පස් වසරකට ඉහතදී රජයේ ආරක්ෂ අංශ විසින් වැලිකඩ බන්ධනාගාරයේ සිදු කරන ලද මෙහෙයුමකදී සිරකරුවන් 27 දෙනෙක් ඝාතනය කිරීම සමබන්ධව විධිමත් පරීක්ෂණයක් පවත්වන ලෙස ඉල්ලා අභියාචනාධිකරණයට ඊයේ (04) රිට් පෙත්සමක් ගොනු කළ බව බන්ධනාගාර රැදවියන්ගේ අයිතිවාසිකම් සුරැකීමේ සංවිධානය කියා සිටී.
එම සිද්ධියේ ඇසින් දුටු සාක්ෂි කරුවෙක් වන සුදේෂ් නන්දිමාල් සිල්වා විසින් එම පෙත්සම ගොනු කළ බවයි බන්ධනාගාර රැදවියන්ගේ අයිතිවාසිකම් සුරැකීමේ සංවිධානයේ නිතිඥ සේනක පෙරේරා සිලෝන් ජර්නල්ස් හා කියා සිටියේ.
ත්‍රස්ත විමර්ශන ඒකකය සහ ආරක්ෂක අංශ විසින් වැලිකඩ බන්ධනාගාරය තුළ මෙම මෙහෙයුම දියත් කරනු ලැබුවේ එවකට සිටි ආරක්ෂක ලේකම්වරයාගේ උපදෙස් මත බව පෙත්සම්කරු එම පෙත්සම මඟින් පෙන්වා දී ඇත්තේ.
මෙම මෙහෙයුමට ආරක්ෂක අංශ බන්ධනාගාරයට ඇතුල්වීම වැළැක්වීමට බන්ධනාගාර නිලධාරින් විසින් වැළක්වූ අවස්ථාවේ තමන් ආරක්ෂක ලේකම්ගේ නියෝගයක් මත පැමිණි හෙයින් බන්ධනාගාරයෙන් විශේෂ අවසරයක් ලබාගැනීමට අවශ්‍ය නැතැයි එම හමුදා නිලධාරින් කී බව පෙත්සම්කරු වන සුදේශ් නන්දිමාල් සිය පෙත්සමේ දක්වා තිබේ.
බන්ධනාගාර කොමසාරිස් ජනරාල්වරයා, අපරාධ පරීක්ෂණ දෙපාර්තමේන්තුවේ අධ්‍යක්ෂවරයා, පොලිස්පතිවරයා, බන්ධනාගාර ප්‍රතිසංස්කරණ ඇමැතිවරයා සහ නීතිපතිවරයා මෙම පෙත්සමෙන් වගඋත්තරකරුවන් කර ලෙස නම් කර ඇති බව කී බන්ධනාගාර රැදවියන්ගේ අයිතිවාසිකම් සුරැකීමේ සංවිධානයේ නිතිඥ සේනක පෙරේරා මෙම ඝාතනයන් පිළිබඳව පරීක්ෂණයක් පවත්වා වැරදිකරුවන්ට දඩුවම් ලබා දෙන ලෙස පෙත්සම මඟින් ඉල්ලා ඇති බවයි සඳහන් කරන්නේ.
ඉකුත් 2012 වසරේ නොවැම්බර් මස 09 හෝ 10 දින විශේෂ කාර්ය බලකාය නීති විරෝධී ලෙස බන්ධනාගාරය තුළට ඇතුල් වී රැඳවියන් ප්‍රකෝප වන ලෙසට හැසිරී ගැටුමක් නිර්මාණය කර සිරකරුවන් 27 දෙනෙකු ඝාතනය කළ බව මෙන්ම ඒ සම්බන්ධයෙන් පරීක්ෂණ පවත්වන ලෙස බලධාරීන්ගෙන් කළ ඉල්ලීම් මෙතෙක් ඉටු නොවූ බැවින් මෙම සිද්ධිය සම්බන්ධයෙන් පරීක්ෂණයක් පවත්වන ලෙස නියෝග කරන රිට් ආඥාවක් නිකුත් කරන්නැයි පෙත්සම්කරු අධිකරණයෙන් ඉල්ලා සිටී.
සිද්ධිය සම්බන්ධව සොයා බැලීම සඳහා යහපාලන රජය විසින් පත් කරන ලද විමර්ශන කමිටු වාර්තාව විශ්‍රාම ලත් විනිසුරු නිමල් නම්බුවසම් අගමැති රනිල් වික්‍රමසිංහ හමුවේ අධිකරණ අමාත්‍ය විජයදාස රාජපක්ෂ වෙත භාර දෙන ලද්දේ 2015 ජුනි මාසයේදී වන අතර එය මෙතෙක් ප්‍රසිද්ධියට පත් කර නොමැත.
Facebook Comments
