වගාවට අවශ්‍ය පොහොර නිසි වේලාවට නොලැබීමත්, එහි හිමිකරුවන් විසින් වගාව නියමාකාර ලෙස කළමනාකරණය නොකිරීමත් නිසා දිනකට එක් කම්කරුවෙක්ට තේ දළු කිලෝ 20 ක් කිසිසේත්ම නෙළිය නොහැකි බව උද්ඝෝෂණයේ නිරත වතු කම්කරුවෝ වැඩි දුරටත් සදහන් කළහ.

තේ වගාව යටපත් කරමින් ඉහළට නැගී තිබෙන වල් පැලද ඔවුන් සිය විරෝධතාවයේදී මාධ්‍යවේදින්ට දැක ගැනීමට සලස්වා තිබුනි.

රුපියල් දහස දක්වා ඉහළ දැමු වතු කම්කරුවන්ගේ දෛනික වැටුප වතු හාම්පුතුන් විසින් කප්පාදු කරන බවට දිගින් දිගටම වතුකරයෙන් චෝදනා එල්ල වෙමින් පවති.

වතු කම්කරුවන්ගේ දිනක මුලික වැටුප රුපියල් දහසක් ලෙස පඩිපාලක සභාව මගින් නියම කොට එය ගැසට් නිවේදනයක් මගින් ප්‍රකාශයට පත් කර ඇතත් වතු සමාගම් විසින් විවිධ අසාධාරණ කොන්දේසි පනවමින් මූලික වැටුප රුපියල් දහස කප්පාදු කිරීමට විරෝධය දක්වමින් පසුගිය මාස කිහිපය තුලදී වතු කරයේ විරෝධතා රැසක් දියත් කෙරුණි.

කෑම පැයේ විරෝධතා

රුපියල් දස දහසකින් වැටුප් වැඩි කර ගැනීම, විශ්‍රාම යාමේ අවුරුදු හැට පහේ සීමාව ඉවත් කිරීම, භාණ්ඩ මිල ඉහළ යාම ඇතුළු තවත් කරුණු කිහිපයක් මුල් කරගනිමින් නොවැම්බර් 29 වැනි සදුදා දිවා කෑම පැයේදී දිවයිනේ ප්‍රදේශ රැසක රජයේ සේවකයන් විරෝධතාවල දියත් කර තිබුනි.

කොළඹ, මහනුවර, බේරුවල, ගාල්ල ඇතුළු තවත් ප්‍රදේශ ගණනාවක මෙලෙස විරෝධතා පැවැති බව ජනමාධ්‍ය වාර්තා කර තිබේ.

සංවර්ධන නිලධාරීන්, ග්‍රාම නිලධාරීන්, කළමනාකරණ සේවය ඇතුළු තවත් ක්ෂේත්‍ර ගණනාවක රජයේ නිලධාරීන් මෙම විරෝධතාවලට එක්ව තිබෙන අතර ඒ සදහා ප්‍රමුඛතම වෘත්තිය සමිති තිහකට වැඩි ප්‍රමාණයක සහාය හිමිව ඇත.

රාජ්‍ය සේවකයන් රටට බරක් ලෙස මුදල් අමාත්‍යවරයා සිදු කළ ප්‍රකාශය ඉල්ලා අස්කර ගැනීමට බල කිරීම හා අදහස් ප්‍රකාශ කිරීමේ අයිතියට වැට බඳින චක්‍රලේඛය අහෝසි කිරීමට බල කිරීමද විරෝධතාවයේ ඉල්ලීම් අතරට ඇතුලත්ය.

අද දිනයේ ආරම්භ වුයේ අරගලය පළමු වෘත්තීය සමිති ක්‍රියාමාර්ගය බව ජනමාධ්‍යවෙත පවසා ඇති රාජ්‍ය සේවා වැටුප් වැඩිකරගැනීමේ වෘත්තීය සමිති කමිටුවේ සම කැඳවුම්කරු වන සමන් රත්නප්‍රිය ආණ්ඩුවට අනතුරු අගවා ඇත්තේ මේ සම්බන්ධයෙන් අවධානය යොමු නොකළහොත් සතියකට පසු අඛණ්ඩ වෘත්තීය සමිති ක්‍රියාමාර්ගවලට යොමුවන බවයි.

රටේ ආර්ථිකය ශක්තිමත් කිරීමට උර දෙන පුද්ගලික අංශයේ සේවකයන්ටත් මෙවර අයවැයෙන් රුපියල් දස දහසක වැටුප් වැඩිවීමක් ලබා දෙන ලෙස ජාතික කම්කරු උපදේශක සභාවේ සාමාජික සංගම් රජයට බල කර තිබේ.