“කොරෝනා වසංගතයට කලින් තිරිකුණාමලේ මාළු සහ කරවල රට පුරාම බෙදා හැරියත් දැන් තිරිකුණාමලේට මේ දෙකම ප්‍රවාහනය කරන්නේ පිට පලාත්වලින්. එතනත් ලොකු ප්‍රශණයක් තියෙනවා. අපි පසුගිය සති‍යේ කුණු මාළු සහ කුණු කරවල ලොරි හතරක් අත්අඩංගුවට ගත්තා. වටිනාකම රුපියල් කෝටියකට වැඩියි. කන්තලේ මහෙශ්ත්‍රාත් තිසානී තේනබදු මහත්මියගේ නියෝගය මත ඒ සියල්ලම විනාශකළා.”
කන්තලේ අග්බෝපුර පොලිස් ස්ථාධිපති ඩී එම් ජී බී දහම්පත් මේ බව පැවසුවේ ඉකුත් 12 වැනිදා මිනිස් පරිභෝජනයට නුසුදුසු තවත් මාළු ලොරියක් අත්අඩංගුවට ගැනීමේන් පසුවය. ලොරි රථයේ රියදුරා පැවසුවේ කොළඹ සිට මෙම මාළු තොගය ප්‍රවාහනය කරන බවයි.
“ඇඳිරිනීති කාලය තුල ධීවරයන්ට මුහුදු යාමට ලබාදී දී තිබුන අවසරය පසුගිය 06 වැනිදා වෙනස් කරමින්, රාත්‍රි කාලයේ මසුන් ඇල්ලීම රජයෙන් තහනම් කළා. නැවත 09 වැනි දා දිවා රාත්‍රී දෙකේම මුහුදු යාමට අනුමැතිය දුන්නා. මට ලැබෙන තොරතුරුවලට අනුව දැන් සුළු පන්න ධීවරයො මුහුදු යන්නෙම නැති තත්වයකයි ඉන්නේ.”
ත්‍රීකුණාමල දිසාපති අශංක අබේවර්ධන පැවසුවේ පිට පලාත් වලින් මාළු ප්‍රවාහනය කිරීමට එයද එක් හේතුවක් විය හැකි බවයි.
සහන දෙන්න
කොරෝනා වසංගතය හමුවේ ධීවර කර්මාන්තය නිසි පරිදී පවත්වාගෙන යාමට අපොහොසත් වන්නේ නම් තත්වය සමනය වෙන තුරු තමන්ට සති දෙකකට වරක් ආහාර ද්‍රව්‍ය ටිකක් නොමිළේ ලබා දෙන්නැයි ත්‍රිකුණාමල දිස්ත්‍රික් ඒකාබද්ධ ධීවර සමූපකාර සංගමයේ සභාපති පියල් හේමසිරි යෝජනා කරයි.
“මමත් සුළු පන්න ධීවරයෙක්. අපි පදිංචි වෙලා හිටියේ වෙරළ අයිනෙ. සුනාමියෙන් පස්සේ මුහුදෙන් කිලෝ මීටර් හය හතක් ඈතින් පදිංචි කළා. ඇඳිරි නීතිය අස්සේ දැන් මෙපමණ දුරක් යන එක ප්‍රශ්නයක්. ආරක්ෂක අංශවල විවිධ ප්‍රශ්න කිරීම්වලට ලක්වෙනවා.” ඔහු වැඩිදුරටත් පවසයි.
කෑලි කෑලි උත්තර
ඇඳිරි නීතිය පැවතුනත් ධීවරයාට සිය රැකියා කරගෙන යාමේ බාධාවක් නැති බව මුලදී ප්‍රකාශක කොට දින කීපයනට පෙර මූහුදු තහනමක් පනවා දැන් යලි එය ඉවත් කිරීම තුල දකින්නට ලැබෙන්නේ තීන්දු තීරණ ගැනීම සම්බන්ධයෙන් රජයට ඇති දෙගිඩියාව නොවේදැයි සභාපතිවරයා ප්‍රශ්න කරයි
මේ ගැටළුවට “කෑලි කෑලි උත්තර” හරියන්නේ නැති බවත් ධීවරයාගෙන් මාළු මිළදී ගැනීමට රජය මුදල් වෙන්කළා යැයි පැවසුවත් ගබඩා කිරීමට අවශ්‍ය තරම් ශීතකරණ පහසුකම් නැතිකම විශාල ගැටළුවක් බවත් ජාතික ධීවර සහයෝගීතා ව්‍යාපාරයේ උතුරු නැගෙනහිර සම්බන්ධීකරක ඇන්ටන් ජේසුදාසන් පෙන්වා දෙයි.
“ආණ්ඩුව කියනවා මාළු මිළදී ගන්න රුපියල් මිළියන හයසීයක් වෙන් කරනවා කියල. ඉතින් කොහේද ඒ මාළු ගබඩා කරන්නේ? කෝ විශාල ශීතාගාර. ධීවර සංස්ථාව සතු මෝදර ශීතාගාරය මේ වැඩේට කොහෙත්ම ප්‍රමාණවත් නෑ. ඒකත් දැන් බාගෙට කැඩිලා. දික්වැල්ල, ත්‍රිකුණාමලේ, මයිලෙත්ති, දික්ඕවිට, මීගමුව ආදී ඔය කියන සෑම ධීවර වරායකම ශීතාගාර තියෙනවා තමයි. හැබයි ප්‍රමාණවත් නෑ.”
වර්තමාන තත්වය යටතේ මසුන් ආහාරයට ගැනීමත්, ධීවරයන් මුහුදු යාමත් පහත වැටී ඇති බව හෙළිකරන ධීවර සහයෝගීතා ව්‍යාපාරයේ උතුරු නැගෙනහිර කැඳවුම්කරු ඇන්ටන් ජේසුදාසන් ස්ථිර විසඳුමක් සැලසෙන තුරු සහනාධාරයක් ලබා දීමේ අවශ්‍යතාව අවධාරණය කරයි.
“දැනට අපේ රටේ වාර්ෂිකව ඒක පුද්ගල මත්ස්‍ය පරිභෝජනය සියයට දොළහයි මෙය සියයට විස්ස දක්වා වැඩි කරන්න කියලයි රජයට අපි බලකරන්නේ. මත්ස්‍යාහාර ආනයනය සඳහා රජය අවුරුද්දකට රුපියල් බිළියන හතරක් වැය කරනවා. රට පුරා බහුදින යාත්‍රා තුන්දාහකට ආසන්න ප්‍රමාණයක් තියෙනවා. පවතින තත්වය යටතේ මුහුදු යන්නේ එයිනුත් සියයට විස්සයි. මුහුදු ධීවරයන් එක්ලක්ෂ පණස් දාහක් පමණ ඉන්නවා ඔවුන් රස්සාවට යාම ප්‍රතික්ෂ්ප කරලා. ඉතින් ප්‍රශ්ණය කොච්චර බැරෑරුම්ද කියල සිතලා බලන්න. කොරෝනා නිමාවෙන තුරු සහනාධාරයක් දීම තමයි සුදුසු.”
දිස්ත්‍රික් තහංචිය
නම සඳහන් නොකරන ලෙස ඉල්ලා සිටි මුලතිව් ප්‍රදේශයේ පදිංචි ධීවරයකු පැවසුවේ කොරෝනා අධි අවදානම් කලාපයක් හැටියට නම්කර ඇති මීගමුවෙන් මාළු මිළදී ගැනීමට ලොරිරථ මුලතිව් වලට එන බවයි. තමන්ට වෙනත් දිස්ත්‍රික්කයට මාළු ප්‍රවාහනය කිරීම තහනම් කොට තිබියදී, විශේෂයෙන්ම අධි අවදානම් කලාපයකින් තම ප්‍රදේශයට වාහන පැමිණීම ඔවුන්ගේ භීතියට හේතු වී ඇත.
“ඒ අය විෂ බීජහරණය කරලද එවන්නේ? අපේ මිනිස්සු අල්ලා ගන්නා එකම මාළු කූරියත් මීගමුවෙන් එන මුදලාලිලාට විකුණනවා. නැතිනම් කොහොමද තුනපහ ටිකවත් ගන්නේ? කොහොම වුනත් මෙතන බොරදියේ මාළු ඇල් ලීමක් තියෙනවා.” මුලතිව් ධීවරයා නැවත පැවසීය.
මේ අතර ජාතික ධීවර සහයෝගීතා ව්‍යාරයේ හලාවත තොඩුවාව සමිතියේ සභාපති ලොයල් පීරිස් පැවසුවේ මාසයක් දියඹේ සිට ගොඩට ගෙනා මාළු තොගය විකුණාගැනීමට මඟක් නැතිව සුසුම් ළමින් සිටින බවයි.
“මුදලාලි‍ගෙන් රුපියල් පහලොස් දාහක් ලැබුනා. එච්චරයි. වියදම් කළ මුදලත් නෑ ආදායමකුත් නෑ .කොරෝනාවට කලින් රුපියල් 1200ට අළවි කළ කෙන්දා කිලෝව දැන් රුපියල් දෙසීයයි. අපි යම් යම් මාළු වර්ග වැඩි මිළකට පිට රටවලට අපනයනය කළා. දැන් අපනයනයි ආනයනයි දෙකම නැවතිලා. තව කොච්චර කාලයක් බලා ඉන්නද?” ලොයල් පීරිස් ප්‍රශ්න කරයි.”
මේ අතර මාතර ධීවර නායකයකු වන මධුශංක සම්පත් ප්‍රකාශ කළේ එම පලාතේද කුඩා බෝට්ටු මාදැල් ඔරු ඇතුළු සියළු සුළු පන්න ධීවර කටයුතු නතරවී ඇති බවයි.
‘අපට වියලි ආහාර ටිකක් ලබාදීම තමයි කළයුත්තේ. එක පැත්තකින් මේ කාලෙට මුහුදේ මාළු අහුවෙනවා අඩුයි. කොරෝනා ඇඳිරි නීතිය නිසා කුලී වැඩකට යන්න විදියකුත් නෑ. ටැංකි බෝට්ටු දියඹට යන්නෙත් හොඳටම අඩුවෙන්.”
ආර් ජී ධර්මදාස
Facebook Comments
