මහින්ද රාජපක්ෂ ජනාධිපතිවරයාගේ දෙවැනි ධුර සමයේ ඉදිකිරීම් ආරම්භ කළ යාපනය ජනාධිපති මන්දිර පරිශ්‍රය සදහා බලහත්කාරයෙන් අත්පත්කරගෙන තිබෙන සිය පෞද්ගලික ඉඩම් වහාම නිදහස් කරන ලෙස උතුරේ දෙමළ ජනයා ඉල්ලා සිටී.
එම භුමියේ ඇති දෙමළ ජනයාට අයත් ඉඩම් මැනීම සදහා දෙසැම්බර් 15 වැනිදා මිනින්දෝරු දෙපාර්තමේන්තු නිලධාරීන් පැමිණි අවස්ථාවේ ඊට විරෝධය දැක් වු ඉඩම් හිමියන් ඔවුන්ගෙන් ප්‍රශ්න කළේ තම ඉඩම් මිනින්දෝරු දෙපාර්තමේන්තුව මිලදී ගෙන තිබේද යන්නයි.
පළාත් බද වාර්තාකරුවන් පවසන පරිදි මිනින්දෝරුවන් එහි පැමිණ ඇත්තේ තෙලිප්පලෙයි ප්‍රාදේශීය ලේකම්වරයාගේ නියෝග අනුවයි.
2010- 2015 සමයේ ඉදිකිරීම් කටයුතු ඇරඹූ යාපනය ජනාධිපති මන්දිර පරිශ්‍රය ශ්‍රී ලංකා තොරතුරු තාක්ෂණ ආයතනයට (SLIIT) බදු දීමට රජය තීරණය කර ඇති බවට මීට මාස දෙකකට ඉහත දී ජනමාධ්‍ය විසින් වාර්තා කර තිබුනී.
එම වාර්තා වල වැඩි දුරටත් සදහන්ව තිබුනේ ජාතික ආරක්ෂාව පිළිබඳ ජනාධිපති උපදේශක, ජනාධිපති කාර්ය මණ්ඩල ප්‍රධානී සාගල රත්නායකගේ ප්‍රධානත්වයෙන් පැවැති සාකච්ඡාවක දී මෙම තීරණයට එළඹ ඇති බවයි.
පළාත් බද වාර්තාකරුවන් පවසන පරිදි කන්කසන්තුරේ පිහිටි මෙම ජනාධිපති මන්දිර පරිශ්‍රයට අක්කර 29 ක භූමියක් අයත් වන අතර එහි රජය සතු අක්කර 12ක ඉඩමක් තුළ ගොඩනැගිලි සංකීර්ණ ඉදිකර ඇත.
ප්‍රදේශවාසීන් චෝදනා කරන්නේ එම භුමියෙන් අක්කර 17 ක් දෙමළ ජනයාට අයත් ඔප්පු සහිත පෞද්ගලික ඉඩම් බවයි.
උතුරේ දියත් වු යුද්ධය හේතුවෙන් 1990 වසරේදී ඉඩම් හිමියන් එම භුමියෙන් ඉවත් වීමත් සමග රජයේ ආරක්ෂක අංශ විසින් එම ඉඩම් අත්පත් කරගත් බවයි ඔවුන් වැඩි දුරටත් පවසන්නේ.
පළාත් බද වාර්තාකරුවන් පවසන පරිදි එම ඉඩම් දැනට නාවික හමුදා භාරයේ පවති.
යාපනය ජනාධිපති මන්දිර පරිශ්‍රයේ පිහිටි රජයට අයත් අක්කර 12ක ප්‍රමාණය මුලින් SLIIT පෞද්ගලික විශ්ව විද්‍යාලයට බදු දී, දෙමළ ජනයාට අයත් ඉතිරි අක්කර 17ක භූමි ප්‍රදේශය ද එම ජනතාවට ආදායමක් ලැබෙන පදනමක් මත SLIIT ආයතනයට බදු දීමට තීරණය කර ඇති බව ජනමාධ්‍ය පසුගිය සමයේ වාර්තා කර තිබුනි.
එම ඉඩම් මැන නාගරික සංවර්ධන අධිකාරියට පවරා දී ඔවුන් හරහා මෙම බදු කොන්ත්‍රාත්තුව සිදු කිරීමට රජය සැරසෙන බවට ඉඩම් හිමියෝ සැක පළ කරති.
ඉඩම් මැනීම සදහා දෙසැම්බර් 12 වැනිදා පැමිණි මිනින්දෝරු දෙපාර්තමේන්තු නිලධාරීන්ගෙන් “ඔහෙලා අපේ ඉඩම මිලදී ගත්තාද? ඔප්පු තියනවාද?මේක බලහත්කාරි උත්සාහයක්නේ,” යනුවෙන් ඉඩම් හිමිකාර දෙමළ ජනයා විමසා තිබුනි.
එහිදී ඉඩම් හිමියකු ප්‍රදේශයේ මාධ්‍යවේදීන් සමග පවසා තිබුනේ ඉඩම් මැනීමේ කටයුතු සදහා තමන් තදින්ම විරුද්ධ බවයි.
“කීරිමලේ ඉඩම මැනීමට නිලධාරීන් ඇවිල්ලා ඉන්නවා. අපි ඒකට විරුද්ධයි. මේ ඉඩම නිදහස් කරනවා කියලා දැනුම් දීමෙන් පස්සේ අපි ඇවිල්ලා ඉඩම් ටික පෙන්නලා ගියාට පස්සෙත් අපිට ලිපි ලැබුනා නැවත ඉඩම් ලබා ගන්න යනවා කියලා. අපි ඒකටත් විරුද්ධ උනා. අද නැවතත් ඉඩම් මනින්න මිනින්දෝරු දෙපාර්තමේන්තුව ඇවිල්ලා ඉන්නවා. අපි ඒකට එකග වෙන්නේ නෑ. අපි ඒකට විරුද්ධයි.”
ඉඩම් හිමියන්ගේ ප්‍රශ්න වලට පිළිතුරු ලබා දීමට අසමත් වු මිනින්දෝරු දෙපාර්තමේන්තු නිලධාරීන් පසුව එම ස්ථානයෙන් පිටව ගොස් ඇත්තේ සිය ඉඩම් මිනින්දෝරු දෙපාර්තමේන්තුවට පවරා දීමට හෝ මැනීමට අවස්ථාව ලබා දීමට තමන් අකමැති බවට දෙමළ ඉඩම් හිමියන් ලිඛිතව දුන් ලිපියක්ද සහිතවයි.
අදාළ සියලු පාර්ශව වලට දැනුම් දීමෙන් අනතුරුව ඉඩම් මැනීමට පැමිණි බව මිනින්දෝරු දෙපාර්තමේන්තු නිලධාරීහු පවසති.
Facebook Comments
