කොළඹ පැවති මාධ්‍ය හමුවකදී අදහස් දැක්වූ රාජ්‍ය ඇමති පාලිත රංගෙ බණ්ඩාර මහතා, ‘හිටපු ජනාධිපති මහින්ද රාජපක්ෂ මහතා අයුතු ජන රාශිය යටතේ අත්අඩංගුවට පත් වන මෙරට පළමුවන නායකයා වීමට ඉඩ ඇති බව’ කියා සිටියේය.
මහනුවර සිට කොළඹ බලා එන ජනසටන පාද යාත්‍රාවේදී ගිලන් රියකට පහර දීම සිදුවූයේ කණ්ඩායමක් එක් වී ප්‍රචණ්ඩත්වයේ යෙදීමක් බවත් එය අයුත් ජනරාශියක් බවයි ඔහු පවසන්නේ.
මෙම පා ගමන සංවිධානය කළ මහින්ද රාජපක්ෂ ඊට වගකිව යුතු බවයි ඇමතිවරයා පෙන්වා දෙන්නේ.
මේ අතර මෙම පාද යාත්‍රාව සංවිධානය කළ සංවිධායකින් පවසන්නේ කොළඹට ඇතුල්වීමේදි එහි නායකයින් කිහිප දෙනෙක් අත්අඩංගුවට ගැනීමේ උත්සාහයක් පවතින බවයි.
සාමකාමීව කටයුතු කරන්න
පාද යාත්‍රාවේ අවසන් දිනය වන අද (01) දිනයේදී මහජන සාමයට බාධාවක් නොවන ආකාරයෙන් සහ දේපළවලට අලාභ හානි කිරීමෙන් තොරව සාමකාමීව කටයුතු කරන්නැයි කොළඹ අතිරේක මහේස්ත්‍රාත්වරිය ඒකාබද්ධ විපක්ෂයේ ප්‍රධානීන් 8 දෙනෙකුට නියෝගයක් නිකුත් කර ඇත.
පෑළියගොඩ පොලිසිය විසින් කල ඉල්ලීමකට අනුව මෙම නියෝගය නිකුත් කළේය.
මහින්ද රාජපක්ෂ මහතා ඇතුළු ඒකාබද්ධ විපක්ෂයේ මන්ත්‍රීවරුන් වන මහින්දානන්ද අලුත්ගමගේ, ලොහාන් රත්වත්තේ, උදය ගම්මන්පිල, ප්‍රසන්න රණතුංග, කනක හේරත්, ප්‍රසන්න රණවීර සහ අමිල කුමාරසිංහ යන පිරිසට මෙම නියෝගය නිකුත් කර තිබේ.
මේ අතර මහින්ද රාජපක්ෂ මාධ්‍යට අදහස් දක්වමින් කියා සිටියේ රැළිය පවත්වන ස්ථානය පිළිබඳව තවමත් ස්ථිර තීරණයක් ගෙන නොමැති බවයි.
Facebook Comments
