පැන්ඩෝරා පත්‍රිකා හෙළිදරව්ව ගැන ලංකාවේ මොකද වුනේ?

පැන්ඩෝරා පත්‍රිකා මගින් හෙළි කළ මුල්‍ය වංචා චෝදනා සම්බන්ධයෙන් වන විමර්ශනවල නවතම තත්වය විමසමින් පාරදෘශ්‍ය භාවය වෙනුවෙන් පිහිටුවා ඇති ජාත්‍යන්තර ආයතනයක් අල්ලස් හෝ දූෂණ චෝදනා විමර්ශන කොමිෂන් සභාවට ලිපියක් යොමු කර තිබේ.

එම ලිපිය මගින් පැන්ඩෝරා පත්‍රිකාවලින් හෙළි වූ වත්කම් මේ වනවිටත් ප්‍රකාශයට පත් වී ඇති දැයි නිශ්චය කර ගැනීමට අල්ලස් හෝ දූෂණ චෝදනා විමර්ශන කොමිෂන් සභාවට හිමි බලය පිළිබඳ නැවතත් අවධාරණය කළ බවයි ට්‍රාන්ස්පේරන්සි ඉන්ටනැෂනල් ශ්‍රී ලංකා ආයතනය පවසන්නේ.

“පැන්ඩෝරා පත්‍රිකා හෙළිදරව්වෙන් පසු, හිටපු නියෝජ්‍ය අමාත්‍ය නිරුපමා රාජපක්ෂ, ඇයගේ සැමියා, සහ හිටපු රාජ්‍ය නිලධාරි ආර්. පාස්කරලිංගම් යන අයගේ වත්කම් සම්බන්ධයෙන්, ට්‍රාන්ස්පේරන්සි ඉන්ටනැෂනල් ශ්‍රී ලංකා ආයතනය විසින් අල්ලස් හෝ දූෂණ චෝදනා විමර්ශන කොමිෂන් සභාවට මෑතක දී පැමිණිලි 2ක් ඉදිරිපත් කරන ලදි.”

අල්ලස් හෝ දූෂණ චෝදනා විමර්ශන කොමිෂන් සභාව අදාළ පුද්ගලයන්ගේ වත්කම් ප්‍රකාශ කැඳවීමක් සහ පරික්ෂා කිරීමක් සිදු කර ඇතිනම්, ඒ සම්බන්ධයෙන් දැනුම්වත් කරන ලෙස ට්‍රාන්ස්පේරන්සි ඉන්ටනැෂනල් ශ්‍රී ලංකා ආයතනය නවතම ලිපිය මගින් ඉල්ලා තිබේ.

සිතාමතා ම වත්කම් සඳහන් කර නැතිදැයි අවබෝධ කර ගැනීමට මෙම තොරතුරු අත්‍යවශ්‍ය වන බවයි ට්‍රාන්ස්පේරන්සි ඉන්ටනැෂනල් ශ්‍රී ලංකා ආයතනය වැඩි දුරටත් පවසන්නේ.

කොමිසම අසමත්

සිය ඥාති දියණියට සහ ඇගේ සැමියාට එල්ල වී තිබෙන මුල්‍ය වංචා චෝදනා සම්බන්ධයෙන් විමර්ශනයක් කර මසක් ඇතුලත වාර්තාවක් ලබා දෙන ලෙස හිටපු ජනාධිපති ගෝඨාභය රාජපක්ෂ කළ නියෝගය ඉටු කිරීමට අල්ලස් හෝ දුෂණ චෝදනා විමර්ශන කොමිෂන් සභාව පසුගිය වසරේදී අසමත් විය.

හිටපු ජනපති හා හිටපු අගමැති ඥාති දියණි නිරූපමා රාජපක්ෂ සහ ඇගේ සැමියා වන තිරුකුමාර් නඩේසන් අතිශය සුඛෝපභෝගී ජීවිතයක් ගත කිරීම සඳහා ව්‍යාජ සමාගමක් ඔස්සේ රැස්කළ ධන සම්භාරයක් යොදාගත් බව ලෝකයේ දැවැන්තම මාධ්‍ය ගවේෂණයකින් අනතුරුව එළි දැක්වූ පැන්ඩෝරා පත්‍රිකාවලින් අනාවරණය කොට ඇති ශ්‍රී ලාංකිකයන් සහ එම ගනුදෙනු පිළිබදව වහාම විමර්ශනයක් කර මසක් ඇතුළත වාර්තාවක් ලබාදෙන ලෙස ජනාධිපති විසින් නියෝග කර තිබුනි.

ජනාධිපති මාධ්‍ය අංශය පවසන පරිදි ජනාධිපති නීති අධ්‍යක්ෂ ජනරාල් හරිගුප්ත රෝහණධීර අල්ලස් හෝ දුෂණ චෝදනා විමර්ශන කොමිෂන් සභාවේ අධ්‍යක්ෂ ජනරාල්වරයා වෙත එම දැනුම් දීම කර ඇත්තේ 2021 වසරේ ඔක්තෝබර් 6 වැනි දිනයි.

එම දැනුම් දීමෙන් අනතුරුව අඩුම වශයෙන් දෙවතාවක් තිරුකුමාර් නඩේසන් කොමිෂන් සභාව හමුවට කැඳවා තිබුණි.

ජනාධිපති නියෝගයෙන් මසක් ගත වු පසු කොමිෂන් සභාවේ අධ්‍යක්ෂ ජනරාල් ඩබ්.කේ.ඩී විජේරත්න 2021 නොවැම්බර් 8 දින වාර්තාවක් යොමු කර තිබේ.

ජනාධිපති මාධ්‍ය අංශය නිවේදනය කර තිබුනේ අදාල විමර්ශන තවමත් අවසන්ව නැති බවයි. අවසන් වාර්තාව ලබා දෙන දිනයක් අල්ලස් හෝ දුෂණ චෝදනා විමර්ශන කොමිෂන් සභාව දැනුම් දී ඇති බවක් එහි සඳහන්ව නොතිබින.

“තිරුකුමාර් නඩේෂන් මහතාගේ බැංකු ගිනුම් විස්තර ඇතුළත් වාර්තා විවිධ බැංකු හා මුල්‍ය ආයතන මගින් කැදවා ඇති අතර, මේ වන විට එම වාර්තා ලැබෙමින් පවතින බව අල්ලස් හෝ දුෂණ චෝදනා විමර්ශන කොමිෂන් සභාවේ අධ්‍යක්ෂ ජනරාල්වරයා දන්වා සිටී. විමර්ශන කටයුතු අවසාන වී නැති බැවින් ඊට අදාළව කැදවන ලද වාර්තා සහ අනිකුත් වැඩිදුර විමර්ශන සිදු කිරීමෙන් අනතුරුව අවසන් වාර්තාව ලබාදීමට කටයුතු කරන බව එමගින් වැඩිදුරටත් දන්වා ඇත.”

2021 නොවැම්බර් මස ආරම්භයේ කොමිසමේ ලේකම් අප්සරා කල්දේරා ජනමාධ්‍ය සමගින් පවසා තිබුනේ පරීක්ෂණ පවතින්නේ මූලික අදියරේ බවයි.

පැන්ඩෝරා පත්‍රිකා (Pandora Papers) යනුවෙන් හැඳින්වෙන එක්කෝටි විසි ලක්ෂයකට ආසන්න ලියවිලි ගොන්නේ දත්ත සමුදාය ලබාගෙන තිබුනේ වොෂින්ටනය මුලස්ථාන කොටගත් ICIJ නමින් ප්‍රකට ගවේෂණාත්මක මාධ්‍යවේදීන්ගේ ජාත්‍යන්තර සමූහය (International Consortium of Investigative Journalists) විසිනි.

එක්සත් ජාතික පක්ෂයේ ජනපති, අගමැති උපදේශකයකුව සිටි බ්‍රිතාන්‍ය වාසී රාමලිංගම් පාස්කරලිංගම්ටද 2021 වසරේ නොවැම්බර් මාසය මුලදී ICIJ විසින් මුල්‍ය වංචා චෝදනා නගා තිබුණි.

ඔහු විසින් බ්‍රිටිෂ් වර්ජින් දුපත්වල පිහිටුවන ලද භාරයන් හා සමාගම්වල ඩොලර් කෝටි ගණනක් මාලබේ පිහිටි HCBT නමින් ප්‍රසිද්ධ හොරයිසන් කොලේජ් ඔෆ් බිස්නස් ටෙක්නොලොජි පුද්ගලික විශ්ව විද්‍යාලයේ ආයෝජනයටත් බ්‍රිතාන්‍යයේ දේපල මිලදී ගැනීමටත් යෙදවූ බව පැන්ඩෝරා පත්‍රිකා මගින් හෙළිදරව් කෙරිණි.

HCBT සභාපති උපුල් දරණාගම විසින් ICIJ හා පවසා තිබුනේ පාස්කරලිංගම් විසින් “තමන්ගේම ධනය යොදවා” විද්‍යාලය පිහිටුවන ලද්දේ ආණ්ඩුවේ කිසිදු නිලයක් නොදැරූ 2008 දී බවයි.

තමන්ට එරෙහිව නැගෙන මුල්‍ය වංචා චෝදනා සම්බන්ධයෙන් කළ විමසීම්වලට රාමලිංගම් පාස්කරලිංගම් කිසිදූ පිළිතුරක් දී නැති බව ICIJ පවසයි.

රණසිංහ ප්‍රේමදාස, ඩිංගිරි බණ්ඩා විජේතුංග ජනාධිපතිවරුන්ගේද රනිල් වික්‍රමසිංහ අගමැතිවරයාගේද උපදේශක තනතුරු දැරූ පාස්කරලිංගම් සම්බන්ධයෙන් පැන්ඩෝරා පත්‍රිකා කරන අනාවරණ ගැන වර්තමාන රජය කිසිදු විමර්ශනයක් කරන බවක් දැනගන්නට නැත.

පැන්ඩෝරා හෙළිදරව්ව

රටවල් 90ක රාජ්‍ය නායකයන්, ලෝකයේ බලවතුන් හා පෝසතුන් තුන්සියයකට අධික පිරිසකගේ මුල්‍ය ගනුදෙනු රැගත් ලිපිගොනු කන්දරාවක් විමර්ශනය කළ රටවල් 117ක මාධ්‍යවේදීන් 600 කට වැඩි පිරිසක් හවුල් කොටගෙන ICIJ විසින් අනාවරණය කරගත් තොරතුරු ඔස්සේ හෙලි කර තිබුනේ නිරූපමා රාජපක්ෂ සහ ඇගේ සැමියා වන තිරුකුමාර් නඩේසන් අතිශය සුඛෝපභෝගී ජීවිතයක් ගත කිරීම සඳහා ව්‍යාජ සමාගමක් ඔස්සේ රැස්කළ ධන සම්භාරයක් යොදාගත් බවයි.