අගමැතිට චැනල් 4 හෙළිදරව්ව විශ්වාසයි

උතුරේ යුද්ධයේ සිදු වු යුද අපරාධ සම්බන්ධව හෙළි කල චැනල් 4 නිව්ස් නාළිකාව විසින් මතභේදයට තුඩු දී ඇති ‘කේම්බ්‍රිජ් ඇනලිටිකා’ සමාගම පිළිබඳව කරන ලද හෙළිදරව්ව අවිශ්වාස කිරිමට හේතුවක් නොමැති බව අගමැතිවරයා පවසා තිබේ.

‘චැනල් 4 නිව්ස්’ ආයතනයේ මාධ්‍යවේදියකු ශ්‍රී ලංකාවේ මැතිවරණයක් සඳහා බලපෑම් කිරීමට අවශ්‍ය ලාංකික ධනවතකු ලෙස පෙනී සිටිමින් කේම්බ්‍රිජ් ඇනලිටිකා’ සමාගමේ රහසිගත මෙහෙයුම් පිළිබඳ තොරතුරු අනාවරණය කරගෙන තිබේ.

මැතිවරණ වාසි සඳහා අන්තර්ජාලයේ ඇති පුද්ගල දත්ත දේශපාලන පක්ෂ වලට විකිණීම ගැන නැගී ඇති චෝදනා සම්බන්ධයෙන් ඇමරිකා එක්සත් ජනපදයේ සහ බ්‍රිතාන්‍යයේ ඉහළ පෙලේ විමර්ශන දෙකකට කේම්බ්‍රිජ් ඇනලටිකා ආයතනය මුහුණ පා සිටී.

විරුද්ධ මතධාරී දේශපාලකයන්ට අවාසි සහගත පුද්ගලික තොරතුරු විකිණීම ඇතුලු දත්ත සැපයීම පිළිබඳව කේම්බ්‍රිජ් ඇනලටිකා ප්‍රධාන විධායක ඇලෙක්සැන්ඩර් නික්ස් විසින් ‘රංජන්’ නමින් පෙනී සිටිමින් ගවේෂණාත්මක වාර්තාකරණයේ යෙදුනු මාධ්‍යවේදියාට විස්තර කරනු චැනල් 4 විසින් වීඩියෝ ගත කර තිබුනි.

එජාපයත් මුණ ගැසුනා

කේම්බ්‍රිජ් ඇනලටිකා නියෝජිතයන් තමන්ද මුණ ගැසී තිබෙන බව අගමැතිවරයා පිළිගෙන ඇත.

“මම ඇත්තටම කැම‍ැත්තෙන් ඉන්නවා ඒ අපේක්ෂකයගේ නම දැනගන්න. එතන කියවෙන සමහර කාරණා කේම්බ්‍රිජ් ඇනලිටිකා අපිටත් කියල තියෙනවා. ඒ නිසා චැනල් 4 අවිශ්වාස කිරීමට හේතුවක් ඇති බව මම දකින්නේ නැහැ” යනුවෙන් සිය අත්දැකීම විස්තර කරමින් අගමැති රනිල් වික්‍රමසිංහ කියා සිටියේය.

ඇමරිකානු ජනාධිපතිවරණ ප්‍රතිඵලයට බලපෑම් කිරීම සඳහා ‘කේම්බ්‍රිජ් ඇනලිටිකා’ සමාගම විසින් ෆේස්බුක් ගිණුම් මිලියන පනහක අඩංගු පෞද්ගලික දත්ත භාවිතා කරනු ලැබ ඇති බවට චෝදනා එල්ල වේ.

කේම්බ්‍රිජ් ඇනලිටිකා සමාගම එක්සත් ජාතික පක්ෂය සඳහා ඔවුන්ගේ සේවය ලබා දීමට උත්සාහ කළ බව පවසන අගමැති රනිල් වික්‍රමසිංහ ” වාසනාවකට අපි ඔවුන්ගේ සේවය ලබා ගත්තේ නැහැ” යැයි 24 සෙනසුරාදා නීතිඥ සංගමයේ හමුවක් අමතමින් කියා සිටියේය.

‘චැනල් 4 නිව්ස්’ආයතනය විසින් ඉදිරිපත් කරනු ලැබ ඇති විඩියෝ පටවල ‘‘කේම්බ්‍රිජ් ඇනලිටිකා’’ සමාගමේ ප්‍රධානී ඇලෙක්සැන්ඩර් නික්ස් විසින් ඉදිරිපත් කරනු ලැබූ බරපතළ ගනයේ තොරතුරු අඩංගු අතර එහි අන්තර්ගත වන්නේ ප්‍රතිවාදී දේශපාලනඥයන්ගේ විශ්වාසය සහ කීර්ති නාමය පළුදු වන ලෙස එම සමාගමට සිය ප්‍රචාරණ ව්‍යාපාර සංවිධානය කළ හැකි ආකාරය ප්‍රදර්ශනය කෙරෙන වීඩියෝ දර්ශනය.

චෝදනා ප්‍රතික්ෂේප කරන ‘කේම්බ්‍රිජ් ඇනලිටිකා’ සමාගම පවසන්නේ ‘චැනල් 4 නිව්ස්’ ආයතනයේ විසින් අදාළ වාර්තාමය වැඩසටහනේ අඩංගු දර්ශන සංස්කරණය කර ඇති බවයි.

ශ්‍රී ලංකාවේ ආරක්ෂක සේනා යුද අපරාධ කළ බවට නැගෙන චෝදනා සහිත දර්ශන චැනල් 4 විසින් විකාශනය කෙරුනු විට ආණ්ඩුව ඒවා ප්‍රතික්ෂේප කළේ ද සංස්කරණය කරන ලද බව පවසමිනි.

එම දර්ශන රැගත් No Fire Zone සිංහලට නගා “යුද මුක්ත කලාපය” ලෙස අන්තර්ජාලයේ නොමිලේ නැරඹිය හැකිය.