ජනාධිපතිවරයා විසින් සිය කැමැත්ත පරිදි මහින්ද රාජපක්ෂ හට අගමැති ධුරය ලබා දීමෙන් පසුව කැඳවු පළමු පාර්ලිමේන්තු සැසිවාරයෙන් ඔහු එම ධුරයෙන් ඉවත් කිරීමට කටයුතු කර තිබේ.
හිටපු ජනපති මහින්ද රාජපක්ෂ අගමැති ධුරයට පත් කිරීමට සහ ඉන් පසු බිහි කරන ලද කැබිනට් මණ්ඩලයට එරෙහිව ජනතා විමුක්ති පෙරමුණ ඉදිරිපත් කරන ලද විශ්වාස භංග යෝජනව‍ට අවම වශයෙන් මන්ත්‍රීවරුන් 122 දෙනකු අත්සන් තබා ඇති බව කතානායක කාර්යාලය පවසයි..
පාර්ලිමේන්තුව ආරම්භ වු අවස්ථාවේ ස්ථාවර නියෝග අත්හිටුවා දිනයේ පාර්ලිමේන්තු කටයුතු ඉදිරියට ගෙන යා යුතු බව දෙමළ සන්ධාන මන්ත්‍රී එම් ඒ සුමන්දිරන් යෝජනා කළ අතර හෙට දිනය දක්වා පාර්ලිමේන්තුව කල් තැබිය යුතු බව දිනේෂ් ගුණවර්ධන මන්ත්‍රීවරයා යෝජනා කළේය.
අනතුරුව එම යෝජනාවට කථානායකවරයා විසින් පාර්ලිමේන්තුවේ බහුතර ඡන්දය විමසීමක් සිදුකළ අතර සුමන්දිරන් මන්ත්‍රීවරයාගේ යෝජනාව වැඩි ඡන්දයෙන් සම්මත වූ බව කතානායක කරූ ජයසූරිය සභාවට දැනුම් දුනි.
ඒ අනුව ජනතා විමුක්ති පෙරමුණේ නායක අනුර කුමාර දිසානායක විසින් මහින්ද රාජපක්ෂට සහ ඔහුගේ කැබිනට් මණ්ඩලයට එරෙහිව පාර්ලිමේන්තුවට විශ්වාසභංග යෝජනාව පාර්ලිමේන්තුවට ඉදිරිපත් කළ අතර එම පක්ෂයේ මන්ත්‍රී විජිත හේරත් යෝජනාව ස්ථිර කර තිබේ.
මෙම යෝජනාවට අදාළව ඡන්ද විමසීමක් පැවැත්වීමට කථානායකවරයා පියවර ගත් අතර එක්සත් ජාතික පක්ෂය ඇතුලුව අද විපක්ෂයේ අසුන්ගෙන සිටි සියලුම මන්ත්‍රීවරුන් යෝජනාවට පක්ෂව ඡන්දය භාවිත කර ඇත.
එහිදි මහින්ද රාජපක්ෂගේ කණ්ඩායම විසින් ආණ්ඩු පක්ෂයේ අසුන් ගෙන සිටි පාර්ශවය දැඩි විරෝධය පලකල අතර උද්ගතවූ දැඩි උණුසුම් වාතාවරණය හමුවේ එම යෝජනාව වැඩි ඡන්දයෙන් සම්මතවූ බව කතානායකවරයා සභාවට දැනුම් දුන්නේය.
ඉන් පසුව පක්ෂ විපක්ෂ මන්ත්‍රීවරුන් සභාගැබ මැදට පැමිණීම හමුවේ පාර්ලිමේන්තු කටයුතු 15 බ්‍රහස්පතින්දා දක්වා කල් දැමීමට කතානායක කරූ ජයසුරිය කටයුතු කළේය.
මේ අතර පාර්ලිමේන්තුව ආරම්භ වීමත් සමඟ මන්ත්‍රීවරුන් වන ඒ එච් එම් ෆවුසි, පියසේන ගමගේ සහ මනූෂ නානායක්කාර විපක්ෂයේ අසුන් ගෙන ඇති අතර වඩිවේල් සුරේෂ් සහ වසන්ත සේනානායක සිය අමාත්‍ය ධුර වලින් ඉවත් වී තමන් සමඟ එක් වු බව හර්ෂ ද සිල්වා මන්ත්‍රීවරයා සිය ට්විටර් ගිණුමෙහි සටහනක් කර ඇත.
Facebook Comments
