පාස්කු බෝම්බ ප්‍රහාරයේ සැකකරුවන් අල්ලා ගැනීමට ආණ්ඩුව සැබෑ උවමනාවක් ඇත්නම් මුලින්ම හිටපු ජනපති මෛත්‍රීපාල සිරිසේන අත් අඩංගුවට ගත යුතු යැයි එක්සත් ජාතික පක්‍ෂ හිටපු පාර්ලිමේන්තු මන්ත්‍රීවරයකු ප්‍රකාශ කර තිබේ.
එහෙත් සැබෑ සැකකරුවන් පසෙක සිටියදී ආණ්ඩුව විසින් දේශපාලන දඩයමක් ආරම්භ කර ඇති බවටයි මුජිබුර් රහුමාන් මන්ත්‍රීවරයා චෝදනා කරන්නේ.
පාස්කු ප්‍රහාරයට සම්බන්ධ යැයි සැකපිට නීතිඥ හිජාස් හිස්බුල්ලා අත්අඩංගුවට ගෙන ආණ්ඩුව අලුත්ම නාටකයක් රඟ දක්වමින් සිටින බව පවසන මන්ත්‍රීවරයා එහි අරමුණ කුමක් දැයි බුද්ධිමත් ජනතාව තේරුම් ගනු ඇති බවටයි විශ්වාසය පළ කරන්නේ.
අත් අඩංගුවේ පසුවන නීතිඥවරයා ආණ්ඩුවේ අත්තනෝමතික ක්‍රියා කලාපයන්ට එරෙහිව ප්‍රබල හඬක් නැඟූ නිදහස් මතධාරියෙක් බවත් ආණ්ඩුවේ අරමුණ වන්නේ ඔවුන්ට විරුද්ධ දේශපාලන විරුද්ධවාදීන් කුදලාගෙන ගොස් සිරගතකොට සමාජයේ බොරු මතයක් නිර්මාණය කර දේශපාලන වාසි ලබා ගැනීම බවටයි මුජිබුර් රහුමාන් මන්ත්‍රීවරයා චෝදනා කරන්නේ.
2018 වසරේ ඔක්තෝබරයේ සිදු වු දේශපාලන කුමන්ත්‍රණය පරාජය කොට නැවත ප්‍රජාතන්ත්‍රවාදය ස්ථාපිත කිරීම සඳහා මුලික වු නීතිඥ කණ්ඩායමේ ප්‍රබල සාමාජිකයෙක් ලෙස ද හිජාස් හිස්බුල්ලා කටයුතු කළ බවද මන්ත්‍රීවරයා සිය නිවේදනයෙන් සිහිපත් කර ඇත.
කොරෝනා වසංගත තත්වය හමුවේ එදාවේල සොයාගන්නටවත් නොහැකිව දුක්විඳින ජනතාව ගැන කිසිඳු සොයාබැලීමක් නොකරන ආණ්ඩුව කටින් බතල සිටවමින් සිදු කරන රඟපෑම වහා නතර කළ යුතු බව හිටපු මන්ත්‍රී මුජිබුර් රහුමාන් වැඩි දුරටත් අවධාරණය කර තිබේ.
මේ අතර ශ්‍රී ලංකා නීතිඥ සංගමයේ සභාපති ජනාධිපති නීතිඥ කාලිංග ඉන්දතිස්ස පොලිස් ප්‍රධානියාට ලියා ඇති ලිපියකින් අවධාරණය කර ඇත්තේ හෙජාස් හිස්බුල්ලා අත් අඩංගුවට ගැනීම පදනම් වී ඇත්තේ වෘත්තීය පදනමින් සහභාගී වූ ඇතැම් සංවිධාන අවස්ථා සම්බන්ධයෙන් බවටයි.
පසුගිය ආණ්ඩු සමයේ දියත් කෙරුණු පාර්ලිමේන්තුවේ බලය ඇල්ලීමේ කුමන්ත්‍රණයට එරෙහිව මැතිවරණ කොමිසමේ සාමාජික ආචාර්ය රත්නජීවන් හූල් ශ්‍රේෂ්ඨාධිකරණය ඉදිරියේ ගොනුකළ මූලික අයිතිවාසිකම් පෙත්සම සහ ක්‍රිස්තියානි සහ මුස්ලිම් පල්ලිවලට අන්තවාදීන් පහරදීම් පිළිබඳ මූලික අයිතිවාසිකම් ඇතුළු නඩු වලට පෙනී සිටි නීතිඥ හිස්බුල්ලා අත් අඩංගුවට ගන්නා ලද්දේ විරුද්ධ මත අඩස්සි කිරීම සඳහා බව ඔහු පවසා තිබේ.
Facebook Comments
