ගබ්සාවට නීතිගත කිරීමට විරෝධය දක්වන බෞද්ධ හා කතෝලික නායකත්වය මරණීය දණ්ඩනය ක්‍රියාත්මක කිරීමට රජය ගෙන ඇති තීරණයට ආගම් බේදයකින් තොරව අනුමැතිය පල කර තිබේ.
මරණ දඬුවම ක්‍රියාත්මක කිරීමට ජනාධිපතිවරයා ගෙන ඇති තීන්දුව බහුජන හිතසුව පිණිස නීතිය ක්‍රියාත්මක කිරීමක් ලෙසින් ශ්‍රී ලංකාවේ පැවිදි බෞද්ධ නායකත්වය විසින් කිසිදු විවාදයකින් තොරව එක හඬින් අනුමත කොට ඇත්තේ එයට බුදුන්ගේ අවසරයද ඇති බව සඳහන් කරමින්ය.
“ලොව්තුරා බුදු පියානන්ගෙන් පවා අවසර ලැබිලා තියෙන්නේ රටේ යහපත උදෙසා රජතුමා ක්‍රියා කරනවා නම්, ඒක හැමදෙනාගේම යහපත උදෙසා විය යුතුයි කියන කාරණය තමයි අපට මතක් කර දෙන්න වෙන්නේ,” යි දිඹුල්කුඹුරේ ශ්‍රී විමලධම්ම අනුනාහිමියෝ වදාලහ.
කොළඹ අගරදගුරු කාදිනල් මැල්කම් රංජිත් හිමිපාණෝ ද කතෝලික සභාවේ නිල මතයට හරස්ව යමින් ජනපති, අස්ගිරි, මල්වතු මතය අනුමත කොට ඇත්තේ “හිරගෙදර ඉඳගෙන මත්කුඩු, මත්ද්‍රව්‍ය ඒවගේම පාතාල ලෝකයේ කටයුතු සංවිධානය කරන අය ඉන්නවානම් ඒ අයට තමන්ට උරුම වෙලා තියෙන දඬුවම ක්‍රියාත්මක කිරීමේ අසාධාරණයක් නැහැ,” යි පවසමිනි.
ලංකාවේ බෞද්ධ හා කතෝලික නාහිමිවරුන්ගේ ප්‍රසාදය හිමිවී ඇති මරණ දණ්ඩනය දේශීය හා ජාත්‍යන්තර මානව හිමිකම් ආයතන විසින් හෙලා දැක තිබේ.
මරණ දඩුවම ක්‍රියාවට නැංවීම ඔස්සේ ශ්‍රී ලංකාවේ ප්‍රතිරූපයට බරපතල හානියක් වන බව පවසන ජාත්‍යන්තර ක්ෂමා සංවිධානය වසර 40 ක් පුරා ශ්‍රී ලංකාව පවත්වාගෙන ආ ස්ථාවරය වෙනස් නොකළ යුතු බවට නිවේදනයක් නිකුත් කරමින් කියා තිබුණි.
Facebook Comments
